Read Yucateco Ezequiel 19 Bible Online

Ezequiel 19 - Yucateco bible

Ezequiel 19

¹Wíinic, teche', kay le u yokom kaayil quíimila' ti' u ajawilo'ob Israel:

²A maamae' jun túul x leóna cajnáal ca'ach ich léono'ob. Tu beetaj u saajcab ichilo'ob, ti' tu tzéentaj u mejenilo'obi'.

³Yaan jun túul ichilo'obe' tu dzaj u yóol u nojochquintic tac u nojoch ba'alche'etal. Tu canaj u xe'exe'et' le ba'ax cu lúubul tu kabe', cu lukic tac wíinico'ob.

⁴Le múuch' caajo'obo' tu yu'ubajo'ob u tzicbalil; tu léechtajo'ob ti' jun p'éel léech, ca jíilta'abo'ob yéetel x jookobo'ob tac tu lu'umil Egipto.

⁵Le ca tu yilaj le x leóna dzo'oc u jach lukesa'al u alab óolale', tu ch'a'aj u láak u mejnile' ca tu yáantaj u ti'al ca nojochchajac.

⁶Le ca nojoch leónchaje', xi'ic u bin u sutul suut ichil leóno'ob. Tu canaj u xe'exe'et' ba'ax cu lúubul tu kab, tu canaj xan u jaant wíinico'ob.

⁷Cu beetic nucuch loobo'ob ich jalach najo'ob cu kascuntic xan caajo'ob ca'achi; yéetel u jéencal ca'ache' cu beetic u quiquilanquil tuláacal u yóokol caab.

⁸Líiksa'ab túun tu yóokol le caajo'ob yano'ob tu bak pacho'obo'; ca tu jayajo'ob u léecho'ob ca tu beetajo'ob u lúubul ichil.

⁹Yéetel jookobo'ob j ka'al ichil jun p'éel so'oy, ca j bisa'ab ti' u ajawil Babilonia; te'elo' oquesa'ab ichil jun p'éel x kalab naj, u ti'al ma' u suut u'uybil u jéencal tumen mix máac tu yóokol u pu'uquilo'ob Israel.

¹⁰A maamae' bey ca'ach jun cúul uva paka'an tu jáal ja'e', sen piim u yicho'ob ya'axkale'en xan u le'ob tu yo'olal cu sen jóoyabta'al.

¹¹Tu yo'olal sen mu'uka'anchaj u kabo'ob j kucho'ob j meyaj xóolte'il ti' ajawo'ob, tu yo'olal sen ca'analchajique' j kuch tac ichil múuyalo'ob. Jach ilajbe'en tu yo'olal u ca'analil yéetel tu yo'olal u ya'axkale'enil u le'ob.

¹²Ba'ale' j yúuyunta'ab tac ca j jo'oquij, ca j pu'ul j lu'um. J lakin iik j tiquincunte, ca j lúub u uvailo'ob; láaj tij u poloc kabo'ob, ca j láaj tóoca'abo'ob.

¹³Bejela'e' ti' paka'an te x tocoy lu'umo', jun p'éel tiquin lu'um séeb u sap'ic ja'.

¹⁴Ti' u kabo'obe' cu jóokol jun p'éel káak cu jáay tóoquic u yóolo'ob yéetel u yicho'ob. Bejela'e' mina'an u mu'uka'an kabo'ob p'aatal ca meyajnac u ti'al u xóolte' ajawo'ob. (Lela' jun p'éel u okom kaayil quíimil, bey bíin ka'ayac, u ti'al u okom kaayil quíimil.)