Read Yucateco Ezequiel 24 Bible Online

Ezequiel 24 - Yucateco bible

Ezequiel 24

¹Tu diez u kiinil u winalil diez u ja'abil nueve, Yuumtzile' tu t'anajene' ca tu ya'alaj ti' teen:

²Dzíibt ba'ax kiini' bejela'e', tumen bejela'e' u ajawil Babiloniae', dzo'oc u cáajal u ba'ateltic Jerusalén.

³Le kaaya', ka'ay a'al ti' le caaja' u ti'al ka'ajsaj iikil ti'. A'al ti'ob le ba'ax quin wa'alica': dzáa jun p'éel cuum j káake' ca a láal ja' ichil;

⁴dzáa u xéexet'al bak ichil, u ma'alobil xéexet'alo'ob u bakel muuk ooc yéetel u bakel u t'o'olol u pu'uch, bey xan u asab ma'alobil u baaquelo'ob.

⁵Cu dzo'ocole' ch'a'a jun túul u asab ma'alobil le j tamano'obo', dzap si'ob tu yáanal u ti'al ca loocnac ma'alob, u ti'al ca ma'alob cha'acac u baaquelo'ob.

⁶Tumen Yuumtzile' cu ya'alic: ¡Yaj yanil le caaj quíimsaj wíinico'! Bey jun p'éel cuum cuxumchaja'ane', ma' teech u lukesa'al u cuuxume'. Teche' jóokes, jun jun xéet'il le bako', tac quéen p'áatac x ma' bakel le cuumo'.

⁷Le caajo' chuup tu yéetel ki'ik weca'an; cu dzo'ocole' ma' tu yóokol lu'um weca'ani', u ti'al ca pi'ixic ca'ach tumen u ma'ayil lu'um, ba'ale' tu yóokol jéechcabil tzekel.

⁸Tene' bin in ca'aj in p'at le ki'ik te'elo', tu yóokol u jéechcabil le tzekelo', u ti'al beyo' ma' u pi'ixil tumen u ma'ay le lu'umo', u ti'al ca t'a'abac in p'u'ujul ca beeta'ac ba'ax no'oja'an.

⁹Tumen Yuumtzile' cu ya'alic: ¡Yaj yanil le quíimsaj wíinic caajo'! teen tin kabil bíin in beet jun p'éel moson káak.

¹⁰Teche' taas ya'abcach si'e' ca t'ab le káako', takancunt ma'alob le bako', tac quéen sa'ap'ac u kaab yéetel quéen elec le baaco'obo';

¹¹cu dzo'ocole' le jóojochil cuumo' dzáa tu yóokol le káako' u ti'al ca p'áatac chacjole'en u cobreil u ti'al u tóoquic tuláacal u kasa'anilo'ob yanil; ¡tac a p'áatic u sa'atal u cuuxumil!

¹²Ba'ale' tu yo'olal u sen cuuxume' ma' tu páajtal u luksa'al tumen le káako'.

¹³Jerusalén tene' tin wóoltaj in lukes u kaasil a wanil ti' a j ma' u'uyaj t'aanil, ba'ale' ma' j páatchaji'. Chéen bíin kaas anil le quéen in láal in p'uja'anil ta wóokole'.

¹⁴Teen Yuumtzil, teen j a'ale, bey bíin úuchuco'. Teen tin kabil bíin in beete, ma' bíin p'áatac ma' in béeycuntiqui'; ma' bíin in ch'a'a óotzilili', ma' bíin kexpajac in tuuculi'. Bíin in jadzech tu yo'olal a kaakas cuxtal, tu yo'olal xan ba'axo'ob ca beetic. Teen Yuumtzil, teen a'alic.

¹⁵Yuumtzile' tu t'anajene' ca tu ya'alaj ti' teen:

¹⁶Bin in ca'aj in téec lukes ti' teech le máax a asab yaamajo'. Ba'ale' ma' a yaj óolal mix a wokol; ma' yalic u ja'il a wich.

¹⁷Mucul mukyajnen, ma' a búuquintic u yokom nookil quíimil je'el bix u beeta'al tu yéetel u láak quimeno'obe'. Máanen a pixma a pool, máanen xan a dzaamaj xanab; ma' a pixic a wich bey u chíiculal yaj óolale' mix a jaantic le waaj cu jaanta'al ti' le kiino'obo'.

¹⁸Tu ja'atzcab kiinile' táan ca'ach in t'aan yéetel le máaco'obo', tu yocbal kiine'; j quíim in watan; Tu láak kiine' tin beetaj le ba'ax tu ya'alaj ti' teen Yuumtzile'.

¹⁹U cajnáalilo'ob túun le caajo' tu ya'alajo'ob ti' teen: A'al ti' to'on ba'ax u káat u ya'al le ba'ax ca beetico'.

²⁰Tene' tin wa'alaj ti'ob: Yuumtzile' tu t'anajene' ca tu ya'alaj ti' teen:

²¹A'al ti' u caajil Israel: Lela' leti' ba'ax cu ya'alic Yuumtzila': Bin in ca'aj in manba'alcunt in kulnaj, le jach utz ta wiche'ex a pactique'ex yéetel a yaabiltmaje'exe', cu dzo'ocole' leti' a j ca'anal ichile'ex yéetel a muuke'ex; a j xibil paalale'ex yéetel a x ch'upul paalale'ex ta p'ataje'ex Jerusaleno' bíin quíimsa'aco'ob.

²²A'al ti'ob xan: Te'exe' bíin a beete'ex je'el bix tin beetaj teno': ma' bíin páatac a pixique'ex a wiche'ex u ti'al a we'esique'ex okom óolali', mix bíin páatac a jaantique'ex le janalo'ob cu jaanta'alo'ob tu yo'olalo'obo'.

²³Ma' bíin páatac a bine'ex a pixmaje'ex a poole'exi' mix x ma' xanabili'. Ma' bíin áacam okom óolnaque'exi', mix bíin okolnaque'exi'. Bíin p'áatac mina'an a muuke'ex tu yo'olal a loolob máaquile'ex, cu dzo'ocole' bíin jo'op'oc a yaj óoltique'ex ta baatzile'ex.

²⁴Te'exe' bíin a beete'ex ba'ax cu beetic Ezequiel, tuláacal le ba'axo'ob tu beetajo' bíin xan a beete'ex. Le quéen úuchuc lelo' bíin a kaj óolte'ex, tene' Yuumtzilen.

²⁵Bejela'e' bin in ca'aj in lukes u mu'uka'anil le j israelitaobo', lelo' leti' le kulnaj cu sen qui'imacchajal u yóolo' tu yo'olal u qui'ichquelmilo', leti' le jach utz tu yicho'ob cu jach cha'antico'ob yéetel jach yaabilmajo'obo'. Bíin xan in lukes u j xibil paalalo'ob yéetel u x ch'upul paalalo'ob.

²⁶Ti' le kiino' le máax bíin páatac u púudzule' bíin talac u dzáa ti' teech u péectzilil.

²⁷Ti' le kiino' bíin ch'éenec a tootil, bíin páatchajac a t'aan yéetel le máaxo'ob j púudzlajo'obo'. Beyo' bíin a we'es ba'ax bíin u beet le caajo', leti'ob xane' bíin u kaj óolto'ob, tene' Yuumtzilen.