Read Yucateco Ezequiel 27 Bible Online

Ezequiel 27 - Yucateco bible

Ezequiel 27

¹Yuumtzile' tu t'anajene' ca tu ya'alaj ti' teen:

²Wíinic, teche' kay u kaayil quíimil

³tu yóokol Tiro, le caaj yaan tu jáal le ka'anabo', le caaj cu paaclan coonol tu yéetel múuch' caajo'ob yéetel u ya'abcach petenilo'ob le ka'anabo'. A'al ti' bey cu ya'alic Yuumtzila': Tiro, teche', ca noj ba'alcunticabáa iquil a wa'alic jun p'éelech qui'ichpam, ma'alob beeta'anilech;

⁴a méektáane' cu kuchul tac tu chúumuc ka'anab, le máaxo'ob j beeteche', tu beetajecho'ob qui'ichpamech.

⁵Tuláacal a kalbil che'ilo'obe' j ch'a'ac ti' pinoe' j ch'a'abo'ob tu pu'uquil Senir; a x ocom che'ile' j beeta'ab tu yéetel u kuulche'il Líbano;

⁶u che'ilo'ob a báabe' j beeta'abo'ob yéetel u béequilo'ob Basán; u yóokol a cheemile' j beeta'abo'ob yéetel cipreso'ob ti' j ch'a'abo'ob tu jáal u ja'ilo'ob Chipree', jadzutzquinta'ano'ob yéetel marfil.

⁷U nookilo'ob u ti'al u beeta'al a báab tumen iike', le j chu'uyo'ob Egiptoe' leti' ca'ach cu meyaj teech lacamil; a bo'oyilo'obe' beeta'ano'ob ca'ach tu yéetel nooko'ob chacpuke'en yéetel chac, j beeta'ano'ob tu jáal u ka'anabilo'ob Elisa.

⁸A aj báabobe' ti' ca'ach u taalo'ob Sidón tu yéetel Arvade', le máaxo'ob nu'ucbesic tu'ux bíin jíilta'aqueche' ma'alob u yojelilo'ob tu'ux unaj u bisiquecho'ob.

⁹U cajnáalilo'ob Gebale' ma'alob u yojelilo'ob u yutzquinto'ob tu'uxo'ob kaschaja'an, Tuláacal u aj meeyjulo'ob u cheemilo'ob le ka'anabo' cu máan u cono'ob ca'ach a coonolo'ob.

¹⁰U j xiibilo'ob Persia, Lidia yéetel Libiae' leti'ob cu meyajo'ob ca'ach ti' ba'atelilo'ob a ti'al; cu jadzutzquintiquecho'ob ca'ach tu yéetel u chimalo'ob bey xan yéetel u p'óoquilo'ob u ba'atelo'ob yéetel cu dzáico'ob qui'ichquelmil ti' teech.

¹¹U cajnáalilo'ob Arvad, pa'ate' yéetel u aj ba'atelo'ob ti' yano'ob ca'ach ta tuulumilo'ob yéetel tu bak paach, ta witzil najo'obe' u cajnáalilo'ob Gamad yano'ob ca'achi'. U chimalo'obe' ch'uyucbalo'ob ca'ach ti' tuláacal u chowaquil a pakilo'ob u ti'al u beetico'ob a asab jadzutztal.

¹²Tu yo'olal jach ya'ab ca'ach a ayikalil, Tarsise', cu kex coonol ca'ach ta wéetel, tu keexil ba'axo'ob cu dzáic ti' teech ca'ache', teche' ca dzáic ca'ach ti': plata, fierro, estaño.

¹³Bey xan Grecia, Tubal yéetel Meseque', cu maano'ob ca'ach ti' teech, cu bo'otiquecho'ob ca'ach tu yéetel palitzilo'ob bey xan tu yéetel ba'alo'ob bronce u ca'ajo'ob.

¹⁴U cajnáalilo'ob Bet-togarmae', cu bo'otiquecho'ob ca'ach tu yéetel u tzíiminilo'ob meyaj, tzíimino'ob u ti'al nat'bil, bey xan tu yéetel mulaob.

¹⁵U cajnáalilo'ob Rodase' cu kex coonolo'ob ca'ach ta wéetel. Ca kex coonol ca'ach tu yéetel ya'ab u cajnáalilo'ob u petenilo'ob ka'anab, cu bo'otiquecho'ob ca'ach tu yéetel marfil bey xan tu yéetel u che'ilo'ob ébano.

¹⁶Edome' cu kex coonol ca'ach ta wéetel, tumen ya'ab ba'axo'ob ca conic: tu keexil ba'axo'ob ca conique' cu taasa'al ca'ach ti' teech u jadzutz tuunichilo'ob granate, nooko'ob bona'ano'ob chacjope'en, nooko'ob chuya'ano'ob, u nookilo'ob lino, coralo'ob tu yéetel rubiob.

¹⁷Cu kex coonol xan ca'ach ta wéetel judá yéetel Israel, cu bo'otiquecho'ob ca'ach tu yéetel u trigoil Minit, bey xan tu yéetel noj waajo'ob, caab, aceite yéetel bálsamo.

¹⁸Damascoe' cu manic ti' teech ca'ach ya'abcach ba'alo'ob yéetel ya'abcach ayikalilo'ob; cu bo'otiquech ca'ach tu yéetel u vinoil Helbón bey xan tu yéetel u tzo'otzel u j tamanilo'ob Sahar.

¹⁹Líikbal Uzale' cu taasa'al ca'ach ti' teech vino, fierro nu'ucbesa'an, canela yéetel qui'iboc jalalo'ob u ti'al u bo'ota'al a coonolo'ob.

²⁰Dedane' cu kex coonol ca'ach ta wéetel u jaalma tzíimino'ob.

²¹Arabia yéetel tuláacal u nuuquilo'ob Cedare' ti' teech cu maano'ob ca'achi: cu bo'otiquecho'ob ca'ach tu yéetel mejen j tamano'ob, j tamano'ob yéetel j yuuco'ob.

²²U aj coonolilo'ob Sabá yéetel Ramae' ti' teech ca'ach cu maano'ob, cu bo'otiquecho'ob ca'ach tu yéetel u asab ma'alobil qui'iboc ja'ob, jadzutz tuunicho'ob yéetel oro.

²³Cu kex coonol ca'ach ta wéetel Harán, Cane, Edén yéetel u aj coonolilo'ob Sabá, u coonolilo'ob Asiria yéetel tuláacal Media;

²⁴cu conico'ob ca'ach ti' teech castláan nooko'ob, buuclis nooko'ob bona'ano'ob chacjope'en, but' chuuyo'ob, póopo'ob jejeláas bona'anilo'ob, jokbil suumo'ob mu'uka'antaco'ob.

²⁵U cheemilo'ob Tarsise', cu taalo'ob ca'ach chuclan paachil u ti'al u taasico'ob ti' teech ya'abcach meyajtbil ba'alo'ob. Beyech ca'ach jun p'éel cheem ti'anech yóokol taamtam ka'anab, chuup tu yéetel tuláacal ba'axo'ob co'oj.

²⁶A aj báabo'obe' tu bisajecho'ob ti' taamtam ja'ob, ba'ale' u yiikalo'ob j lakine' tu xe'exe'et'ajech te j taamtam ka'anabo'.

²⁷A ayikalil, a coonolo'ob yéetel u yich a meyaje', a aj meyajo'ob ti' cheem yéetel máaxo'ob bisiqueche', le máaxo'ob tzutziquech, a j coonolo'ob, a aj ba'atelo'ob yéetel tuláacal máaxo'ob meyajtiqueche', bíin xi'ico'ob tu taamil ka'anab le kiin bíin búulqueche'.

²⁸Le quéen awatnac a aj meyajilo'ob ka'anabe', bíin quiquilnac u cuclil le ka'anabo'.

²⁹Le aj báabo'obo', bíin éemeco'ob tu cheemo'ob; le u aj báabilo'ob yéetel le máaxo'ob bisic le cheemo', bíin u puluba'ob j lu'um.

³⁰Bíin awatnaco'ob, bíin yaj okolnaco'ob ta wo'olal, bíin u toso'ob lu'um tu poolo'ob yéetel bíin u bakluba'ob ich ta'anil káak.

³¹Ta wo'olale', bíin u dzico'ob u poolo'ob, bíin u búuquinto'ob u okom nooko'ob yéetel bíin okolnaco'ob tu yéetel yaayaj óolal.

³²Ta wo'olale', bíin u kayo'ob jun p'éel u kaayil quíimil, iquil bíin u ya'alo'ob óotzil óolal: ¿Máax je'el u páajtal u queticubáa tu yéetel Tiro, le caaj ti' yaan ca'ach ichil le ka'anabo'?

³³Le quéen kuchuc ca'ach a coonol ti' le ka'anabo', ca conic ca'ach tuláacal ba'ax kabéet ti' múuch' caajo'ob. Yéetel a ya'abcach ayikalil yéetel le ba'alo'ob ca conic ca'ache' ca ayikalcuntic ca'ach u ajawilo'ob lu'um.

³⁴Bejela'e', ca'acacha'anech tumen ka'anab, bula'anech tac tu taamil ja'. Ba'axo'ob ca conic yéetel a aj meyajo'obe' j bino'ob tu taamil ka'anab ta wéetel.

³⁵Tuláacal u cajnáalilo'ob u petenilo'ob le ka'anabo' oca'an sajaquil ti'ob ta wo'olal; u ajawilo'obe' jaka'an u yóolo'ob, chica'an u sajaquil tu yicho'ob.

³⁶U j coonolilo'ob u láak caajo'obe', cu ja'akal u yóolo'ob le quéen u yilecho'ob. Dzo'oc a suut sajbe'entzil ba'alil; dzo'oc a xu'ulul jun puli'.