Read Yucateco Ezequiel 13 Bible Online

Ezequiel 13 - Yucateco bible

Ezequiel 13

¹Yuumtzile' tu t'anajene' ca tu ya'alaj ti' teen:

²A'al tin kaaba' u péectzilil u xot kiinil u j bóobatilo'ob Israel, le cu t'aano'ob tu juunal u yóolo'obo' ca a wa'al ti'ob: U'uye'ex ba'ax cu ya'alic Yuumtzil:

³¡Yaj u yanilo'ob le jach j ma' na'at aj bóobato'ob cu cha'ico'ob u jíilta'alo'ob tumen u tuuculo'ob, tumen ma' jaaj wa u yilmajo'ob náayo'obi'!

⁴Israel, a aj bóobato'obe', bey oocho'ob cajnáalo'ob ti' jeenel caajo'obe'.

⁵Ma' u beeto'ob mix ba'al u ti'al u toquico'ob Israeli', u ti'al ma' u lúubul u yóolo'ob te j ba'atel tu kiinil quéen talac Yuumtzil.

⁶U náayo'obe' ma' jaajtaco'obi', u bóobato'obe' chéen tuus. Cu ya'alico'ob táan u t'aano'ob tin kaaba'e', ba'ale' tene' ma' in túuxto'obi'. ¡Quex beyo' táan u pa'atico'ob u yúuchpajal ba'axo'ob u ya'almajo'ob!

⁷¡Le náayo'ob ca wilique'exo' ma' jaajtaco'obi'! ¡A bóobate'exe' chéen tuus! Ca wa'alique'ex táan a t'aane'ex tin kaaba', ba'ale' tene' ma' in wa'al mix ba'ali'.

⁸Let o'olal teen Yuumtzile' quin wa'alic: Bey tumen ca wa'alique'ex ba'alo'ob ma' jaajtaco'ob yéetel chéen tuus náayo'ob yaan te'exe', tene' bin in ca'aj jadze'ex. Teen Yuumtzil, teen a'alic.

⁹Bin in ca'aj in líikes in kab u ti'al in jadzic le aj bóobato'ob yaan náayo'ob ti'ob ma' jaajtaco'ob yéetel chéen j tuus u bóobato'ob. Ma' bíin páatac u táacpajo'ob ichil u múuch'ul in caajal Israeli'; ma' bíin dzíibta'ac u kaaba'ob tu ju'unilo'ob u kaaba'ob le j israelitaobo', mix bíin u pe'echakto'ob u lu'umil Israeli'. Beyo' bíin u kaj óolto'ob túun, teen Yuumtzilen.

¹⁰Leti'obe' tu tusajo'ob in caajal u ya'alico'ob utz u bin tuláacal ba'al, quex tumen ma' beyi'. Beyo'ob máax cu líiksico'ob jun p'éel pak yunkalac cu dzo'ocole' cu bonico'ob yéetel ta'ane'.

¹¹Let o'olale', a'al ti' máaxo'ob saccuntic le pako', le pako' bíin je'enec. Bíin taalac ka'amcach ja', bíin káaxac bat bey tuunicho'obe', bíin taalac jun p'éel ka'amcach chac iikal,

¹²le pako' bíin jéenec. Bíin káat chi'ita'ac te'ex túun: ¿Ba'ax úuch yéetel le ta'an ta dzaje'exo'?

¹³Let o'olal, teen Yuumtzile' quin wa'alic: Ichil in p'uja'anile' bin in ca'aj in beet u taal jun p'éel ka'amcach chac iikal; ichil in p'uja'anile' bin in ca'aj in beet u sen ka'amchajal u káaxal ja' yéetel u káaxal bat bey tuunicho'obe' u ti'al in láaj xu'ulsic tu yéetel in p'uja'anil.

¹⁴Bíin in jen le pak ta saccuntaje'exo'; bíin in beet u lúubul j lu'um u ti'al ca chíicpajac u chuun pakilo'ob. Jach beyo', le pako' bíin níiquic j lu'um, te'exe' xane' bíin quíimique'ex yáanal u tucubilo'ob. Beyo' bíin utzil kaj óolta'ac túun, teen Yuumtzilen.

¹⁵Bíin in láal tuláacal in p'uja'anil tu yóokol le pako', yéetel tu yóokol le máaxo'ob saccuntmailo', le wíinico'ob túuno' bíin u ya'alo'ob: Ma' j p'áat mix ba'al ti' le pako', mix j p'áat le máaxo'ob saccunto',

¹⁶u aj bóobatilo'ob Israel yaan ca'ach tuus náay ti'ob, yéetel cu tze'ectico'ob ca'ach ti' Jerusalén láaj utz u bin tuláacal ba'ale', quex tumen ma' jaaji'. Teen Yuumtzil, teen a'alic.

¹⁷Wíinic, bejela'e', xeen j t'aan yéetel u co'olelilo'ob a caajal, cu dzáicuba'ob j t'aan tin kaaba' chéen tu juunal u yóolo'obo',

¹⁸ca a wa'al ti'ob: Je'el ba'ax cu ya'alic Yuumtzila': ¡Yaj a wanile'ex, te'ex máaxe'ex ca máan a chuque'ex wíinico'ob; ca chuyique'ex pulya'aj x bakkabo'ob, u ti'al u dza'ob tu kabo'ob tuláacalo'ob, ca beetique'ex xan pix icho'ob u ti'al u dza'ob tu poolo'ob tuláacalo'ob! ¿Táan wa a tucultique'ex je'el u páajtal a dzáique'ex wa a lukesique'ex u cuxtal in caajal je'el bix a káate'exe'?

¹⁹Te'exe' chéen yéetel dze'edzec u láap'alilo'ob cebada yéetel jujun xéet' waaje', ca manba'alcuntiquene'ex tu táan in caajal; ca quíimsique'ex máaco'ob ma' unaj u quíimilo'obi', ca cha'ique'ex u p'áatal cuxa'an máaxo'ob ma' unaj u cuxtalo'obi'. Bey a tusique'ex in caajal cu táan óoltic a tuuse'exo'.

²⁰Let o'olale', teen Yuumtzile' quin wa'alic: Tene' quin wa'alic tin báil, tene' aj p'eequen ti' le pulya'aj x bakkab nooko'ob ca beetique'ex u ti'al a léechtique'ex le máaco'ob bey je'el bix u léechta'al ch'íich'o'obo'. Tene' bíin in toc ta kabe'ex le máaco'obo', u ti'al ca in beet u p'áatalo'ob jáalkabil;

²¹bíin in toc in caajal ta kabe'ex yéetel ti' le pix icho'ob a dzaamaje'ex ti'obo', ma' bíin páatac a ca'a chuquique'exo'obi'. Te'ex túune' bíin a kaj óolte'ex, teen Yuumtzilen.

²²Te'ex, yéetel a tuuse'exe', ta sajbesaje'ex le utzul máaco'obo', tene' ma' in káat ca'ach ca úuchuc beyo', ba'ale' te'exe' ta wáantaje'ex le loolob máaco'ob u ti'al ma' u p'atico'ob u kaakas cuxtalo'obi', u ti'al xan ma' dzáic cuxtal ti'obi'.

²³Let o'olal ma' bíin ca'a yanac ti' te'ex j tuus náayo'obi' mix bíin a ca'a tze'ecte'ex tuus náayo'obi'. Teen bíin in toc in caajal ta kabe'ex, bíin túun a wutzil kaj óolte'ex teen Yuumtzilen.