Read Yucateco Ezequiel 22 Bible Online

Ezequiel 22 - Yucateco bible

Ezequiel 22

¹Yuumtzile' tu t'anajene' ca tu ya'alaj ti' teen:

²Wíinic, teche' bin a ca'aj a wa'al u xot kiinil le caaj cu quíimsaj wíinico'. Bíin a tac u pool tu yo'olal tuláacal le p'ecbe'en ba'alo'ob dzo'oc u beetico',

³ca wa'alic ti': Je'el ba'ax cu ya'alic Yuumtzila': Caaj ca quíimsic a cajnáalilo'ob yéetel ca beetic kuob u ti'al a kascunticabáa, ¡bin u ca'aj kuchul a súutuquil!

⁴Tu yo'olal le quíimsaj wíiniquilo'ob dzo'oc a beetico', dzo'oc a sipa'anchajal, dzo'oc xan a kascunticabáa tu yo'olal le kuob dzo'oc a beetico'; dzo'oc a beetic u jáan kuchul u kiinil a xu'ulsa'al. Let o'olale' tene' bin in ca'aj in beet a po'och'ol tumen tuláacal a caajilo'ob, yéetel a p'a'asta'al tumen tuláacal múuch' caajo'ob.

⁵Le yano'ob naadz yéetel le yano'ob náacho', bíin u p'a'astecho'ob tu yo'olal ma'alob ojéela'anil bix a kultic beetbil kuob yéetel tumen máan tip'a'an a keechel yanil.

⁶Ti' yano'ob u j méektáano'ob Israeli', le caja'ano'ob ichile'ex máaxo'ob cu beetico'ob tuláacal le loobo'ob cu páajtale'.

⁷A cajnáalilo'obe', ma'atech u tziquico'ob u taataob mix u maamaob, cu loolob t'antico'ob j táanxel lu'umilo'ob, cu yedzico'ob le j ma' taataob yéetel x quimen íichamo'ob.

⁸Ma'atech u tziquico'ob in quili'ich cúuchilo'ob mix in sábado'ob.

⁹Tu yo'olal u tuuso'obe', dze'edzec a cajnáalilo'obe', ti' leti'ob yaan u si'ipilil u quíimil u láak máaco'ob; cu bino'ob ti' le janalo'ob cu beeta'alo'ob te j pu'uco'ob tu tzicbe'enil le beetbil kuobo', cu dzo'ocole' cu beetico'ob p'ecbe'en ba'alo'ob.

¹⁰Dze'edzeco'obe' yaan ba'ax u yilo'ob yéetel u yatan u taataob wa yéetel le co'olelo'ob táan u yilico'ob u nook.

¹¹Yaan ichilo'obe' cu pak kebano'ob yéetel u yatan u yéet j xibil, wa ma' tu ch'i'ico'ob subtal yantal ba'al yilo'ob yéetel u yilibo'ob, wa cu pajic u subtal jun túul u x majan quiico'ob.

¹²Dze'edzec ti' a cajnáalilo'obe' cu cha'ico'ob u ma'analo'ob u ti'al u quíimso'ob u láak máaco'ob. Cu dzico'ob taakin u ti'al majanil tu yo'olal u bo'ota'al u tip'a'anil ti' leti'ob, cu beetico'ob loob yéetel cu yoclico'ob meyajo'ob u láaktzilo'ob, yéetel cu tu'ubsiqueno'ob. Teen Yuumtzil, teen a'alic.

¹³Tene' jach p'uja'anen tu yo'olal a woocolo'ob yéetel tu yo'olal a quíimsaj wíiniquilo'ob.

¹⁴Ma' a tucultic wa je'el u páajtal a katic in beel le quéen líikiquen in jadzeche'. Teen Yuumtzil, teen j a'ale, bin in ca'aj in dzo'ocbese';

¹⁵bíin in ki'itbesech ichil tuláacal múuch' caajo'ob, bíin in ki'itbesech ti' tuláacal tu'ux bíin anac wíinic, bíin xan in p'o'ech ti' tuláacal u kaas anil;

¹⁶bíin a beet in p'áatal kaasil tu táan yich u láak múuch' caajo'ob, ba'ale' bíin a kaj óolt teen Yuumtzilen.

¹⁷Yuumtzile' tu t'anajene' ca tu ya'alaj ti' teen:

¹⁸In ti'ale', caajil Israele' mix ba'al u biilal bey u xiixel cobre, wa estaño, wa fierro, wa plomo, wa plata cu p'áatal j edztal tu nu'ucul jo'oyol.

¹⁹Le t o'olale', teen Yuumtzil, tene' quin wa'alic: Bey xan te'ex dzo'oc a láaj suute'ex chéen xiixil mix ba'al u biilale'ex, bin in ca'aj in much'quinte'ex tu chúumuc Jerusalén.

²⁰Je'el bix le plata, le cobre, le fierro, le plomo yéetel le estaño cu láaj dza'abalo'ob ti' jun p'éelili' nu'ucul u yi'ibilo'obe', cu nu'utzul káak u ti'al u yi'ibilo'obo', bey xan bíin in beet ichil in sajbe'en p'u'ujul, bin in ca'aj in much'quinte'ex u ti'al in yibe'ex.

²¹Bin in ca'aj in nutz u si'il u káakil in p'uja'anil, bin in ca'a in much'quinte'ex in yibe'ex tu chúumuc le caajo'.

²²Je'el bix u yi'ibil le plata ichil le chujcabo' bey bíin in yibe'ex tu chúumuc le caajo', beyo' bíin a kaj óolte'ex teen Yuumtzil, dzo'oc in láalic in p'uja'anil ta wóokole'ex.

²³Yuumtzile' tu t'anajene' ca tu ya'alaj ti' teen:

²⁴Wíinic, teche' a'al ti' Israel: Teche' jun p'éelech múuch' caaj dzo'oc a ja'adzal iquil ma' káaxic ja' mina'an xan ja' a wuke'ex,

²⁵jun p'éelech múuch' caajo'ob yaan a méektáano'ob beyo'ob leóno'ob cu jéencalo'ob u ti'al u xe'exe'et'ico'ob u yo'ocho'obe'; tu lu'umo'obe' cu jaantico'ob wíinico'ob, cu yocoltico'ob u taakino'ob yéetel cu p'atico'ob x ma' íichamil ya'abcach co'olelo'ob.

²⁶U aj kiino'ob le múuch' caajo'oba', cu kechico'ob in ca'anbesajo'ob, yéetel cu manba'alcuntico'ob le ba'axo'ob quili'icho'ob in ti'alo'; ma' tu kaj óoltico'ob u jela'anil le ba'ax ma' utz yanil yéetel le ba'ax quili'icho', mix tu ca'anbesico'ob ti' u láak máaco'ob u kaj óolto'ob ba'ax utz u yanil yéetel ba'ax kaas u yanil. Ma' tu táan óoltico'ob in sábado'ob, mix tu tziquiqueno'ob.

²⁷U méektáano'ob le múuch' caajo'oba', beyo'ob u peekilo'ob káax cu xe'exe'et'ico'ob ba'ax cu chuquico'obe', nu'uca'ano'ob u ti'al u weco'ob ki'ik yéetel u quíimso'ob máaco'ob chéen tu yo'olal u ayikaltalo'ob.

²⁸Le aj bóobato'obo' cu ta'acbesico'ob ba'ax jaaj je'el bix le máax cu saccuntic jun p'éel pake'; cu ya'alico'ob cu náayo'ob, yéetel cu péectziltico'ob tuuso'ob. Cu babal a'alico'ob táan u t'aano'ob tin kaaba' quex tumen tu jaajile', tene' ma' t'aanaqueni'.

²⁹U cajnáalilo'ob le caajo' cu meyaj loobo'ob yéetel cu yoocolo'ob; cu yocoltico'ob óotzilo'ob yéetel máaxo'ob mina'an mix ba'al ti'ob, cu meyaj loobo'ob yéetel cu beetico'ob ba'ax ma' tu beel ti' j táanxel j lu'umilo'ob.

³⁰Tene' dzo'oc in dzáiquimbáa in caxant ichil le wíinico'ob jun túul wa máax u ti'al ca u beet ba'ax utz tu yo'olal le múuch' caajo'ob yéetel u ti'al ca payalchi'inac tin táan tu yo'olal ma' in xu'ulsico', ba'ale' ma' in nactáanti'.

³¹Le t o'olal dzo'oc in jedzic in jaadz tu yóokolo'ob, yéetel dzo'oc in xu'ulsico'ob tu yéetel u káakil in p'uja'anil, u ti'al in beetic u cáantico'ob bix u cuxtalo'ob. Teen Yuumtzil, teen a'alic.