Read Yucateco Ezequiel 21 Bible Online

Ezequiel 21 - Yucateco bible

Ezequiel 21

¹Yuumtzil túune' tu t'anajene' ca tu ya'alaj ti' teen:

²Wíinic, teche' sutabáa tu tojil Jerusalén, ca wa'al ba'ax ma' utz u taal ti' u kulnaji'. T'aanen tin kaaba' ba'ax ma' utz taal ti' u lu'umilo'ob Israeli',

³ca a wa'al ti': Je'el ba'ax cu ya'alic Yuumtzila': Tene' bin in ca'aj in beetjinbáa a aj p'eec. Bin in ca'aj in jóokes in máascab ca'amat u yej u ti'al in quíimsic pa'ate' aj ti'ibil bejo'ob yéetel aj loobil bejo'ob.

⁴Beyo', bin in ca'aj in jóokes in máascab ca'amat u yej u ti'al in quíimsic tuláacal tu pa'ate'ilo'ob, aj ti'ibil bejo'ob yéetel aj loobil bejo'ob, líikbal j xaman tac j noojol.

⁵Tuláacal yóokolcaab bíin u yojéelt teen Yuumtzile' dzo'oc in jóokesic tu ca'amat ca'a matil u yej in máasacab, cu dzo'ocole' ma' bíin in ca'a oques tu piixi'.

⁶Wíinic, teche' yaayaj okolnen, bey xan yéetel yaayaj pucsi'ikal; okolnen tu táan le caajo'.

⁷Wa cu káat chi'itico'ob ti' teech ba'ax o'olal ca wokole', a'al ti'ob tu yo'olal yaan u péectzilil jun p'éel ba'al cu taal u kiin, tuláacal yóokolcaab xane' bíin lúubuc u yóol, yaan u chojkajal u kabo'ob; mix máac bíin yu'ub wa xiibil wíinic, tuláacalo'ob bíin jo'op'oc u quiquilanquil u píixo'ob tu yo'olal u sajaquil. Táan u kuch'ul u súutuquil, bin u ca'aj úuchul. Teen Yuumtzil, teen a'alic.

⁸Yuumtzile' tu t'anajene' ca tu ya'alaj ti' teen:

⁹Wíinic, teche' t'aanen tin kaaba', ca a wa'al, teen Yuumtzil dzo'oc in túuxtiquech ca a wa'al beya': ¡Ca'amat yej máascab, ca'amat yej máascab! Dzo'oc u jóokesa'al u yej, dzo'oc xan u ja'abal.

¹⁰Jóokesa'an u yej u ti'al u beeta'al jun p'éel nojoch quíimsaj, ja'aba'an u ti'al u léembal;

¹¹j beeta'ab u ja'abal u ti'al u ma'achal tumen jun túul máac. Le máascabo' jóokesa'an u yej yéetel ja'aba'an, u ti'al dza'abal tu kab aj quíimsaj wíinic.

¹²Wíinic, ¡teche' awatnen, yéetel okolnen, tumen dza'an u ti'al u quíimsa'al in caajal, tuláacal xan u méektáanilo'ob Israel! Xot kinta'ano'ob u ti'al j quíimil yéetel in caajal, let o'olal túune' ko'okolabáa tu yo'olal yaj óolal.

¹³Teen Yuumtzilen, teen a'alic.

¹⁴Wíinic, teche' t'aanen tin kaaba'; p'u'ujs le máascab u ti'al u beetic loob, ca'a máal, tac óox máal u p'uja'anil. Lelo' jun p'éel ca'amat yej máascab u ti'al quíimsaj, u sajbe'en máascabil quíimsaj cu ya'alic u quíimsic caaj tuláacal tu'ux.

¹⁵Leti'e' yaan u chupico'ob yéetel sajaquil, yaan u quíimsic ya'ab máaco'ob. Ti' tuláacal u yotocho'ob tin dzaj u máascabil le quíimsaj. Lelo' leti' le ca'amat yej máascab ja'aba'an u ti'al ca léembalnac, bey xan jóokesa'an u yej u ti'al quíimsajo'.

¹⁶¡In káat ma'alob jóokesa'anil u yej a ca'a tzéel, u x no'ojil tu yéetel u x dzíiquil, u ti'al ca ch'aacnaquech ta ca'a tzéelil!

¹⁷Tene' bin in ca'aj xan in léecse tac quéen jéedzec in p'uja'anil. Teen Yuumtzil, teen j a'ale.

¹⁸Yuumtzile' tu t'anajene', ca tu ya'alaj teen:

¹⁹Dzíibt ca'a p'éel bej u ti'al u máan u ajawil Babilonia yéetel u ca'amat yej máascab. Le ca'a p'éel bejo'obo', unaj u jóokol ti' jun p'éelili' múuch' caajo'ob, tu'ux cu chúunul tu jujun p'éelil le bejo' unaj a dzáic u dzíibil tu'ux cu ya'alic tu'ux caajil cu bin.

²⁰Unaj a dzíibtic jun p'éel bej tu'ux bíin máanac le ajaw yéetel u máascab ca'amat u yejo'. Le caajo'obo' leti'ob Rabá u caajal j amonitaob yéetel Jerusalén, u tuulum caajil Judá.

²¹U ajawil Babiloniae' dzo'oc u wa'atal tu'ux cu xa'aypajal le ca'a p'éel bejo'obo', táan u káat chi'itic yéetel buul: cu xa'akbesic u x julubo'obo', cu káat chi' ti' u kuob, cu xakal ilic u táamanelo'ob le ba'alche'obo'.

²²Tu x no'oje', jóok le x julub cu ye'esic u beel Jerusalén, lelo' u káat u ya'ale' unaj u ba'ateltic Jerusalén yéetel u nu'uculo'ob u ch'a'abal caaj bey xan yaan u ya'alic ca úuchuc quíimsaj, ca dza'abac u yawatilo'ob ba'atel, ca pa'abac u maaco'ob u joolo'ob le caajo', yéetel ca dza'abac u níixilo'ob u ti'al u jach bakpachta'al le caajo'.

²³Ba'ale' u cajnáalilo'ob Jerusalene', cu yilico'ob bey jun p'éel tuutus bóobatile', tumen u beetmajo'ob nup t'aano'ob yéetelo'ob. Ba'ale' tu jaajile' lelo' u tac poolil u kebano'ob, yéetel u péectzilil u ma'achalo'ob u ti'al u bisa'alo'ob.

²⁴Le t o'olal, teen Yuumtzile', quin wa'alic: A kasa'anile'ex yéetel a quíimsaj wíiniquile'exe', chica'an u yila'al; Le kebano'ob ca beetique'ex ta cuxtale'exo', sen chica'antaco'ob. Let o'olal bíin ma'achaque'ex.

²⁵Teech xane', u ajawil Israel, j kaakas quíimsaj wíinic, táan u náadzal u súutuquil a kamic u xuul a jaadzil.

²⁶Teen Yuumtzile', quin wa'alic: Bíin lukesa'ac u nookil a pix jo'ol, yaan u to'ocol a x péet jo'ol, bíin jelpajac tuláacal. ¡Kuchuc tu ca'analil le witz le ba'ax yaan te j táax koomo', lúubuc xan j lu'um le ba'ax yaan te jach ca'analo'!

²⁷Tuláacal bíin in sut jeenel jen x lab caajil. Ba'ale' lela' chéen bíin úuchuc le quéen talac le máax in wa'almaj ca u beet xot kiine'.

²⁸Wíinic, teche' t'aanen tin kaaba' ca a wa'al ti' le j amonitaob cu poch'ico'ob Israelo', dzo'oc u jóokesa'al le máascab tu piixo': nu'ucbesa'an u ti'al quíimsaj yéetel ja'aba'an u ti'al ca léembalnac yéetel u ti'al xu'ulsaj.

²⁹U náayo'obe' ma' jaajtaco'obi', u péectzilo'obe' chéen tuuso'ob. Bíin tza'ayac le máascab tu caal le kaakas quíimsaj wíinico'obo'. Dzo'oc u náadzal u kiinil, u dzooc u xot kiinilo'ob.

³⁰¡Ca'amat yej máascab suunen ta piix! Tene' bin in ca'aj in p'is óoltech te tu'ux tin beetajeche', te j lu'um tu'ux j síijecho',

³¹bíin in láal ta wóokol in p'uja'anil bey jun p'éel sajbe'en tóoque'; bíin in kubech tu kab aj meyaj loob wíinico'ob, cu xu'ulsajo'ob.

³²Bíin tóoca'aquech bíin xan xu'ulsa'aquech; bíin áalcabnac a ki'ikel ti' tuláacal le lu'umo', ti' mix máac bíin ca'a' ka'ajaquech. Teen Yuumtzil, tene' dzo'oc in wa'alic.