Read Yucateco Ezequiel 23 Bible Online

Ezequiel 23 - Yucateco bible

Ezequiel 23

¹Yuumtzile' tu t'anajene' ca tu ya'alaj teen:

²Jun téenaque' yaan ca'ach ca'a túul co'olelo'ob u yaalo'ob jun túulili' maama.

³Ca'aliquil x lo'obayano'ob le ca'a túul co'olelo'oba' tu kubjuba'ob ti' nup keban; Egiptoe' tu cha'ajo'ob u báaxta'al u yiimo'obe', ca lukesa'ab u x suyujilo'ob.

⁴U x quictzilile', cu kaaba'intic ca'ach x Ahola (lelo' Samaria) U yíidzinile' x Aholiba (lelo' Jerusalén). Tene' dzo'oc in beel tu yéetelo'obe' ca j yanchaj in j xibil paalal yéetel in x ch'upul paalal ti'ob.

⁵x Aholae' ma' tu qui' kubaj u yóol ti' teni' tumen j sa'at u yóol tu yéetel u weeyo'ob, le aj ba'atel Asiriob,

⁶u búuquintmajo'ob chacjope'en nook, tuláacalo'ob u nuuquilo'ob caaj yéetel; méektáano'ob, táanquelemo'ob yéetel qui'ichquelemtaco'ob, j nat' tzíimino'ob ti' yano'ob tu yóokol u tziimino'obe',

⁷¡lelo'obo' u aj yéeyil j asiriob! x Aholae' tu kubjubáa ti' nup keban tu yéetelo'ob, sa'at u yóol tu yéetel u beetbil kuob tac u manba'alcunticubáa u ti'al u kultico'ob.

⁸Leti'e' suunaj x kaakas co'olelil ca'aliquil ti' yaan Egiptoe', mix jun téen tu jáawsaj u beeticubáa x kaakas co'olelil. Ca'aliquil tu x lo'obayanile', ya'abcach máaxo'ob j chilajo'ob tu x yéetele', ca tu lukesajo'ob u x suyujil, u ti'al u sutico'ob jun túul x kaakas co'olelil.

⁹Le t o'olal tin kubaj tu kab u weeyo'ob, le j asiriob, tu yo'olal leti'ob máaxo'ob beet u sa'atal u yóol,

¹⁰leti'obe' tu manba'alcuntajo'ob u subtal; cu dzo'ocole' tu lukesajo'ob u j xibil paalalo'ob yéetel ch'upul paalalo'ob ca quíimsa'ab leti' yéetel u ch'aac máascab, u ti'al u béeycunta'al u xot kiinil leti'. Le ba'ax úuch ti' leti'o sen máan u tzicbalil tu chi' co'olelo'ob.

¹¹X Aholiba u yíidzine' tu yilaj tuláacal ba'ax úuchi, ba'ale' asab píitmáan ya'abil úuchic kubicubáa ti' satal óolil yéetel nup kebanil ti' u quiic.

¹²Leti' xane' j sa'at u yóol tu yéetel le j asiriobo', tuláacalo'obe' u nuuquilo'ob caaj yéetel méektáano'ob, aj ba'atelo'ob qui'ichquelem u búuco'ob, j nat' tzíimino'ob ti' yano'ob tu yóokol u tziimino'obe', táanquelem j xi'ipalalo'ob jadzutztaco'ob.

¹³Tin wilaj dzo'oc xan u kascunticubáa leti', yéetel dzo'oc u beetic ba'ax tu beetaj u quiic.

¹⁴Ba'ale' leti'e' tu asab kubjubáa ti' u x kaakas co'olelil: tu yilaj ti' le pako'ob u yoochelo'ob u beetbil kuilo'ob Babilonia, dzáalkabta'ano'ob yéetel bona'ano'ob chac; tuláacalo'ob chica'ano'ob ti' náacomo'ob, tumen yaan u kaxnako'ob yéetel u pix jo'olo'ob.

¹⁵

¹⁶Le ca tu yilaj le j babiloniailo'obo', sa'at u yóol tu yo'olalo'obe', ca tu túuxtaj a bisaj t'aano'ob tu lu'umil Babilonia;

¹⁷le j babiloniailo'obo' j taalo'obe' ca j chilajo'ob tu x yéetele', ca j nupkebanchajo'ob tu x yéetel, ca éekcunta'ab yéetel nupkebano'ob. sen éekcunta'ab tac u taactal u xej tu yo'olalo'ob.

¹⁸Ca túun tu jach kubjubáa ti' nup keban, tac u ye'esic u x chacnul wíinclil, tac u kuchul u beet u taactal in xej je'el bix úuchic u beetic u taactal in xej u quiique'.

¹⁹Ba'ale' xi'ic u bin u kubicubáa ti' u x cáacbachil, u ti'al u ka'ajsic u kiinilo'ob u x ch'úupalil le ca j kaschaj Egiptoe',

²⁰ca j sa'at u yóol yéetel u weeyo'ob le j egipciobo', cu dzíiboltico'ob x xiibe' bey báaxalo'ob le burro'ob yéetel le tzíimino'obo'.

²¹Teche' x Aholiba, utz ta t'aan a ka'ajsic a x lo'obayanil tu kiinilo'ob ca'ach cu j báaxta'al a wiimo'ob tumen le j egipciobo'.

²²Le o'olal, teen Yuumtzile', quin wa'alic: le a weeyo'ob cu beetico'ob u taactal a xej bejela'o', bin in ca'aj in beet u suticuba'ob a aj p'eeco'ob. Tuláacal tu'ux bíin in túuxto'ob ta wóokol

²³le j babiloniob yéetel le j caldeob, u cajnáalilo'ob Pecod, Soa yéetel Coa, bey xan tuláacal j asiriob; tuláacalo'ob láaj táanquelemtaco'ob jadzutz u búuco'ob, náacomo'ob yéetel aj ba'atelo'ob; tuláacalo'ob cu nat' tzíimino'ob.

²⁴Bíin talaco'ob ta wóokol yéetel ya'abcach bolano'ob bey xan yéetel ya'abcach aj ba'atelo'ob; bíin u bakpachtecho'ob tuláacal tu'ux, u ch'a'amajo'ob u nu'ucul u ba'atelo'ob, u ba'atelo'ob yéetel u chimalo'ob, bíin in wa'al ti'ob ca u p'is óoltecho'ob, bíin u p'is óoltecho'ob je'el bix u ya'almaj t'aano'obe'.

²⁵Tene' bíin in láal ta wóokol u p'uja'anil in dzíiquil, leti'obe' bíin u loolob t'antecho'ob; bíin xoto'ob a ni' bey xan a xiquino'ob, le máaxo'ob bíin p'áataco'ob cuxa'ano'obe', bíin quíimsa'aco'ob tu yéetel u yej máascab. Bíin to'ococ ta kab a j xibil paalal yéetel a x ch'upul paalal, tu dzooque' bíin elequech ich káak.

²⁶Bíin pi'itic a nooko'ob yéetel bíin to'ococ a jadzutz ba'alo'ob.

²⁷Beyo' bíin in beet a xu'ulic a x ma' u'uyaj t'aanil yéetel a x cáacbachil úuchic a kubicabáa tu lu'umil Egipto', ma' bíin a ca'a il le j egipciobo', mix bíin a ca'a ka'ajso'obi'.

²⁸Teen Yuumtzil, je'el ba'ax quin wa'alica': Bin in ca'aj in beet a lúubul tu kab le múuch' caajo'ob a p'ectmajo'obo', bey xan le cu beetico'ob u taactal a xejo'.

²⁹Leti'obe' bíin u t'anecho'ob yéetel p'eequil, bíin u ti'alinto'ob ba'axo'ob dzo'oc a náajaltic tu yéetel a meyaj, cu dzo'ocole' bíin u p'atecho'ob jach chacnul; bíin p'áatac mix ba'al pixic a wíinclil le ta kubaj ti' x cáacbachil. A x cáacbachil yéetel a x ma' u'uyaj t'aanile',

³⁰leti' beetic u yúuchul ti' teech le ba'alo'oba', tumen ta kubjabáa a beet a x cáacbachil yéetel le múuch' caajo'obo', bey xan ta manba'alcuntabáa a kult u beetbil kuob.

³¹Ta beetaj ba'ax tu beetaj a quiic; let o'olal bíin in beet a wukic ba'ax tin dzaj u yuk leti'.

³²Teen Yuumtzil, bey in wa'alica': Bíin a wuk le ba'ax tu yukaj a quiique', ti' jun p'éel nojoch luuch, cóoch yéetel taam, chuup tu yéetel p'a'aso'ob bey xan tu yéetel kex óolalo'ob,

³³na'ajech ti' a cala'anil, sen taac xan a xej. na'ajech ti' a p'a'asta'al. Lelo' u yukul Samaria a quiic, yéetel lelo' bíin cáalaquech leti' bíin u beet a mukyaj.

³⁴Bíin a láaj uk tac u xiixel cu dzo'ocole' bíin a xíic pa'at u nu'ucul a cáaltal bíin a xo'oxo'ot a wiimo'ob. Teen Yuumtzil, teen a'alic; tene' dzo'oc in dzáic in t'aan.

³⁵Le t o'olal teen, Yuumtzile' quin wa'alic: Bey tumen ta tu'ubsajen ta p'atajen xano', bíin a mukyajt u jaadzil a ma' u'uyaj t'aanil yéetel x cáacbachil.

³⁶Yuumtzile' tu ya'alaj ti' teen: Wíinic teche' ¿a káat a wa wa'al u xot kiinil Ahola yéetel Aholiba? A'al túun tu táan u yicho'ob u p'ecbe'en cuxtalo'ob.

³⁷Leti'obe' tu kexajeno'ob, boonol xan u kabo'ob yéetel ki'ik. Tu kexajeno'ob, iquil tu kultajilaco'ob beetbil kuob, cu dzo'ocole' tu tóocajo'ob u paalalo'ob yanchaj teen tu yéetelo'ob u ti'al u tziiquil le kuobo'.

³⁸Cu dzo'ocole' tu beetajo'ob xan tin táan le ba'ala': chéen ti' jun p'éelili'i kiine' tu manba'alcuntajo'ob in quili'ich naj yéetel in sábado'ob.

³⁹Ti' u kiinil tu quíimsajilaco'ob u paalalo'ob u ti'al u tziquico'ob u beetbil kuobe', j taalo'ob tin kulnaje' ca tu manba'alcuntajo'ob. ¡Lela' leti' le ba'ax tu beetajo'ob tin wotocha'!

⁴⁰Tu túuxtajo'ob aj bisaj t'aano'ob u ti'al u beetico'ob u taal wíinico'ob náanach cúuchilo'ob, ca j taalo'ob. Tu ca'a túulilo'obe', ichquinajo'ob, tu bonajo'ob u yicho'obe' ca tu dzajo'ob u jadzutz co'ocoj ba'alo'ob u ti'al u kamico'ob;

⁴¹j culajo'ob ti' jun p'éel qui'ichquelem u nu'ucul wenel, tu'ux dza'an janalo'ob tu yóokol táasche', cu dzo'ocole' ca j dzaab poom yéetel le aceite jun páaycuna'an ti' teen tu yóokolo'.

⁴²Cu yu'uba'al ca'ach u yawat ya'abcach máaco'ob táan u beetico'ob cha'an; le wíinico'obo' ti' u taalo'ob ca'ach x tocoy lu'ume', táan ca'ach u jadzutzquintico'ob le co'olelo'obo', tu jadzutzquitajo'ob yéetel x bakalkabo'ob tu kabo'ob tu dzajo'ob xan qui'ichquelem péet jo'olo'ob tu poolo'ob.

⁴³Tene' quin wa'alic ca'ach tin baatzil: Bejela'e', bin u ca'ajo'ob u qui'imaccunto'ob u yóolo'ob yéetel cáacbach xuupulo'ob ti' nupkebano'ob. ¡Chéen yéetel leti'ob!

⁴⁴Cu taalo'ob tu yicnal x Ahola yéetel tu yicnal x Aholiba x ma' u'uyaj t'aan co'olelo'ob, je'el bix u bin máaco'ob tu yicnal cáacbacho'obe'.

⁴⁵Ba'ale' le wíinico'ob aj ti'ibil bejo'obo' bíin u xot kiinaco'ob tu yo'olal leti'ob je'el bix u najmatico'ob le x nupkebano'ob yéetel le x quíimsaj wíinico'obe'. Tumen leti'obe' x nupkebano'ob boonol xan u kabo'ob yéetel ki'ik.

⁴⁶Yuumtzile' cu ya'alic: Ca much'lac caaj tu yo'olalo'ob u ti'al ca xot kinta'aco'ob, beeta'ac u sen ocol sajaquil ti' leti'ob yéetel ocolta'aco'ob;

⁴⁷quíimsa'aco'ob yéetel ch'iin tumen tuláacal le caajo', lo'omoco'ob yéetel máansa'aco'ob ca'amat; quíimsa'ac xan u j xibil paalalo'ob yéetel u x ch'upul paalalo'ob, tóoca'ac u yotocho'ob xan.

⁴⁸Tene' bíin in beet u sa'atal ti' le múuch' caajo'oba' le x ma' subtal cuxtala'. Beyo' tuláacal le co'olelo'ob bíin u yilo'ob u ti'al ma' u kascuntico'ob u cuxtalo'ob.

⁴⁹Wa tu yo'olal le ca'a túulo'oba', bíin u kamo'ob u jaadzil u co'ilo'ob yéetel u kebano'ob úuchic u kultico'ob beetbil kuob. Te'exe' bíin a kaj óolte'exe' tene' Yuumtzilen.