Read Yucateco Ezequiel 18 Bible Online

Ezequiel 18 - Yucateco bible

Ezequiel 18

¹Yuumtzile' tu t'anajene' ca tu ya'alaj ti' teen:

²¿Ba'axten ma' tu jáawal u ya'alal tu lu'umil Israel le p'is t'aan cu ya'alic beya': Le taataobo', leti'ob jaantic su'udz uvaob, ba'ale' ti' u paalalo'ob cu tza'ayal u cha'aj cojil?

³Teen Yuumtzil, teen jalach t'antic tu yo'olal in cuxtal, mix bikin bíin a ca'a a'ale'ex le p'is t'aana' tu lu'umil Israel.

⁴In ti'al tuláacal wíinic, in ti'al le taatao', bey xan u paal. Le máax cu kebanchajle' leti' bíin quíimic.

⁵Máax toj u cuxtale' leti' beetic ba'ax ti'ibil yéetel ba'ax toj:

⁶ma' tu táacpajac ti' noj janalo'ob cu beeta'alo'ob te tu jo'ol lu'umo'ob u ti'al u tzi'iquil le beetbil kuobo' mix tu kub u yóolal ti' u tuusil kuob Israel; ma' tu toquic u yatan u láak máac mix teech u nupicubáa yéetel u yatan tu kiinilo'ob u yilic u nook;

⁷ma' teech u yedzic mix máac; ba'ale' cu sutic ti' máax p'axmail le ba'ax tu ch'a'aj u ti'al u chíiculal le p'aaxo'; ma' teech u yoclic mix máac; cu queetlan jaantic u yo'och waaj yéetel máax wi'ij, cu dzáic u nook le máax chacnulo',

⁸ma' teech u dzáic taakin majnil yaan u tip'a'an bo'olal, mix teech u tzáic ca bo'ota'ac ti' u tip'a'anil p'aax; ma' teech u beetic loob ti' mix máac; tu kiinil u beetic p'is óol ti' ca'a túul máaco'obe' cu beetic tu beel;

⁹cu cuxtal je'el bix u ya'alic in wa'almaj t'aano'obe', cu dzo'ocbesic jach tu beel in nu'ucbe'en t'aano'ob. Le máaco' jach toj u cuxtal, let o'olal bíin cuxlac. Teen Yuumtzil, teen a'alic.

¹⁰Ba'ale' wa jun túul máac cu yantal jun túul u paal cu meyaj loob yéetel wa cu beetic je'el ba'axac ti' le ba'alo'ob

¹¹ma' j beeta'ab tumen u taatae', tumen cu bin janal ti' le noj janalo'ob cu beeta'alo'ob ti' le jo'ol lu'umo'ob u ti'al u tzi'iquil le beetbil kuob, cu toquic u yatan u yéet xiibil,

¹²cu yedzic máax óotzil yéetel máax mix ba'al yaan ti', cu yocoltic ba'ax yaan ti' u láak máac, ma' teech u sutic ti' máaxo'ob p'axmail ca'ach le ba'ax tu ch'a'aj u ti'al u chíicult u bo'olal le p'aaxo', cu dzáic u yocsaj óolil ti' ma' jaajil kuob yéetel cu beetic ba'axo'ob ma' tojtaco'obi',

¹³bey xan cu dzáic taakin p'axbil u ti'al u tzáic u tip'a'anilo'ob: le wíinico' ma' bíin páatac u p'áatal cuxa'ani'. Le quéen dzo'ococ u beetic tuláacal le ba'axo'ob in p'ecmajo', mix ba'al u láak je'el u páajtal u beeta'ale', le máaco' yaan u quíimil, leti' xan bíin u cuch u si'ipilil u quíimil.

¹⁴Ba'ale' le máaca', je'el xan u páajtal u yantal jun túul u paal ca u yil tuláacal ba'ax cu beetic u taatae', ba'ale' leti'e' ma' tu beetic ba'ax cu beetic u taata;

¹⁵u káat u ya'ale' leti'e'; ma' tu bin janal ti' le noj janalo'ob cu beeta'alo'ob te jo'ol lu'umo'ob u ti'al u tzi'iquil le beetbil kuobo', mix tu yocsic u yóol ti' u ma' jaaj kuob Israelo'; ma' teech u toquic u yatan u yéet j xibil,

¹⁶ma' teech u yedzic mix máac, mix teech u tzáic ca dza'abac u chíiculal u dzaa p'aax, ma' teech u yocoltic mix máac; ba'ale' cu queet jaantic u yo'och waaj yéetel máax wi'ij yéetel cu dzáic nook ti' máax chacnul;

¹⁷ma' teech u beetic loob ti' mix máac, mix teech u dzáic taakin p'axbil u ti'al u bo'ota'al u tip'a'anil ti'; yéetel cu dzo'ocbesic in wa'almaj t'aano'ob u ti'al u beetic ba'axo'ob in wa'almaj: Le wíinico' ma' bíin quíimic tu yo'olal u kebano'ob u taatai'. Leti'e' bíin cuxlac.

¹⁸U taatae' tu beetjubáa jun túul j yedz wíinic, j oocolnaj tu beetaj xan ba'ax kaas ichil u caajale', bíin quíimic tu yo'olal u xot kiinil u kebano'ob.

¹⁹Te'exe' bíin a káat chi'ite'ex: ¿Ba'axten ma' tu bo'otic xan le paal u kebano'ob u taata? tumen le paalo' tu beetaj ba'ax toj yéetel utz, tu béeycuntaj yéetel tu dzo'ocbesaj tuláacal in wa'almaj t'aano'ob: tu yo'olal lelo', bíin cuxlac.

²⁰Chéen le máax cu kebantal bíin quíimico', mix le paal bíin bo'olnac tu yo'olal u kebano'ob u taata, mix le taata bíin bo'olnac tu yo'olal u kebano'ob u paal. Le aj ti'ibilo' bíin u kam u bo'olal u ti'ibil cuxtal, le loolob máaco' bíin u kam u bo'olal u loolob wíiniquil.

²¹Wa le j loolob wíinic cu náachtal ti' u kebano'ob u ti'al u dzo'ocbesic in wa'almaj t'aano'ob tu yo'olal u beetic ba'ax toj yéetel tu beele', tu jaajile', bíin p'áatac cuxa'an, ma' bíin quíimiqui'.

²²Tene' ma' bíin ca'a ka'ajac ti' teen le loobo'ob u beetmajo', leti'e' bíin p'áatac cuxa'an tu yo'olal le ba'ax toj cu beetico'.

²³Tene' ma' in káat ca quíimic le j loolob máaco', tene' in káat ca u kex u cuxtal tu yo'olal u p'áatal cuxa'an. Teen Yuumtzil, teen a'alic.

²⁴Ba'ale' wa le aj ti'ibil bej cu p'atic u toj cuxtal u ti'al u beetic tuláacal ba'ax kaas yéetel p'ecbe'en je'el bix le cu beetic le j loolob máaco', ¿táan wa a tucultique'ex je'el u páajtal u p'áatal cuxa'ane'? Tene' ma' bíin ka'ajes tuláacal le ba'ax toj tu beetajo': bíin quíimic tu yo'olal u kex óolal yéetel u kebano'ob.

²⁵Te'exe' bíin a wa'ale'ex ma' toj ba'axo'ob quin beetiqui'; ba'ale' u caajil israel u'uye'ex le t'aana', ¿táan a tucultique'ex ma' toj ba'ax quin beetiqui'? ¿Ma' wa te'ex beetic ba'ax kaasi'?

²⁶Wa le aj ti'ibil bej cu p'atic u beetic ba'ax utz cu beetic ba'ax kaase', bíin quíimic tu yo'olal u si'ipil u kaakas cuxtal.

²⁷Ba'ale' wa le j loolob máac cu p'atic u loolob cuxtal cu beetic ba'ax toj, bíin u toc u cuxtal.

²⁸Wa cu p'ilic u yicho'ob cu xúunp'attic tuláacal le loobilo'ob u beetmajo'ob ca'ache', tu jaajile', bíin cuxlac, ma' bíin quíimiqui'.

²⁹Ba'ale' u caajil Israele' bíin u ya'al ma' toj ba'ax quin beetiqui'. ¿Ma' toj ba'ax quin beetiqui'? ¿Ma' wa u caajil Israel beetic ba'ax ma' toji'?

³⁰J israelitaex, teen p'is óoltique'ex ta jujun túulile'ex je'el bix cu najmatic ba'ax ca beetique'exe'. Teen Yuumtzil, teen a'alic. Xúup'ajte'ex jun puli' a loobile'ex tu yo'olal ma' a si'ipilchajle'ex u ti'al ca xu'ulsa'aque'ex.

³¹Tzelaba'ex ichil tuláacal le loobo'ob dzo'oc a beetique'ex ti' teno', ca a túumbencunte'ex a pucsi'ikale'ex yéetel a cuxtale'ex. ¿Ba'ax o'olal bíin quíimiquech u caajil Israel,

³²wa teen ma' in káat ca quíimic mix máaqui? Tzelaba'ex ichil le loobo', beyo' cuxlaque'ex. Teen Yuumtzil. Teen a'alic.