Read Yucateco Ezequiel 17 Bible Online

Ezequiel 17 - Yucateco bible

Ezequiel 17

¹Yuumtzile' tu t'anajen ca tu ya'alaj ti' teen:

²Wíinic, teche', tzicbalt ti' Israel le queet t'aana'.

³A'al ti'ob: Je'el ba'ax cu ya'alic Yuumtzila': Jun túul nojoch j cóot kuch Líbano'; u xiiko'obe' nuuctac ca'achi, nojoch u xíit'il xan, piim u kukmelo'ob jejeláas u boonlilo'ob. Tu machaj u yóol jun cúul kuulche'e',

⁴ca tu ch'acaj u asab ca'analil u kabe', ca j bin u pak tu lu'umil j coonolo'ob, ti' jun p'éel caaj tu'ux yaan ya'ab coonolo'obi'.

⁵Cu dzo'ocole' tu ch'a'aj te j lu'umo' jun p'éel neek ca tu pakaj ti' jun p'éel lu'um yaan u pakalilo'obi', tu jáal jun p'éel u t'o'ol ja', tu'ux yaan ya'ab ja'.

⁶Le neeko' jóok u wi' ca suunaj jun cúul uva cocojqui u le'; quex tumen ma' ca'anale', tu tojtáantaj tu'ux yaan le j cóoto', ca'aliquil táan u tabic u mootzo'ob j lu'ume'. J suunaj jun cúul uva; jóok u yóolo'ob yéetel u kabo'ob.

⁷Ba'ale' yaan ca'ach u láak jun túul táaj nojoch j cóot sen nuuctac u xiiko'ob yéetel piim u kukmel. Le uva túuno' tu jayaj u mootzo'ob yéetel u kabo'ob tu tojil le j cóoto', u ti'al ca dza'abac u láak ja' ti', náach tu'ux paka'an ca'acho'.

⁸Ba'ale' leti'e' paka'an ca'ach ti' ma'alob lu'um, tu jáal ya'abcach ja', tu'ux cu páajtal u jayic u kabo'ob yéetel u yichanquil yéetel u ti'al u suut jun cúul x qui'ichpam uva.

⁹A'al ti'ob túun tin kaaba': Je'el ba'ax cu ya'alic Yuumtzila': Le u pakaltbil uva ma' bíin yanac u yichi'. Le yáax jun túul j cóoto', leti' bíin joquic u mootzo'ob, u ti'al beetic u lúubul u yicho'ob; chéen yéetel jun p'íit muuk bey xan yéetel jun p'íit máaco'ob bíin u joc tu mootz, bíin láaj tijic u túumben ku'uko'ob.

¹⁰Quex ca'a xa'abaque' ma' bíin jóokoc u ku'uko'obi'; bíin tijic le quéen picta'ac tumen j lakin iik; bíin tijic tu cúuchil tu'ux unaj u jóokol u yóol.

¹¹Yuumtzile' tu t'anajene' ca tu ya'alaj ti' teen:

¹²Káat chi'it ti' le j ma' tzic t'aan caajo' wa u yojelo'ob ba'ax u káat u ya'al le queet t'aana'. A'al ti'ob: U ajawil babiloniae', j taal Jerusalene', ca tu machaj u ti'al u kal u ajawil judá yéetel u nuuquil u aj meyajo'ob, ca tu bisláantajo'ob Babilonia.

¹³Cu dzo'ocole' tu ch'a'aj jun túul noj paal sijnal ti' u cajnáalilo'ob ajaw, ca tu beetaj jun p'éel nup t'aan tu yéetele', ca tu beetaj u jalach t'anta'al ma' bíin p'a'ataqui', ca tu bisaj u dzuulilo'ob le múuch' caajo'obo',

¹⁴u ti'al u p'atic x ma' muukil u ajawil Judá, ma' tu páajtal u líikil tu juunali', quex u yóolt yéetel ca u p'isubáa u dzo'ocbes le nup t'aano'.

¹⁵Ba'ale' le j xi'ipala' j líik tu yóokol u ajawil Babiloniae', ca tu túuxtaj aj bisaj t'aano'ob ti' Egipto u ti'al u káatic ya'abcach tzíimino'ob yéetel ya'abcach máaco'ob. ¿Cu dzo'ocol u beetic tuláacal le je'elo' ca tucultique'ex je'el u páajtal u púudzul cuxa'ane'? ¿Je'el wa u púudzul cuxa'an jun túul máac ma' tu dzo'ocbesic jun p'éel nup t'aane'?

¹⁶Teen Yuumtzil, tene' quin jalach t'antic, bíin quíimic Babilonia le máax manba'alcunt le jalach t'aan tu beetaj yéetel le ajaw dzáa tu jalach káanche'o'.

¹⁷Le quéen ba'atelta'ac tumen u ajawil Babilonia u ti'al u beeta'al níixo'ob tu tuulumilo'ob tu bakpach le caaj yéetel le quéen u quíims ya'abcach máaco'obe', faraone' ma' bíin u túuxt jun p'éel u asab nojochil mu'uka'an aj ba'atelo'obi',

¹⁸tumen tu manba'alcuntaj u jalach t'aan; tu ya'alaj u dzo'ocbesico'ob, ba'ale' dzo'oc u beetic yaanal ba'al. Let o'olal ma' bíin páatac u jóokol cuxa'ani.

¹⁹Teen Yuumtzil, teen jalach t'antic yéetel in cuxtal: leti'e' tu che'ejtaj le jalach t'aan tu beetaj ti' teno', ma' tu dzo'ocbesaj le nup t'aan tu beetaj tin wéetelo'; let o'olalo' tene' bin in ca'aj in beet u cáantic ba'ax tu beetaj.

²⁰Bíin in ca'aj in pul tu yóokol u káanil in léech, u ti'al in léechtic; bíin in bis Babilonia, ti' bíin in p'is óolti' úuchic u kexiquen.

²¹U asab ma'alobil u aj ba'atelo'obe' bíin quíimico'ob ich ba'atel, le bíin u jecho'ob le quíimilo' bíin bisa'aco'ob ki'itbesbil tu can ti'itzil lu'um. Te'exe' bíin a kaj óolte'ex túun tene', Yuumtzilen, teen j t'aanajen.

²²Teen Yuumtzil, teen a'alic: Tene' bin in ca'aj xan in ch'a'a u asab ca'analil u ni' le kuulche'o'; bíin in joc u muumun ku'uk u jach ca'anal kabo', jach teen, tin kabil bíin in pak ti' jun p'éel pu'uc asab ca'anal,

²³tu asab ca'anal pu'uquil Israel. Bíin ya'abchajac u kabo'ob, bíin yanac u yich, bíin suunac táaj nojoch kuulche'il. U jejeláasil ba'alche'ob bíin cajlaco'ob tu yáanal, bey u jejeláasil ch'íich'o'ob bíin u beeto'ob u ku'ob tu bo'oy yéetel tu kabo'ob.

²⁴Tuláacal u che'ilo'ob káax bíin u yojéelto'ob teen Yuumtzilen. Teen lúubsic le j ca'anal ich che'o', teen beetic u nojochtal le chan che'o'. Teen beetic u tijil le ya'ax che'o', teen xan beetic u ya'axtal le j tiquin che'o'. Teen yuumtzil, teen a'alic teen dzo'ocbesic.