Read Yucateco Ezequiel 20 Bible Online

Ezequiel 20 - Yucateco bible

Ezequiel 20

¹Tu diez kiinil ti' u cinco winalil ti' u siete ja'abile', dze'edzec ti' u nuuquilo'ob Israel j bino'ob káat chi' ti' Yuumtzile', ca j culajo'ob actáan ti' teen.

²Yuumtzile' tu t'anajene' ca tu ya'alaj ti' teen:

³Wíinic, teche' t'aan u nuuquilo'ob Israele' ca a wa'al ti'ob: Je'el ba'ax cu ya'alic Yuumtzila': ¿Táan a taale'ex a káat chi'itene'ex? Teen Yuumtzile' quin jalach t'antic tu yo'olal in cuxtal ma' bíin in cha'a a káat chi'itquene'exi'.

⁴Wíinic, p'is óolto'ob teech; p'is óolto'ob teech, ca a beet u yilico'ob le p'ecbe'en ba'alo'ob tu beetajo'ob u taataobo'.

⁵A'al ti'ob: Je'el ba'ax cu ya'alic Yuumtzila': Le ca tin yéeyaj Israele', tin beetaj jun p'éel jalach t'aan ti' u ch'i'ibalo'obe', ca tin dzajimbáa u kaj óolteno'ob. Chéen tin jalach t'antaj ti'obe'. Teen Yuumtzilen, u Junab Kueno'ob.

⁶Ti' le kiino' tin wa'alaj ti'ob bíin in jóokeso'ob Egipto u ti'al ca in biso'ob ti' le lu'um dzo'oc in caxtic u ti'alinto'obo', jun p'éel lu'um tu'ux cu yáalcab leche yéetel caab bey u yáalcab ja'e', ¡u asab qui'ichquelmil lu'umo'ob yaan ti' tuláacal lu'umo'ob!

⁷Ti' tuláacalo'ob tin wa'alaj ca u pulo'ob u p'ecbe'en kuob yéetel ma' u kascunticuba'ob yéetel u beetbil kuilo'ob Egipto, tumen Tene', Yuumtzilen, tene' a Junab Kuene'ex.

⁸Ba'ale' leti'obe' ma' tu tzicajo'ob in t'ani', ma' tu yóoltajo'ob u ch'en xiquinteno'obi'; ma' tu pulajo'ob u p'ecbe'en kuobi', mix tu xúunp'attajo'ob u beetbil kuilo'ob Egiptoi'. Tene' tin wóoltaj in láal in p'uja'anil tu yóokolo'ob, yéetel in jadzico'ob tu lu'umil Egipto tac u quéen jóomoc u yóol in p'uja'anil.

⁹Ba'ale' tene' tin beetaj tu yo'olal u tzicbe'enil in kaaba', u ti'al ma' in p'áatal kaasil tu yich le múuch' caajo'ob tu'ux cajnáalo'ob ca'ach tu chúumuco'obo', tumen tu táan le múuch' caajo'obo' tin dzajimbáa u kaj óolteno'ob, ca tin dzaj u t'aanil in jóokesico'ob Egipto.

¹⁰Tene' tin jóokesajo'ob Egiptoe', ca tin bisajo'ob x tocoy lu'um;

¹¹te'elo' tin dzaj ti'ob u kaj óolto'ob in nu'ucbe'en t'aano'ob cu dzáic cuxtal ti' máaxo'ob dzo'ocbesic.

¹²Tin dzáa xan u yojéelto'ob in sábado'ob, u ti'al u béeytal jun p'éel chíiculal ichilo'on, teen, yéetelo'ob, jun p'éel u ka'ajsajil Teen, Yuumtzilen, máax jun páaycunto'ob in ti'alinto'ob.

¹³Ba'ale' leti'obe' líiko'ob tin wóokol te x tocoy lu'umo', ma' tu dzo'ocbesajo'ob in wa'almaj t'aano'obi'; tu manba'alcuntajo'ob le nu'ucbe'en t'aano'ob tin dzaj ti'ob u ti'al u dzo'ocbeso'ob tu' yo'olal u yantal cuxtal ti'obo', yéetel tu jach manba'alcuntajo'ob in sábado'ob. Tin tucultaj túun in láalic in p'uja'anil tu yóokolo'ob u ti'al in xu'ulsico'ob jun puli' te x tocoy lu'umo',

¹⁴ba'ale' tu yo'olal u tzicbe'enil in kaaba'e' ma' tin beetaj beyo', u ti'al ma' in p'áatal kaasil tu táan le múuch' caajo'ob tu yilajo'ob bix úuchic in jóokesico'ob Egiptoo'.

¹⁵Bey xan te x tocoy lu'umo', tin jalach t'antaj ti'ob ma' bíin in beet u yocolo'ob ti' le lu'umo'ob dzo'oc ca'ach in dzáic ti'obo', u asab qui'ichquelmil ti' tuláacal, tu'ux cu yáalcab leche yéetel caab bey u yáalcab ja'e',

¹⁶tumen tu kex óoltajo'ob in nu'ucbe'en t'aano'ob, ma' tu yu'ubaj t'antajo'ob in wa'almaj t'aano'obi', tu manba'alcuntajo'ob in sábado'ob, tumen u pucsi'ikalo'obe' ti' ca'ach cu bin tu paach beetbil kuobe'.

¹⁷Ba'ale' yaachaj tin wóol in xu'ulsico'obe', ca j p'áat ma' tin mixba'alcuntaj te x tocoy lu'umo'.

¹⁸Tin wa'alaj túun ti' u paalalo'ob ma' u beetico'ob le ba'axo'ob a'ala'ab ti'ob tumen u taataob, mix u dzo'ocbesico'ob ba'axo'ob cu ya'ala'al ti'ob, mix xan u kascunticuba'ob tu yéetel beetbil kuob.

¹⁹Tin wa'alaj ti'ob: Teen Yuumtzilen a Junab Kuex. Láaj dzo'ocbese'ex in wa'almaj t'aano'ob bey xan tuláacal ba'axo'ob quin wa'alic,

²⁰quili'ichcunte'ex in sábado'ob, bey jun p'éel chíiculal ichilo'one'ex, teen ta wéetele'ex, beyo' bíin ojéelta'ac, teen Yuumtzil a Junab Kuex.

²¹Ba'ale' tac u paalalo'ob tu beetajo'ob ba'alo'ob tu chi'ichnacunseno'ob. Ma' tu yu'ubaj t'antajo'ob in wa'almaj t'aano'obi', mix tu dzo'ocbesajo'ob in nu'ucbe'en t'aano'ob cu dzáic cuxtal ti' máaxo'ob dzo'ocbesiqui', cu dzo'ocole' tu manba'alcuntajo'ob xan in sábado'ob. Tin tucultaj ca'ach in jedzic in p'uja'anil tu yóokolo'ob te x tocoy lu'um u ti'al u máan in p'uja'anilo',

²²ba'ale' tu yo'olal u tzicbe'enil in kaaba'e', ma' tin beetaj beyo', tu yo'olal ma' in p'áatal kaasil tu táan yich le múuch' caajo'ob tu yilajo'ob bix tin jóokesilaco'ob Egiptoo'.

²³Te x tocoy lu'umo' tin jalach t'antaj ti'ob bíin in ki'itbeso'ob ichil tuláacal múuch' caajo'ob,

²⁴tumen ma' tu dzo'ocbesajo'ob in nu'ucbe'en t'aano'obi', tu cúulpachcuntajo'ob in wa'almaj t'aano'ob, tu manba'alcuntajo'ob in sábado'ob, chéen yanchaj u yicho'ob u ti'al u beetbil kuob u taataob.

²⁵Yanchaj tac in dzáic ti'ob a'almaj t'aano'ob ma' patalo'obi', bey xan nu'ucbe'en t'aano'ob ma' nu'uca'ano'ob u ti'al u caxtico'ob u cuxtalo'obi'.

²⁶Tin cha'aj u kascunticuba'ob yéetel u ti'ibil óolalo'ob cu bisico'ob ti' u beetbil kuob, bey xan cu quíimsico'ob u yáax paalo'ob ich káak. Lelo' tin beetaj u ti'al u chu'upulo'ob tu yéetel sajaquil tu yo'olal u kaj óoltico'ob teen Yuumtzilen.

²⁷Wíinic, teche' a'al ti' le j israelitaob: Je'el ba'ax cu ya'alic Yuumtzila': A taataexe', dzo'oc xan u poch'iqueno'ob; tu kexajeno'ob xan.

²⁸Le ca tin woquesajo'ob ti' le lu'um tin jalach t'antaj in dzáic ti'obe', chéen úuchic u yilico'ob ca'ach jun p'éel chan jo'ol lu'um wa jun p'éel che' búucpaja'an u le'e', ti' cu kubico'ob u quíimsbil ba'alche'obi', cu kubico'ob xan u ti'ibil óolalo'ob u ti'al u poch'iqueno'ob, cu dzáico'ob u qui'iboc ja'ob yéetel cu wequico'ob u ti'ibil óolalilo'ob vino.

²⁹Tene' tin káat chi'itaj ti'ob: ¿Ba'ax manba'al kulnajil le tu'ux ca bine'ex bejela'o'? Ca j p'áat u kaaba'int Manba'al Kulnaj tac bejela'e'.

³⁰A'al ti' u caajil Israel: Je'el ba'ax cu ya'alic Yuumtzila': ¿Ba'ax o'olal a káate'ex a kascuntaba'ex je'el bix a máanja'an ch'i'ibale'exe'? ¿Ba'ax o'olal ca kexiquene'ex yéetel u kultajil le p'ekbe'en beetbil kuobo?

³¹Le quéen a bise'ex a ti'ibil óolale'ex yéetel le quéen a tóoque'ex a paalale'ex ich káake', te'exe' xi'ic u bin a kascunticaba'ex yéetel a beetbil kuex. ¿Beyo' j israelitaex a káate'ex j taal u ti'al a káat chi'ex ti' teen? Teen Yuumtzil, tene' quin jalach t'antic tu yo'olal in cuxtal ma' bíin in cha'a a káat chi'ex ti' teni'.

³²Dzo'oc u yocol ta poole'ex a beeticaba'ex je'el bix u láak u múuch' caajilo'ob u yóokolcaab cu kultico'ob che' yéetel tuuniche', ba'ale' ma' bíin úuchuc beyo'.

³³Teen Yuumtzilen, tene' quin jalach t'antic tu yo'olal in cuxtal, bíin in we'es in nojoch páajtalil u ti'al ca jaadznaquen yéetel in p'u'ujulil, bíin ajawnajquen ta wóokole'ex.

³⁴Tene' bíin xi'iquen in ch'a'ob ti' le jejeláas múuch' caajo'ob tu'ux ki'itpaja'ano'obo', u ti'al in much'quinto'ob, bíin we'es in nojoch páajtalil u ti'al in jaadz yéetel p'uja'anil.

³⁵Bíin in biso'ob tu x tocoy lu'umilo'ob le caajo'obo', queetlan ich bíin in t'aano'ob u ti'al in p'is óolto'ob, je'el bix tin beetaj ti' u taataob tu x tocoy lu'umil Egiptoe'. Teen Yuumtzil, teen a'alic.

³⁶

³⁷Tene' bíin in xakal ilte'ex je'el bix jun túul aj canan j taman cu xoquic u j tamano'obe', cu dzo'ocole' bíin in beet a dzo'ocbesique'ex le nup t'aano'.

³⁸Bíin in lukes ichile'ex le j ma' tzic t'aano'ob yéetel le aj caxan ba'atelo'obo', u ti'al ca in jóokese'ex ti' le táanxel lu'umil tu'ux cajnáale'ex bejela'o'; ba'ale' leti'obe' ma' bíin ococo'ob tu lu'umil Israeli. Bíin a kaj óolte'ex túun, teen Yuumtzilen.

³⁹U caajil israel je'el ba'ax cu ya'alic Yuumtzila': ¡Xeene'ex a kulte'ex a beetbil kuex! Ba'ale' cu dzo'ocole' te'exe' bíin a wu'uyaj t'antene'ex, ma' bíin suunaque'ex xan a manba'alcunte'ex in quili'ich kaaba'i' tu yo'olal a kubique'ex ti'ibil óolalo'ob tu yo'olal xan a kultique'ex beetbil kuobi'.

⁴⁰Tuláacal Israele' bíin u kulten tin quili'ich pu'uc, tu ca'anal witzil Israel, le yaan tin múuch' caajo'obo'. Teen Yuumtzil, teen a'alic. Ti' bíin in kame'ex yéetel qui'imac óoli'; te'elo' bíin in káat ti' te'ex ca a kube'ex ti' teen ti'ibil óolalo'ob ca a taase'ex xan ti' teen u yáax ich a joche'ex yéetel tuláacal ba'ax bíin ca jun páaycunte'ex ti' teen.

⁴¹Le quéen in jóokese'ex ti' le lu'umo'ob yéetel le múuch' caajo'ob tu'ux yane'ex bejela'a' u ti'al in much'quintique'exo', u ti'al in we'es in quili'ichil ichile'ex tu táan yich le caajo'obo', bíin in kam túun a qui'iboc ti'ibil óolale'ex.

⁴²Le quéen dzo'ococ in beetic a woocle'ex Israel, ti' le lu'umo'ob in séeb chi'itmaj ti' a máanja'an ch'i'ibale'exo', bíin túun a kaj óolte'ex teen Yuumtzilen.

⁴³Te'elo' bíin ka'ajac ti' te'ex tuláacal le p'ecbe'en ba'alo'ob ta beetaje'ex u ti'al a kascunticba'ex, bíin taacchajac a xeje'ex ta baatzile'ex tu yo'olal tuláacal le ba'ax kaas a beetmaje'exo'.

⁴⁴U caajil Israel, le quéen in wutzul t'ante'ex ma' je'el bix u najmatic a cuxtale'ex tu yo'olal u asab kaasil ba'axo'ob a beetmaje'ex, u ti'al u tziiquil in kaaba'e', bíin a kaj óolte'ex túun teen Yuumtzilen. Lelo' teen Yuumtzil, teen a'alic.

⁴⁵Yuumtzile' tu t'anajene' ca tu ya'alaj ti' teen:

⁴⁶Wíinic teche' sut a wich j noojol, ca t'aanaquech tu tojil; a'al tin kaaba' táan u taal jun p'éel jaadz tu yóokol u káaxilo'ob j noojol,

⁴⁷a'al ti': je'el ba'ax cu ya'alic Yuumtzila'. Tene' bin in ca'aj in t'ab ti' teech jun p'éel káak u ti'al u tóoquic tuláacal a che'ilo'ob áaktaco'ob yéetel le tiquino'obo'; le káaka' bíin elec x ma' tu'upulil yéetel bíin u tóoc u táan yich tuláacal a cajnáalilo'ob j noojol yéetel j xaman.

⁴⁸Tuláacal yóokolcaab bíin u yojéelt teen Yuumtzil máax t'abe. Le káako' ma' bíin tu'upuqui'.

⁴⁹Tene' tin núucaj ti': ¡In Yuumtzil, le wíinico'obo' táan u ya'alico'ob chéen táan a wa'alic ba'axo'ob ma' tu na'atalo'ob!