Read Yucateco Ezequiel 25 Bible Online

Ezequiel 25 - Yucateco bible

Ezequiel 25

¹Yuumtzile' tu t'anajene' ca tu ya'alaj:

²Wíinic teche', sutabáa tu tojil le j amonitaobo' ca a wa'al u xot kiinilo'ob tin kaaba'.

³A'al ti'ob ca u ch'en xiquinto'ob le t'aano'ob cu túuchi'ita'al ti'ob tumen Yuumtzila': Te'exe' ta dzaje'ex u yawatilo'ob qui'imac óolal le ca ta wilaje'ex u manba'alcunta'al in kulnaje', bey xan u kascunta'al Israel yéetel u ma'achal u cajnáalilo'ob Judá u ti'al j bisbilo'ob táanxel lu'umil.

⁴Let o'olal, bin in ca'aj in kube'ex tu kab u caajilo'ob j lakin, u ti'al ca u toco'ob ti' te'ex a lu'ume'ex, u ti'al xan ca u líikeso'ob u cúuchilo'ob u yúuchul ba'atel u ti'al ca cajlaco'obi'. Leti'ob bíin jaantic ba'ax a pakmaje'ex yéetel leti'ob bíin ukic a wo'och leche'ex.

⁵Rabae' bíin in sut u lu'umil tu'ux u caxtic u janal camello'ob, Amón xane', bíin suunac u lu'umil tu'ux cu bisa'al janal j tamano'ob. Bíin a kaj óolte'ex túun tene' Yuumtzilen.

⁶Teen Yuumtzil, tene' quin wa'alic: Te'ex j amonitaexe', papaxkabnaje'ex yéetel síit'naje'ex tu yéetel qui'imac óolal, yéetel ta kex óoltaje'ex Israel.

⁷Le t o'olale' bin in ca'aj in líikes in kab u ti'al in jadzique'ex yéetel u ti'al in kubique'ex ti' múuch' caajo'ob, u ti'al ca lukesa'ac tuláacal ba'ax yaan ti' te'ex. Bin in ca'aj in tzele'ex ti' le caajo'obo', bin in ca'aj in beet a mixba'altale'exi'. Bey túuno' bin a ca'aj a kaj óolte'ex teen Yuumtzilen.

⁸Teen Yuumtzil, tene' quin wa'alic: Moab yéetel Seire' cu ya'alico'ob jun tacáalili' Judá yéetel u láak múuch' caajo'ob.

⁹Le t o'olale' bin in ca'aj in je'e jun p'éel bej jun tzéel ti' Moab, yéetel bin in ca'aj in p'at x ma' caajilo'ob jun p'éel u naklil tac tu láak jun u naklil, lelo'obo' u caajilo'ob Bet-jesimot, Baal-meón yéetel quiriataim u co'ocoj ba'alilo'ob le múuch' caajo'.

¹⁰Bíin in beet u ch'a'abal u lu'umilo'ob tumen u caajilo'ob j lakin, pa'ate' yéetel j amonitaob u ti'al ma' u suut ka'ajesbil le j amonitaob ichil múuch' caajo'obo'.

¹¹Bíin in béeycunt u xot kiinil Moab, bey túuno' bíin kaj óolta'ac tene' Yuumtzilen.

¹²Teen Yuumtzil, tene' quin wa'alic: Edome' dzo'oc u sutic u jeel loob ti' Judá, tu yo'olal lelo' dzo'oc u táaj si'ipil.

¹³Le t o'olale', teen Yuumtzile', quin wa'alic: Bin in ca'aj in líikes in kab u ti'al in jadzic Edom yéetel u ti'al ca in xu'uls u wíiniquilo'ob yéetel u ba'alche'ilo'ob. Bin in ca'aj in p'at x la' jeenel caajil. Líikbal Temán tac Dedane', u wíiniquilo'obe' bíin quíimico'ob yéetel u ch'aac máascab.

¹⁴Bíin in jadz Edom tu kab in caajal Israel: Leti'e' bíin u beet ti' Edom le ba'ax in káat in beet ichil in p'uja'anile'. Beyo' bíin ojéelta'ac bix in sutic u jeel loob. Teen Yuumtzil, teen a'alic.

¹⁵Teen Yuumtzil, tene' quin wa'alic: Le j filisteobo' dzo'oc u sutico'ob u jeel loob, dzo'oc u sut loobo'ob yéetel p'ecbe'en pucsi'ikal; beyo'ob mina'an u xuul u aj p'eequilo'ob Israele', tu dzajuba'ob xu'ulsaj.

¹⁶Le t o'olal, teen Yuumtzil, tene' quin wa'alic: bin in ca'aj in líikes in kab u ti'al in jadzic le j filisteobo'; bin in ca'aj in lukes j bej le j sereteobo', bey xan bin in ca'aj in xu'uls tuláacal le p'áatalo'ob tu jáal ja'ob.

¹⁷Yaj loob bíin in sut ti'ob; bíin in jadzo'ob tu yéetel p'uja'anil. Le quéen in beet lelo' bíin u kaj óolto'ob tene' Yuumtzilen.