Read Yucateco Ezequiel 2 Bible Online

Ezequiel 2 - Yucateco bible

Ezequiel 2

¹Cu dzo'ocole' tin wu'uyaj jun p'éel t'aan cu ya'alic ti' teen: J xiib[1] teche' wa'alen, tumen yaan ba'ax kabéet in wa'alic ti' teech.

²Ca'aliquil táan in wu'uyic le t'aano', j ooc u páajtalil Ku ti' tene' ca tu beetaj in wa'atal. Ca túun tin wu'uyaj le t'aan cu t'aniqueno'

³táan u ya'alic ti' teen: J xiib, teche', bin in ca'aj in túuxtech ti' le j israelitaobo', le caaj ma' j u'uyaj t'aan, dzíic u dzicuba'ob tin táan. Leti'ob yéetel u máanja'an ch'i'ibalo'obe' tac bejela'e' ma' tu tziquico'ob in t'aan.

⁴U paalalo'ob xane' j ma' tzic t'aano'ob dzu'uy xan u poolo'ob. Bin in ca'aj in túuxtech ti'ob u ti'al ca a wa'al ti'ob beya': Je'el ba'ax cu ya'alic Yuumtzila'.

⁵U yu'ubo'ob a t'aan, wa ma', tumen wíinico'ob u ma' tziico'ob ti' in t'aan, bíin u yojéelto'ob yaan aj bóobat ichilo'ob.

⁶J xiib teche' ma' a sajactal ti'ob mix yo'olal ba'ax bíin u ya'alo'ob ti' teech, mix ca cajlaquech bakpachta'aquech tumen ki'ixo'ob wa ca cajlaquech ichil síina'ano'obe'. Ma' a sajacchajal ti' ba'ax bíin u ya'alo'ob, mix u ja'akal a wóol ti' u dzíidzic icho'ob, quex tumen sen dzíic u dzicuba'ob.

⁷Teche' a'al in t'aano'ob ti'ob, je'el bixaque' ca u yu'ubo'ob in táan wa ma' tumen sen dzíic u dzáicuba'ob.

⁸U'uy ma'alob tuláacal ba'ax quin wa'alic ti' teech, ma' a dzíictal tin táan je'el bixo'obo'. Jap a chi' u ti'al a jaantic ba'ax bíin in dzáa ti' teech.

⁹Tin wilaj túun jun p'éel kab tich'a'an tin tojil, u machmaj jun p'éel dzíibil ju'un codza'an.

¹⁰Le kabo' tu chóolaj le ju'un tíin táano'. Dzíibta'an ca'ach tu ca'a tzéelil: u dzíibilo'ob okol t'aano'ob, ki'inamilo'ob yéetel u t'aanilo'ob jaadzo'ob.