Read Yucateco Ezequiel 14 Bible Online

Ezequiel 14 - Yucateco bible

Ezequiel 14

¹Ya'ab u nuuquilo'ob Israel j taalo'ob u yileno'ob u ti'al u káat chi'ob ti' Yuumtzil.

²Yuumtzil túune' tu t'anajene' ca tu ya'alaj ti' teen:

³Le wíinico'oba' dzo'oc u jach kubicuba'ob u kulto'ob beetbil kuob dzo'oc xan u kubicuba'ob ti' ba'axo'ob cu beetic u kebanchajalo'ob. ¿Bin in ca'a wa túun in cha'a' ca u káat chi'itiqueno'ob?

⁴T'aanen tu yéetelo'obe' ca a wa'al ti'ob: Tuláacal j israelita ca u kububáa u kult beetbil kuob yéetel ca u dza'ob u yicho'ob ti' ba'axo'ob cu beetic u kebantalo'obe', cu dzo'ocole' cu taal j káat chi' ti' aj bóobate', bíin in núuc u káat chi' je'el bix cu najmatic tu yo'olal u ya'abil u beetbil kuobe'.

⁵Tene' bíin in dzáalkabt u pucsi'ikal le j israelitaob tu náachcuntajuba'ob ti' teen tu yo'olal u beetbil kuobo'.

⁶Let o'olale' a'al ti' le j israelitaob: Je'el ba'ax cu ya'alic Yuumtzilo': Suunene'ex ti' teen, xúunp'ate'ex a beetbil kuex láaj p'ate'ex le p'ecbe'en ba'alo'obo'.

⁷Wa jun túul j israelita, wa jun túul j táanxel lu'umil cajnáal Israel cu tzelicubáa ti' teen u ti'al u kubicubáa jun puli' u kult beetbil kuob, cu dzáic u yich ti' ba'alo'ob cu beetic u kebanchajale', cu dzo'ocol cu bin u yila'a' jun túul aj bóobat u ti'al u káat chi' ti' tene', teen bíin in núuc u t'aan:

⁸Bíin jóokoquen in nuptáant le wíinico' u ti'al in dzáa u jaadzil u ti'al j ilbil tumen u láak máaco'ob, bíin in tzel ichil in caajal. Beyo' bíin a wutzil kaj óolte'ex teen Yuumtzilen.

⁹Wa jun túul aj bóobat cu dzáic jun p'éel u tuusil péectzile', lelo' j úuche' tumen teen tin tusaj le aj bóobato'; teen xane' bíin in líikes in kab u ti'al in jadzic, bíin in tzel ichil in caajal Israel.

¹⁰Le wíinic yéetel le aj bóobato' bíin u biso'ob u jaadzil u kebano'ob,

¹¹tu yo'olal ma' u ca'a náachtal ti' teen u caajil Israel yéetel tu yo'olal ma' kascunticubáa yéetel u loobilo'ob. Leti'obe' bíin in caajalto'ob, tene' bíin u Kuinteno'ob. Teen Yuumtzil, teen a'alic.

¹²Yuumtzile' tu t'anajene' ca tu ya'alaj ti' teen:

¹³Wa jun múuch' caajo'ob cu kebanchajal ti' teen, tu yo'olal u káat u kexene', tene' bíin in líikes in kab u ti'al in jadzic, bíin in lukes xan tuláacal u yo'och waaj; bíin in túuxt wi'ij tu yóokol, bíin in beet u quíimil u wíiniquilo'ob yéetel u ba'alche'ilo'ob.

¹⁴Wa ti' le caaj ca kuchuc j taal Noe, Daniel yéetel Job, chéen leti'ob óox túulo'ob je'el u toquicuba'ob tu yo'olal u tojil u cuxtalo'ob. Teen Yuumtzil, teen a'alic.

¹⁵Wa ca in túuxt dzíidzic ba'alche'ob ti' jun múuch' caajo'ob, u ti'al u quíimso'ob u cajnáalilo'ob, ca u suto'ob x tocoy lu'umil tu'ux mix máac cu yóoltic j máan tu yo'olal u sajaquil ti' tuláacal dzíidzic ba'alche'obi',

¹⁶wa ti' cajacbalo'ob le óox túul máaco'obo', ma' bíin páatac u toquico'ob u j xibil paalalo'ob mix u x ch'upul paalalo'ob, chéen leti'ob bíin u tocuba'ob, le lu'um xano' je'el u p'áatal x tocoyile'. Teen Yuumtzil, quin jalach t'antic tu yo'olal in cuxtal.

¹⁷Bey xan wa quin beetic u taal ba'atel tu yóokol le múuch' caajo'ob, wa xan ca in túuxt quíimsbil tuláacal wíinico'ob yéetel ba'alche'obe',

¹⁸wa ti' cajnáal le óox túul máaco'obo', ma' bíin páatac u toquico'ob mix u j xibil paalalo'ob mix u x ch'upul paalalo'ob; chéen leti'ob je'el u páajtal u toquicuba'obe'. Teen Yuumtzil quin jalach t'antic tin kaaba'.

¹⁹Wa ca in túuxt koja'anilo'ob ti' le lu'um bey xan ichil in p'uja'anil ca in túuxt quíimil u ti'al in beetic u quíimil máaco'ob yéetel ba'alche'obe',

²⁰wa ti' caja'ano'ob Noe, Daniel yéetel Jobe', ma' bíin páatac u toquico'ob mix u j xibil paalalo'ob yéetel u x ch'upul paalalo'obi'; chéen leti'ob bíin u tocjuba'ob tu yo'olal u toj cuxtalo'ob. Teen Yuumtzil quin jalach t'antic tu yo'olal in cuxtal.

²¹Teen Yuumtzil, tene' quin wa'alic: Cu dzo'ocole' asab yaj ba'ax bíin úuchuc le quéen in túuxt tu yóokol Jerusalén in can p'éel sajbe'en jaadzo'ob: Ba'atel, wi'ij, dzíidzic ba'alche'ob yéetel koja'anilo'ob u ti'al in quíimsic wíinico'ob yéetel ba'alche'ob.

²²Chéen dze'edzec ichilo'ob bíin p'áatac cuxa'an u ti'al ca jóokoco'ob yéetel u j xibil paalalo'ob bey xan yéetel u x ch'upul paalalo'ob. Le quéen xi'ico'ob ta wicnale'exe', te'exe' bíin a wile'ex bix úuchic u cuxtalo'ob bey xan ba'axo'ob u beetmajo'ob, bíin qui'imacchajac u yóolo'ob tu yo'olal le jaadz tin beetaj u taal tu yóokol Jerusaleno'.

²³Bíin qui'imacchajac u yóolo'ob le quéen u yilo'ob bix úuchic u cuxtalo'ob yéetel ba'axo'ob tu beetajo'ob xan. Bíin túun a kaj óolte'ex ba'axten kabéetchaj in jadzic Jerusalén. Teen Yuumtzil, a'alic.