Read Yucateco Ezequiel 16 Bible Online

Ezequiel 16 - Yucateco bible

Ezequiel 16

¹Yuumtzile' tu t'anajene' ca tu ya'alaj ti' teen:

²Wíinic, teche' beet u yojéeltic Jerusalén le p'ecbe'en ba'alo'ob u beetmajo'.

³A'al ti': Je'el ba'ax cu ya'alic Yuumtzila': Teche' Jerusalén ti' sijnalech ti' u ch'i'ibal j cananeobe'; a taatae' j amorreo, a maamae' x ititail.

⁴Le kiin ca j síijeche' ma' xo'ot a tuuchi', mix isinsa'abechi', mix ji'ib kabta'abech yéetel ta'abi' mix ka'ax a naki'.

⁵Mix máac ch'a'a' óotzilil ti' teech u ti'al u beetic ti' teech le ba'alo'obo'. Le kiin j síijeche' j pu'ulech j káax tumen ta beetaj u taactal u xejo'ob.

⁶Tene' j máanen ta tzéel, le ca tin wilaj táan a sansanchaak ichil a ki'ikele', tin tucultaj unaj a cuxtal.

⁷Tin beetaj a ch'íijil bey u ch'íijil u che'il káaxe'. J bin a nojoch wíinictal, ta chucaj a x lo'obaynil. Yiijchaj a wiimo'ob, yéetel tóop' a tzo'otzel. Ba'ale' láaj chacnulech ca'achi.

⁸Le ca j máanen tu ca'a téen ta tzéele' tin pactajech; tin wilaj dzo'oc a chuquic u ja'abil yaacunaj. Tin jayaj in suyem ta wóokole' ca tin pixaj a chacnulil, ca tin dzaj ti' teech u t'aanil dzo'ocol beel; tin beetaj jun p'éel nup t'aan ta wéetele', ca tin ti'alintajech. Teen Yuumtzil, teen a'alic.

⁹Tin wisimsajech, tin cho'aj a ki'ikele', ca tin qui'ibocquintajech;

¹⁰tin dzaj ti' teech jun p'éel búuc jadzutz qui'ichquelmil u boonlilo'ob yéetel jun dza'an xanab beeta'an yéetel túunben kéewelo'ob; tin dzaj ti' teech jun p'éel kaxnak beeta'an tu yéetel lino yéetel jun p'éel búuc ma'alob jit'a'anilo'ob;

¹¹tin jadzutzquintajech tu yéetel co'ocoj bak kabo'ob ta kab, bey xan jun p'éel x jokenjóok ta caal;

¹²tin dzáa jun p'éel x dzipit ta ni', tin dzáa tu'upo'ob ta xiquin yéetel jun p'éel qui'ichquelem péet jo'ol tu yóokol a pool.

¹³Búucpajech yéetel oro bey xan tu yéetel plata; a búuco'obe' beeta'ano'ob ca'ach tu yéetel lino, yéetel jiit'o'ob bey xan tu yéetel nooko'ob jadzutz bona'antaquilo'ob. Ca tzéenticabáa ca'ach yéetel u asab ma'alobil waaj, yéetel caab bey xan yéetel u aceiteil oliva. Sen qui'ichpamchajech, ta beetjabáa jun túul x ajaw.

¹⁴Sen ojéelta'ab ti' tuláacal múuch' caajo'ob a qui'ichpamil, tumen ca sen lúubul utzil tu yo'olal tin jadzutzquintech yéetel a búuco'ob. Teen Yuumtzil a'alic.

¹⁵Ba'ale' ta alab óoltaj a qui'ichpamil yéetel u yutzil a wila'ale' ca j suunajech x kaakas co'olelil, u ti'al a kubic a wíinclil ti' tuláacal máax cu káatal ta wicnal.

¹⁶Yéetel a búuco'ob ta beetaj u najil beetbil kuob ti' jo'ol pu'uco'ob, ta kascuntjabáa tu yéetelo'ob.

¹⁷Ta ch'a'a le ba'alo'ob beeta'ano'ob tu yéetel oro bey xan tu yéetel plata in siiláantmaj techo', ca ta beetaj u yoochel wíinico'ob u ti'al a kastal tu yéetelo'ob;

¹⁸ta dzaj tu yóokolo'ob a búuco'ob jadzutztac u boonlilo'ob, cu dzo'ocole' ta dzaj ti'ob in aceite yéetel in poom.

¹⁹Le waaj tin dzaj ca'ach ti' teche', beeta'an ca'ach yéetel u asab ma'alobil juuch', bey xan le aceite yéetel le caab iquil in tzéentilaquech ca'acho', ta kubaj ti'ob bey utzul qui'iboc ti'ibil óole'. Teen Yuumtzil, teen a'alic.

²⁰Cu dzo'ocole' ta ch'a'aj xan le j xibil paalal yéetel le x ch'upul paalal yanchaj ti' to'ono', ca ta quíimsajo'ob tu táan le beetbil kuob beyo'ob janalbe'en u ti'alo'obe'. ¿Jach wa jun p'íit ba'al a wilic úuchic a suticabáa x cáacbachil,

²¹u láak ba'ale', ta quíimsaj in paalal le ca ta kubaj u ti'al j quíimsbilo'ob tóocbil, ti' u tzicbe'enil beetbil kuobo'?

²²Yéetel a p'ecbe'en x cáacbach cuxtale' ma' tu ka'ajal ti' teech bix yanilech ca'ach ta chichanil, chacnulech, táan a sansanchaak ichil a ki'ikel.

²³Lela', teen Yuumtzil, teen a'alic: ¡Yaj a wanil! Cu dzo'ocole' tu yóokol tuláacal le kaaso'ob ta beetajo',

²⁴ta beetaj tuláacal tu'ux jáanil u cúuchilo'ob u ti'al a kultic beetbil kuob yéetel u ti'al a kubicabáa ti' a x cáacbachil.

²⁵Ti' tuláacal u xuul bejo'ob ta beetaj le cúuchilo'obo', ca tu sutaj a qui'ichpamil ti' p'ecbe'enil tumen ta kubaj a wíinclil ti' tuláacal máax cu káatal, ti' mantadz x cáacbachil.

²⁶Meyajnajech ti' x cáacbachil yéetel cajnáalo'ob ta tzéelo', leti' le j egipciob mu'uka'ataco'obo', ca ta p'u'ujsaj in dzíiquil tu yo'olal ma' ta p'atic a cáacbachil.

²⁷Teen túune' tin líikesaj in kab u ti'al in jadziquech: tin p'íitcuntaj ba'al a jaante ca tin kubaj a caajilo'ob ti' le j filisteob, máaxo'ob p'ectmailech, kuuxchaja'ano'ob xan tu yo'olal x ma' subtal cuxtal.

²⁸Ba'ale' bey ma' qui'imac a wóol yéetel tuláacal lelo', ta kubjabáa nupkebantal tu yéetel le j asiriobo': ba'ale' mix yéetel lelo' j náac a wóol.

²⁹Ma' je'elech ti' a x cáacbachil tu caajil Babilonia u lu'umil j máan coonolo'ob; mix bey j náac a wóolo'.

³⁰Teen Yuumtzile', teen a'alic: ¡Buca'aj koja'anil ca'ach yanil a pucsi'ikal u ti'al ca a beet le subtzil ba'alo'ob, cu beeta'al tumen jun túul x cáacbach co'olel mina'an u subtale'!

³¹Tu xuul tuláacal bej yéetel tuláacal tu'ux jáanile', ta beetaj jun p'éel u multuunil kultaj u ti'al a kultic a beetbil kuob yéetel u ti'al a kubicabáa ti' a x cáacbachil. Ba'ale' teche' ma' ta beetic ca'ach je'el bix u beetic le x cáacbacho'obo': ¡Teche', ma'atech a káatic ca'ach ca bo'ota'aquech!

³²Co'olel cu kexic u yíichame', cu kamic jela'an j xiibo'ob.

³³Ti' tuláacal x cáacbache' cu dza'abal jun p'éel bo'ol; ba'ale' teech ca'ache', teech dzáic siibalo'ob ti' a weeyo'ob, ca bo'otico'ob u ti'al ca talaco'ob ti' jejeláas cúuchilo'ob u ti'al u nupkebano'ob ta wéetel.

³⁴Ti' a x cáacbachile', jela'an ba'ax ta beetaj ti' ba'ax cu beetico'ob u láak co'olelo'ob: mix máac caxtiquech u ti'al nup keban, mix tu bo'otiquecho'ob, ba'ale' teech bo'otico'ob. ¡Chéen le a jela'anil ti'obo'!

³⁵Le t o'olale' x cáacbach co'olel u'uy ba'ax quin wa'alic:

³⁶Teen Yuumtzil, teen a'alic ti' teech: Teche' dzo'oc a we'esicabáa a wíinclil x ma' subtal u ti'al a kubicabáa ti' nup keban tu yéetel a weeyo'ob bey xan tu yéetel a p'ecbe'en beetbil kuobo', cu dzo'ocole' ta wecaj u ki'ikel a paalal, ta kubajo'ob quíimsbilo'obo'.

³⁷Le t o'olal tene', bin in ca'aj in láaj much'quint a weeyo'ob le ta qui'imaccunsaj u yóolo'obo', tuláacal le ta yaabiltajo'obo', bey xan le ta p'ectajo'obo'; bíin in much'quinto'ob u ti'al ca in jach chacnulquint a wíinclil tu táano'ob u ti'al ca u yilecho'ob.

³⁸Bíin in p'is óoltech tu yo'olal a nup keban bey xan tu yo'olal a quíimsaj wíiniquil, bíin in kubech u ti'al j quíimil tu yo'olal p'uja'ane'en úuchic xúunp'attiquen.

³⁹Bíin in p'atech tu kabo'ob u ti'al ca u kascunto'ob u cúuchilo'ob a x cáacbachil yéetel tu'ux ca kultic a beetbil kuob. Bíin u cóocotzpayto'ob a búuco'ob yéetel le ba'alo'ob a jadzutzquintmaba'o', bíin u p'atecho'ob jach chacnulech.

⁴⁰Bíin líiksa'ac le caaj ta wóokolo', bíin u quíimsecho'ob tu yéetel ch'iin, bíin u quíimsecho'ob tu yéetel u máascabo'ob.

⁴¹Bíin tóoca'ac a najilo'ob bíin xotkinta'aquech xan tu táan ya'abcach x co'olelo'ob. Bíin in beet u xu'ulul a x cáacbachil, ma' bíin a ca'a bo'ot a weeyo'obi'.

⁴²In p'uja'anil ti' teche' bíin xu'uluc, bíin tu'ubuc ti' teen úuchic a kexiquen; bíin jéedzec in wóol, bíin jáawac in kuuxil.

⁴³J tu'ub ti' teech bixech ca'ach ta x lo'obaynil, ta kuuxquintajen tu yéetel tuláacal ba'axo'ob ta beetaj x ma' subtalil, p'ecbe'eno'ob xan; le t o'olal tene', bíin in jadzech tu yo'olal le ba'axo'ob ta beetajo'. Teen Yuumtzil, teen a'alic.

⁴⁴Tuláacal máaxo'ob utz tu xiquino'ob u ya'alico'ob mejen ca'anbesajo'obe', bíin u ya'alo'ob ta wo'olal: je'el bix le maamao' bey u x ch'upul paal.

⁴⁵Teche' u x ch'upul paalech jun túul maama u p'ecmaj ca'ach u yíicham yéetel u paalal, a quiic yéetel a wíidzine' u p'ecmajo'ob xan u yíichamo'ob, u p'ectmaj xan u paalalo'ob. A maamaexe', x itita ca'achi, a taataexe' j amorreo.

⁴⁶J xaman ca'ach yaan a quiic, lelo' Samaria yéetel u péet caajilo'ob; j noojole' ti' yaan ca'ach a wíidzini', lelo' Sodoma yéetel u péet caajilo'ob xan.

⁴⁷Teche' canbalnajech ti' leti'ob, ta beetaj le p'ecbe'en ba'alo'ob tu beetajo'obo'. Bey ma' qui'imacchaj a wóol tu yéetel le ba'alo'obo', ta beetaj u asab kaastaquilo'ob.

⁴⁸Teen Yuumtzil, teen jalach t'antic tu yo'olal in cuxtal: mix Sodoma a wíidzin yéetel u péet caajilo'ob j beet ba'axo'ob ca beetic teech yéetel a péet caajilo'ob.

⁴⁹Je'el u keban a wíidzin Sodomaa': leti' yéetel u péet caajilo'obe' cu yu'ubicuba'ob nonoj ba'alo'ob tu yo'olal sen yanchaj ba'al u jaanto'ob yéetel sen ayikalchajo'ob, ba'ale' mix jun téen tu yáantajo'ob máax óotzil yéetel máax yaj u yanil.

⁵⁰Ca'analchaj u yicho'obe' ca tu beetajo'ob ba'alo'ob in p'ectmaj; let o'olal tin xu'ulsajo'ob je'el bix ta wilajo'.

⁵¹Wa tu yo'olal Samariae', ma' tu beetaj mix táancoch ti' a kebano'obi'. Teche' dzo'oc a beetic asab ya'ab p'ecbe'en ba'alo'ob, ti' le tu beetajo'obo'; ta tzéele' beyo'ob x ma' si'ipile'.

⁵²Teche' bíin a mukyajt u jaadzil, tumen ta beetaj asab p'ecbe'en kebano'ob ti' le tu beetajo'obo', j p'áato'ob bey mina'an u si'ipilo'obe'. Teche' yaan a mukyajtic le sublaquilo', yaan a mukyajtic a manba'alcunta'al, tumen ta beetaj u p'áatal bey mina'an u si'ipilo'ob a quiic bey a wíidzin.

⁵³Tene' bíin in ca'aj in beet u suut u ayikalil sodoma yéetel Samaria bey xan ti' u x péet caajilo'ob; bíin xan in sut ti' teech a ayikalil,

⁵⁴ba'ale' táanile' u najmal in t'ona'anquintiquech yéetel in sublaccuntiquech tu yo'olal ba'ax ta beetaj, bíin qui'imacchajac u yóolo'ob le quéen u yilo'ob ba'ax cu yúuchul ti' techo'.

⁵⁵Le quéen utzquinta'ac Sodoma yéetel Samaria pa'ate' yéetel u x péet caajilo'ob je'el bixo'ob ca'ache', bíin xan utzquinta'aquech pa'ate' yéetel a x péet caajilo'ob je'el bix ca'ache'.

⁵⁶Teche' ta che'ejtaj ca'ach u jaadzil Sodoma a wíidzin, le táan a wu'uyicabáa ca'anal ca'ach a wiche'

⁵⁷tumen ma'ili' chíicpajac ca'ach a kasa'anile'; ba'ale' bejela'e' u caajilo'ob le j edomitaob yéetel j filisteobe', bey xan tuláacal le cajnáalo'ob ta tzéele', cu poch'iquecho'ob: ¡Tuláacal yóokolcaab cu sutic u paach ti' teech!

⁵⁸Bejela'e', yaan a mukyajtic u jaadzil le ba'axo'ob kaastaco'ob ta beetajo'. Teen Yuumtzil, teen a'alic.

⁵⁹Teen Yuumtzil, tene' quin wa'alic: Bin in ca'aj in dzáa ti' teech ba'ax ca najmatic, tumen teche' ma' ta dzo'ocbesaj a jalach t'aani', ta manba'alcuntaj a nup t'aan.

⁶⁰Ba'ale' ti' tene' bíin ka'ajac le nup t'aan tin beetaj ta wéetel, ta x lo'obayanile', bíin in beet ta wéetel jun p'éel nup t'aan u ti'al kiino'ob mina'an u xuul.

⁶¹Le quéen in dzáa ti' teech bey a x ch'upul paalal, a quiic yéetel a wíidzin, quex tumen ma' in wa'almaj ichil in nup t'aan in beetic beyo', bíin ka'ajac ti' teech a wúuchben cuxtal u ti'al ca sublacchajaquech.

⁶²Tene' bíin in beet tu ca'a teen in nup t'aan ta wéetel, u ti'al ca a kaj óolt teen Yuumtzilen.

⁶³Teche' bíin ka'ajac ti' teech u ti'al ca sen sublacchajaquech yéetel ca a t'ona'anquintabáa u ti'al u p'áatal maacal a chi', le quéen in sa'ats a si'ipil ti' tuláacal ba'axo'ob ta beetaje'. Teen Yuumtzil teen a'alic.