Read Yucateco Ezequiel 12 Bible Online

Ezequiel 12 - Yucateco bible

Ezequiel 12

¹Yuumtzile' tu t'anajene' ca tu ya'alaj ti' teen:

²Wíinic, teche' cajnáalech ichil jun p'éel caaj j ma' tzic t'aan. Yaan u yicho'ob u ti'al j ilaj ba'ale' ma' tu paacato'ob; yaan u xiquino'ob u ti'al j u'uyaj, ba'ale' ma' tu yu'ubajo'ob, tumen jun p'éel caaj j ma' tzic t'aan.

³Let o'olale' nu'ucbes ba'axo'ob kabéet ti' teech u ti'al a binbal táanxel lu'umil ti' u ma'alob sáasilil kiin, tu táan u yicho'ob tuláacalo'ob, jóoken ta wotoche' ca xi'iquech táanxel tu'ux; Ma' xan ca páatac u kaj óoltico'obe', leti'obe' jun p'éel caaj j ma' tzic t'aan.

⁴Tu jach sáasilil kiin tu táan yich tuláacalo'obe', jóokes a nu'uculo'ob u ti'al a bíin táanxel lu'umil; Cu dzo'ocole' tu yocbal kiin, tu táan yich tuláacalo'obe', jóoken u ti'al ca a beet bey táan a bin táanxel lu'umile'.

⁵Cu dzo'ocole' pot jun p'éel jool te j pak tu táan u yich tuláacalo'obo', ca jóokol yéetel tuláacal a nu'uculo'ob.

⁶Le quéen áakabchajaque', dzáa ta queléenbal a nu'uculo'obe' ca jóokoquech tu táan u yicho'ob. Pix a wich u ti'al ma' u páajtal a wilic le lu'umo'. In káat ca béeyaquech u chíiculal u jak óolal ti' tuláacal u caajil Israel.

⁷Tene' tin nu'ucbesaj in ba'aluba'ob je'el bix tu ya'alajilac ti' teen Yuumtzile', Jach tu táan kiine' jóoken u ti'al in binbal je'el bix máax cu bisa'al táanxel lu'umile'. Tu yocbal kiine' tin beetaj tin potaj jun p'éel jool ti' le pako', le ca j éekjoch'e'enchaje', tin ch'a'aj in nu'uculo'ob ca jóoken jach tu táan yich tuláacalo'ob, in cúuch queléentbalt in nu'uculo'ob.

⁸Tu ja'atzcabil u láak kiine', Yuumtzile' tu t'anajene' ca tu ya'alaj ti' teen:

⁹Quin tucultique' le j israelitaob, jun p'éel caaj j ma' tzic t'aane' bíin káat chi'ito'ob ti' teech ba'ax ca'ach ca beetic.

¹⁰A'al ti'ob táan in beetic jun p'éel u chíiculal ba'ax bíin úuchuc ti' u ajawil Jerusalén yéetel ti' le máaxo'ob caja'ano'ob te'elo'.

¹¹A'al ti'obe', teche' jun p'éelech u chíiculal u jak óolal u ti'alo'ob, a'al ti'ob, ti' leti'ob bíin úuchuc, leti'ob bíin u beeto'ob le ba'ax ca beetico', tumen yaan u bisa'alo'ob j pulbil táanxel lu'umil.

¹²U noojocho'obe' bíin u dzáa u nu'uculo'ob tu queléenbal, cu dzo'ocole' le quéen éekjoch'e'enchajque' bíin jóokoc tu jool le pak bíin po'otoco'. Bíin xi'ic piixil u yich tu yo'olal ma' u yila'al tumen mix máac mix xan bíin páatac u pactic le lu'umo'.

¹³Tene' bíin in pul in léech tu yóokol u ti'al in léechtic. Bíin in bis Babilonia tu lu'um j caldeob, lu'um ma' bíin u yili', ti' bíin quíimiqui'.

¹⁴Bíin in ki'itbes tu can ti'itzil u yóokolcaab, le aj ba'atelo'ob canantico'ob le ca'acho', bey u láak u múuch'ul u aj ba'atelo'obo', bíin in ch'a'apachto'ob in machmaj in máascab.

¹⁵Le quéen dzo'ococ in ki'itbesico'ob ti' jejeláas lu'umilo'ob yéetel jejeláas múuch' caajo'obe', bíin u yutzil kaj óolto'ob, tene' Yuumtzilen.

¹⁶Ba'ale' bíin in beet u yantal dze'edzec ti'ob u jecho'ob u quíimilil le ba'atel, le wi'ijil yéetel le koja'anilo'obo', u ti'al ca u tzicbalto'ob ti' le múuch' caajo'ob tu'ux bíin xi'ico'obo', le j p'ecbe'en ba'alo'ob tu beetajo'obo' yéetel bíin u yutzil kaj óolto'ob, tene' Yuumtzilen.

¹⁷Yuumtzile' tu ca'a t'aanajene' ca tu ya'alaj ti' teen:

¹⁸Wíinic teche' quiquilnen le quéen janalnaquech, e'es yaj a wóol le quéen ukulnaquech.

¹⁹Cu dzo'ocole' a'al ti' u cajnáalilo'ob le múuch' caajo'ob yéetel ti' Jerusalén yéetel ti' tuláacal le j israelitaob: Je'el ba'ax cu ya'alic Yuumtzila': Bíin a jaante'ex a wo'oche'ex yéetel yajyaj óolal, bíin a wuke'ex a wukule'ex yéetel sajaquil; le múuch' caajo'obo' bíin láaj p'áatac jeenel yéetel x ma' cajnáalilo'ob tu yo'olal u meyaj loob u cajnáalilo'ob.

²⁰Tuláacal caaj cáajbesa'ane', bíin je'enec; le lu'umo' bíin suunac x tocoy lu'umil. Bíin túun a wutzil kaj óolte'ex, tene' Yuumtzilen.

²¹Yuumtzile' tu t'anajene' ca tu ya'alaj ti' teen:

²²¿Ba'ax u káat u ya'alo'ob le j israelitaob ca'aliquil táan u ya'alico'ob, xi'ic u bin u máan kiino'ob, ba'ale' ma' tu yúuchpajal u náayo'ob le aj bóobato'?

²³Bey túuno', a'al ti'ob: Je'el ba'ax cu ya'alic Yuumtzila': Tene' bin in ca'aj in beet ma' u ca'a a'alal le t'aano'obo' tu caajil Israel. A'al ti'ob xan dzo'oc u náadzal u kiinil u yúuchpajal le ba'axo'ob e'esa'ano'ob ti' le náayo'obo'.

²⁴Ma' bíin ca'a yanac ichil le j israelitaob tuutus náayo'obi', mix tuutus bóobatilo'ob,

²⁵tumen teen Yuumtzile' bin in ca'aj t'aan, cu dzo'ocole' ba'ax bíin in wa'ale' ma' tu xáantal quéen úuchuc. Te'ex ta wichile'ex bíin a wile'ex j ma' tzic t'aan caaj; Tene' bíin t'aanaquen cu dzo'ocole' bíin in beet u yúuchul ba'ax bíin in wa'ale. Teen Yuumtzil, tene' quin kax t'antic.

²⁶Yuumtzile' tu t'anajene' ca tu ya'alaj ti' teen:

²⁷Le j israelitaobo' táan u máan u tzicbalto'ob yaan u xáantal le quéen úuchuc le bóobatilo'ob ca wa'alico'.

²⁸Let o'olale' a'al ti'ob: Je'el ba'ax cu ya'alic Yuumtzila': In t'aano'obe' ma' bíin xáanac quéen béeychajaco'obi'; le ba'ax.