Read Yucateco Ezequiel 26 Bible Online

Ezequiel 26 - Yucateco bible

Ezequiel 26

¹Tu yáax jun p'éel u kiinil ti' u winalil u once ja'abe', Yuumtzile' tu t'anajene' ca tu ya'alaj ti' teen:

²Tiroe' tu ya'alaj, tu ya'alaj Jerusalén: ¡U jool caajil u yúuchul coonol ichil le múuch' caajo'obo' dzo'oc u xe'exe'et'pajal! ¡Bejela'e' dzo'oc u kuchul u súutuquil in che'ej! Tene' bíin chu'upuquen tu yéetel ayikalil ca'aliquil leti'e' bíin óotzilchajac.

³Le t o'olal, teen Yuumtzile' quin wa'alic: Tiro, tene' quin wa'alic teche' in aj p'eequech. Bíin in beet u líikil ya'abcach caajo'ob u ba'ateltecho'ob, je'el bix u líikil u cuclilo'ob le ka'anabo',

⁴u ti'al u kascunto'ob a tuulumo'ob yéetel u ti'al u jeno'ob a witzil najilo'ob tac u ma'ay lu'umil bíin in lukes tu cúuchil, bíin in p'at jun p'éel jáanil tzekel.

⁵Tu chúumuc le ka'anabo' bíin p'áatac bey u cúuchil u jaykinta'al u káanil caybale'. Teen Yuumtzil, teen a'alic. Tiroe' bíin ocolta'ac tumen le múuch' caajo'obo',

⁶u péet caajilo'ob yano'ob ti' ma'alob lu'ume' bíin quíimsa'aco'ob tu yéetel u yej máascab. Bíin u kaj óolto'ob túun, tene' Yuumtzilen.

⁷Teen Yuumtzil, tene' quin wa'alic: Bin in ca'aj in beet u taal j noojol Nabucodonosor u ajawil Babilonia, u asab mu'uka'anil ajaw u ti'al ca u ba'atelt Tiro. Bíin talac tu yéetel tzíimino'ob, bolano'ob bey xan tu yéetel j nat' tzíimino'ob bey xan tu yéetel ya'abcach aj ba'atelo'ob u much'quintma.

⁸Yéetel u yej máascab bíin u xu'uls a péet caajilo'ob yaan ti' le lu'um ma'alob jedzlico'; bíin u líikes tuulumo'ob ta bakpach, bíin u beet níixo'ob u ti'al u ba'ateltiquech yéetel bíin u túuxt aj ba'atelo'ob ta wóokol u ch'a'amajo'ob u chimalo'ob.

⁹Yéetel u nu'ucul u pu'ucul pak bíin jen a tuulumilo'ob, yéetel báato'ob bíin u pa'a a witzil najilo'ob.

¹⁰Le quéen ococ u ajawil Babilonia ta jool a caajil je'el bix u yocol máac ichil jun p'éel caaj cu ch'a'abale', tu yo'olal jach ya'ab le tzíimino'obo', bíin u balecho'ob yéetel ma'ay lu'um bíin u líikeso'obo'; a tuulumilo'obe' bíin quíilbalnaco'ob tu yo'olal u ka'amcach u bolanilo'ob tu yéetel u tzíiminilo'ob;

¹¹u maay u tziimino'obo' bíin láaj xanabcha'atic u bejilo'ob a caajal. Bíin u quíims a caajal yéetel u yej máascab, bíin u pul j lu'um tuláacal a mu'uka'an ocom tuunilo'ob.

¹²bíin u p'atecho'ob nakan óotzili, bíin u láaj ocolto'ob le ba'ax yaan a jaanto', bíin u jeno'ob a tuulumilo'ob, bíin u láaj lúubso'ob a jalach najilo'ob, bíin u láaj pulo'ob ichil ka'anab u tuunichilo'ob, u x katáal che'ilo'ob tac xan u xiixelo'ob u pakil.

¹³Beyo' bíin in beet u ch'éenel u juum a kaayo'ob, ma' a bíin u'uya'ac tu ca'a téen u juum arpaobi'.

¹⁴Bíin in sutech jun p'éel jáanil tzekel, jun p'éel u cúuchil tu'ux cu jaykinta'al u nu'uculo'ob caybal, ma' bíin ca'a utzquinta'aquechi'. Teen Yuumtzil, tene' dzo'oc in t'aan, teen Yuumtzil, teen a'alic.

¹⁵Tene' Yuumtzilen, tene' quin wa'alic ti' Tiro: Le caajo'ob caja'ano'ob ti' le peteno'obo', bíin jo'op'oc u quiquilanquilo'ob le quéen u yu'ubo'ob u juum u ka'amil a lúubul, u u'uyanquil máaxo'ob j beeta'ab loob ti'obo' yéetel le u quíimsajil a cajnáalilo'obo'.

¹⁶Tuláacal u ajawilo'ob le peteno'obo' bíin lukuco'ob tu jalach káanche'ob, bey xan bíin u lukeso'ob u suyemo'ob yéetel u nooko'ob yaan u jadzutz chuuyilo'ob; chuupo'ob noj sajaquil bíin culaco'ob j lu'um, táan u quiquilanquilo'ob yéetel jaka'an u yóolo'ob le quéen u yilecho'ob.

¹⁷Bíin túun u kayo'ob ti' teech u kaayil quimeno'ob: ¡Bix úuchic a xu'ulsa'al, bix úuchic u beeta'al a sa'ata'al ichil le ka'anabo', caaj nojba'al! ¡Teech tu yéetel a cajnáalilo'obe', j mu'uka'anchajech te j ka'anabo', cu dzo'ocole' ta beetaj u yocol noj sajaquil ti' tuláacal le lu'umo'!

¹⁸Bejela'a' dzo'oc a lúubule', u cajnáalilo'ob u petenilo'ob le ka'anabo' cu quiquilanquilo'ob tu yéetel sajaquil. Bejela'a' dzo'oc u p'áatal mina'aneche', u petenilo'ob le ka'anabo' bíin sen ja'akac u yóolo'ob.

¹⁹Tumen teen Yuumtzile' quin wa'alic bin in ca'aj in sutech x lab caajil, je'el bix le caajo'ob mix máac cajnáalo'obo'. Bin in ca'aj in beet a ba'alal tumen u ja'ilo'ob le taamtam ka'anabo',

²⁰ca éemequech tac tu'ux yaan le quimeno'obo', leti' le máaco'ob cuxa'ano'ob úuch ca'acho'. Bíin in pulech tu asab taamil lu'um, tu lu'umilo'ob le mina'an u xuul x lab caajo'obo', u ti'al ca cajlaquech ichil le quimeno'obo', ma' bíin ca'a yanac a cajnáalilo'obi'. Mix bíin ca'a utzquinta'aquech way tu lu'umil le máaxo'ob cuxa'ano'obo'.

²¹Bíin in sutech sajbe'en ba'al, bíin sa'ataquech, bíin caxta'aquech. Ba'ale' mix bikin bíin nuptáantaquechi'. Teen Yuumtzil, teen a'alic.