Read Yucateco Ezequiel 11 Bible Online

Ezequiel 11 - Yucateco bible

Ezequiel 11

¹U páajtalil Yuumtzile' tu ch'úuyajene' ca tu bisajen tac tu jool u kulnaj Yuumtzil. Ti' le jool najo' yaan ca'ach veinticinco wíinico'obi'. Ichilo'obe' tin kaj óoltaj Jaazanías u paal Azur, yéetel Pelatías u paal Benanías, u nuuquilo'ob le caajo'.

²Yuumtzile' tu ya'alaj ti' teen: Lelo'oba' leti' le máaco'ob táan u pat jo'oltico'ob u quíimsico'ob wíinico'ob táan xan u tucultico'ob loolob ba'alo'ob te j caaja'.

³Cu ya'alico'ob: Ma' úuch c utzquint le najo'oba'. Waye' ma'alob yanilo'on, bey je'el bix le bak yaan ichil cuumo',

⁴Le t o'olalo', t'ano'ob tin kaaba'.

⁵U pixan Yuumtzile' tu ch'a'ajene', ca tu ya'alaj ti' teen ca in wa'al; Je'el ba'ax cu ya'alic Yuumtzila': Lelo' j israelitaex leti' ca tucultique'ex. Tene' in kaj óol a tuucule'ex.

⁶Te'exe' dzo'oc a sen beeticaba'ex u aj quíimsaj wíiniquilo'ob le caaja', dzo'oc a chupique'ex u bejilo'ob yéetel quimeno'ob.

⁷Let o'olale', teen Yuumtzile' quin jach a'alic ti' te'ex: Jerusalene' bíin u beetubáa bey jun p'éel cuume', chéen ma' te'ex bíin a beete'ex u bakeli', ba'ale' u wíinclil le máaxo'ob a quíimsmaje'exo', leti'ob bíin u beetuba'ob u bakelil, tumen te'exe' bin in ca'aj in jóokese'ex ichil le cuumo'.

⁸¿Sajaque'ex ti' ba'atel? Bíin in beet u taal ba'atel ta wóokole'ex. Teen Yuumtzil, teen a'alic

⁹Bíin in béeycunt in xot kiin ta wóokole'ex: Bíin in jóokese'ex waye' u ti'al in kubique'ex ti' j táanxel lu'umilo'ob.

¹⁰Bíin quíimsa'aque'ex tu yéetel ti' u yej máascab. Teen bíin in p'is óolte'ex tu jáal u lu'umilo'ob Israel, te'ex túune' bíin a wutzil kaj óolte'ex, tene' Yuumtzilen.

¹¹Le caajo' ma' bíin meyajnac ti' te'ex je'el bix u meyaj jun p'éel cuume', mix te'ex bíin a beetaba'ex u bakel, tene' bíin in p'is óolte'ex tu jáal u lu'umilo'ob Israel

¹²bey túuno' bíin utzil kaj óolta'ac teen Yuumtzilen. Te'exe' ma' cuxlaque'ex je'el bix in wa'almajile', mix a dzo'ocbese'ex in wa'almaj t'aano'obi', ba'ale' te'exe' j cuxlaje'ex je'el bix u cuxtalo'ob le múuch' caajo'ob yaan ta bakpache'exo'.

¹³Ca'aliquil táan in t'anico'ob tu kaaba' Yuumtzile', j lúub quimen Pelatías, u paal Benaías. Tene' j noclajen tac j lu'um, j táaj in wawate' ca tin wawtaj: ¡In Yuumtzil! ¿Bin a ca'aj a xu'uls le jun p'íit máaco'ob p'áatalo'ob Israelo'?

¹⁴Yuumtzile' tu t'anajene' ca tu ya'alaj ti' teen:

¹⁵Le máaco'ob cajnáalo'ob Jerusaleno', cu ya'alaj ba'alo'ob ti' a wéet caajalo'ob tu yo'olal le j israelitaob: ¡Leti'obe' náach yanilo'ob ti' Yuumtzil! Ba'ale' ti' to'one' j dzaab le caaj c ti'alinte.

¹⁶Let o'olale' a'al ti'ob: Je'el ba'ax cu ya'alic Yuumtzila': Tene' tin jóokeso'obe' ca tin bisajo'ob in ki'itbeso'ob ichil múuch' caajo'ob ti' táanxel lu'umilo'ob, ba'ale' chéen u ti'al jun p'íit kiin. Bejela'e' tene' bíin in beetinbáa u quili'ich najo'ob ti' le múuch' caajo'ob tu'ux bisa'ano'obo'.

¹⁷A'al ti'ob xan: Je'el ba'ax cu ya'alic Yuumtzila': Tene' bíin in beet u lukulo'ob ti' le múuch' caajo'ob tu'ux tin ki'itbesmajo'obo', u ti'al ca in much'quinto'ob tu yo'olal in dzáic u lu'umilo'ob Israel ti'ob.

¹⁸Leti'obe' bíin suunaco'ob tu lu'umo'ob u ti'al ca u beeto'ob u we'et'el le p'ecbe'en ba'alo'ob yaan tu caajilo'obo'.

¹⁹Tene' bíin in lukes ti'ob le pucsi'ikalo'ob dzu'uy bey tuuniche', u ti'al ca in dzáa ti'ob jun p'éel túumben pucsi'ikal yéetel jun p'éel túumben pixan.

²⁰Bíin cuxlaco'ob túun je'el bix in tzolmajil ichil in wa'almaj t'aano'ob yéetel in nu'ucbe'en t'aane', tumen bíin u dzo'ocbeso'ob. Leti'obe' bíin in caajalto'ob, tene' bíin u Kuinteno'ob.

²¹Ba'ale' le máaxo'ob dzo'oc u suuctal cuxtalo'ob ichil p'ecbe'en ba'alo'obo', bíin in p'is óolto'ob tu yo'olal u kaakas u cuxtalo'obo', Teen Yuumtzil, teen kax t'antic.

²²Le aj xiknal cuxa'ano'obo' j líik u xiknalo'ob ca'anal, le peten che'obo' j bino'ob tu paacho'ob. U nojbe'enil túun Yuumtzil yaan ca'ach tu yóokolo'obe',

²³j líike' ca j náachchaj ti' le caajo', ca j bin tu yóokol le pu'uc yaan tu lakin le caajo'.

²⁴Cu dzo'ocole' u páajtalil Yuumtzile', tu beetaj in suut Babilonia le tu'ux yaan u láak in wéet caajalo'ob bisa'ano'ob pulbil táanxel lu'umilo'. Lela' úuch ichil jun p'éel náay j beeta'ab in wilic tumen u pixan Ku. Cu dzo'ocole' j samkaj le náayo',

²⁵tene' tin tzicbaltaj ti' le máaxo'ob bisa'ano'ob te táanxel lu'umil tuláacal le ba'axo'ob j e'esa'ab ti' teen tumen Yuumtzilo'.