Read Yucateco Ezequiel 28 Bible Online

Ezequiel 28 - Yucateco bible

Ezequiel 28

¹Yuumtzile' tu t'anajene' ca tu ya'alaj ti' teen:

²Wíinic, teche' a'al ti' u ajawil Tiro: Je'el ba'ax cu ya'alic Yuumtzila': A pucsi'ikale' chuup tu yéetel x ca'anal ichil, ta tucultabáa jun túulech ku culucbalech tu jalach káanche' kuob bakpachta'anech tumen ka'anab. Ba'ale' teche' ma' jun túulech kui', teche' jun túulech wíinic ca tucultic yaan ti' teech u na'at jun túul ku.

³¿A wojéelaje', cu píitmáansic wa u yojéelaj Danel? ¿Mix jun p'éel x mucul ba'al cu p'áatal ma' a wojéeltic?

⁴Yéetel a wojéelaj, yéetel nu'uca'anech u ti'al meyaje', dzo'oc u yantal ti' teech ya'ab ayikalilo'ob, dzo'oc a chupic a ba'aso'ob yéetel oro bey xan yéetel plata.

⁵Tu yo'olal nu'uca'anech u ti'al coonole', ta ya'abcuntaj a ayikalilo'ob, ba'ale' le ayikalilo'obo' tu beetaj u ca'analtal a wich.

⁶Tu yo'olal lelo' Yuumtzile' cu ya'alic: Bey tumen ca tucultic yaan ti' teech u na'at jun túul kuo',

⁷bin in ca'aj in beet u taal j táanxel lu'umilo'ob ta wóokol, máaco'ob asab loolob wíinico'ob, bíin u jíilto'ob u máascabo'ob u ti'al u ba'ateltiquecho'ob, ti' teech, jach qui'ichquelmech yéetel jach yaan aj ojéelajeche', bíin u xanabcha'at a qui'ichquelmil.

⁸Bíin u pulecho'ob tu taamil áactun, bíin úuchuc ti' teech loob tu yóokol u taamil ka'anab.

⁹¿Bíin wa túun a wu'uyabáa jun túulech ku, le quéen ti'anaquech tu táan máaxo'ob bíin jadziquech? ¡Tu kab máaxo'ob bíin quíimsiqueche', teche', ma' u láak ba'alechi', chéen jun túulech wíinic!

¹⁰Bíin quíimiquech tu kab táanxel lu'umilo'ob, je'el bix u quíimil máax j ma' ocsaj óole'. Teen Yuumtzil, teen a'alic; Teen dzáic u t'aanil.

¹¹Yuumtzile' tu t'anajene' ca tu ya'alaj ti' teen:

¹²Wíinic, teche' kay jun p'éel u kaayil quíimil ti' u ajawil Tiro, ca a wa'al ti': Je'el ba'ax cu ya'alic Yuumtzila': Ti' teech ca'ach cu jóokesa'al u ca'anbesajil bix jun túul utzil wíinic, chuupech ca'ach yéetel ojéelajil bey yéetel qui'ichquelmil.

¹³Ti'anech ca'ach Edene', ichil u pakalo'ob Ku, jadzutzquinta'anech ca'ach tu yéetel u jejeláasil u jadzutzil tuunicho'ob: rubí, crisólito, jade, topacio, cornalina, jaspe, zafiro, granate yéetel esmeralda; a jadzutz ba'alo'ob yéetel a tuupo'ob ca'ache', beeta'ano'ob ca'ach yéetel oro, líikbal ti' le kiin j beeta'abiqueche'.

¹⁴Tin p'atajech canantbil tumen jun túul cuxa'an aj xiknal, ti' ca'ach yanech tu quili'ich pu'uc Kue', ca xíimbal ca'ach ichil le eeko'obo'.

¹⁵Ma'alob tojil ca'ach a cuxtal líikbal ti' le kiin j beeta'abiquech tac ca j chíicpaj ti' teech le kasa'anilo'.

¹⁶U sen ya'abil a kex coonole' tu chupajech tu yéetel meyaj loob bey xan tu yéetel keban. Ca túun tin tzelajech tin táan; tin tojolch'intajech ti' u pu'uquil Ku, le xiknal aj cuxa'an canatiquech ca'acho' tu jóokesajech ichil le eeko'obo'.

¹⁷A qui'ichquelmile' tu chupajech yéetel x ca'anal ichil; a sen jadzutzile' tu kascuntaj a ojéelajil. Tene' tin pulajech j lu'um, tin beetaj u pa'ajal a subtal tu táan ajawo'ob.

¹⁸sen ya'abchaj a kebano'ob, sen kaschajech yéetel a kex coonol, kuch tac a manba'alcuntic a kulnajo'ob. Ca túun tin beetaj u jóokol jun p'éel káak chúumuc ti' teech u ti'al u láaj tóoquiquech. bejela'e' tuláacal máax je'el u páajtal u yilic ti' yanech j lu'um, suunaja'anech ta'anil káak.

¹⁹Tuláacal le múuch' caajo'ob u kaj óoltmecho'obe', cu ja'akal u yóolo'ob le quéen u yilecho'ob. Dzo'oc a suut sajbe'en ba'al; ¡J quíimech u ti'al mix bikin a ca'a cuxtal!

²⁰Yuumtzile' tu t'anajene' ca tu ya'alaj ti' teen:

²¹Wíinic, teche' sutabáa tu tojil Sidone', ca t'aanaquech tin kaaba' tu yóokol.

²²A'al ti': Je'el ba'ax cu ya'alic Yuumtzila': Sidón, tene' quin beetiquinbáa a aj p'eec; Bíin in nojbe'encultinbáa chúumuc a caajil. Bíin in we'es in quili'ichil, beyo' bíin kaj óolta'ac teen Yuumtzilen.

²³Bíin in túuxt koja'anilo'ob ta wóokol, bíin áalcabnac ki'ik tu bejilo'ob a caajal; a cajnáalilo'obe' bíin lúubuco'ob quimeno'ob, bíin ba'atelta'aco'ob tu yéetel máascab tuláacal tu'ux. Bíin ojéelta'ac túun, tene' Yuumtzilen.

²⁴Israele' ma' bíin u ca'a mukyajt u yaayaj ju'up'ul tumen u ki'ixilo'ob u kex óolal le caajo'ob bakpachtmailo'. Leti'ob túune' bíin u kaj óolto'ob teen Yuumtzilen.

²⁵Teen Yuumtzile' quin wa'alic: Bíin in mol u caajil Israel ichil le caajo'ob tu'ux in ki'itbesmajo'obo', yéetel bíin in we'es in quili'ichil tu táan yich tuláacal múuch' caajo'ob. Israele', bíin cajlac tu ca'a téen tu lu'um, le lu'um tin dzáa ti' Jacob in palitzilo'.

²⁶Te'elo' bíin cajlaco'ob yéetel jéedzel, bíin u beeto'ob u yotocho'ob bíin xan u pako'ob uvaob. Tene' bíin in béeycunt in xot kiin tu táan tu yóokol tuláacal máaxo'ob cajnáalo'ob tu tzéelo'ob cu manba'alcuntico'ob u caajil israelo'. Bey túuno' bíin kaj óolta'ac tene' Yuumtzilen u Junab Ku Israel.