Read Yucateco Ezequiel 29 Bible Online

Ezequiel 29 - Yucateco bible

Ezequiel 29

¹Ti' u doce kiinil ti' u winalil diez ti' u ja'abil diez xane', Yuumtzile' tu t'aanajene' ca tu ya'alaj ti' teen:

²Wíinic teche' sutabáa tu tojil faraón u ajaw Egiptoe', ca tacpoolt tin kaaba' bey xan tuláacal Egipto.

³A'al ti': Je'el ba'ax cu ya'alic Yuumtzila' Tene' quin beetiquinbáa a aj p'eec, faraón, teche' u ajawil Egipto le nojoch ba'aba'al chilicbalech ichil a wáalcab ja' ca wa'alic: Le Niloo' in ti'al, teen beetmajil.

⁴Bin in ca'aj in jok ni'itech, Bin in ca'aj in beet u táakal ta pu'uch u cayilo'ob a áalcab ja'il. ¡Bíin in jóokesech ichil a wáalcab ja' pa'ate' tu yéetel le cayo'ob taakaltaco'ob ti' teche'!

⁵Bíin in xáacch'intech pa'ate' tu yéetel u cayilo'ob a wáalcab ja'il; bíin lúubuquech quimenech ti' cúuchil jáanpike'en, cu dzo'ocole' mix máac bíin xi'ic u ch'a'ech u muquech. Bíin in beet a jaanta'al tumen u dzíidzic ba'alche'ilo'ob káax yéetel u ch'íich'ilo'ob ca'an.

⁶Tuláacal u cajnáalilo'ob Egiptoe' bíin u kaj óolto'ob, tene' Yuumtzilen. U caajil Israele' taal u caxant a wáantaj, ba'ale' teche' ta beetajabáa bey jun p'éel jalale':

⁷Le ca tu machajecho'obe', j cáacheche', ca ta loobiltaj u ch'ala'atel; le ca tu yóoltajo'ob nactal ti' teche', teche' j cáachech ca ta beetaj u lúubulo'ob.

⁸Le t o'olal tene' le Yuumtzilo' quin wa'alic: Egipto, bin in ca'aj in beet a ba'atelta'al tu yéetel máascab, u ti'al ca quíimsa'ac a cajnáalilo'ob tac a walak ba'alche'ob.

⁹Bíin suunaquech x tocoy caajil, beyo' le wíinico'obo' bíin u kaj óolto'ob tene' Yuumtzilen. Teche' ta wa'alaj: Le Niloo' in ti'al, teen j beete.

¹⁰Ma'alob túuno', tene' quin beetiquinbáa a aj p'eec bey xan u aj p'eec a wáalcab ja'. Bin in ca'aj in sutech jun p'éel x tocoy caaj sajbe'entzil, láaj jeenel, líikbal Migdol tac Asuán, tac tu xuul u jol ch'aaquil Eutiopía.

¹¹Te'elo' mix wíinico'ob mix ba'alche'ob bíin káatco'obi'. Bul cuarenta ja'abo'ob mix máac bíin cajlac te'elo'.

¹²Egipto, tene' bíin in láaj pa'ech; A caajilo'obe' bíin p'áatac jeneelo'ob bul cuarenta ja'abo'ob, bíin p'áatac jach x tocoy caajil ti' u láak jeenel caajo'ob, bíin in tojolch'int táanxel lu'umil a cajnáalilo'ob, bíin in ki'itbeso'ob ichil u láak lu'umo'ob yéetel ichil u láak múuch' caajo'ob.

¹³Teen Yuumtzil, tene' quin wa'alic: Cu dzo'ocol u máan le cuarenta ja'abo'obo', bíin xi'iquen in much'quint le j egipciob ti' le lu'umo'ob tu'ux ki'itpaja'ano'obo'.

¹⁴Le j egipciob bisa'ano'ob kalbilo'obo', bíin in beet u suuto'ob u ti'al ca cajlaco'ob tu noojol Egipto le tu'ux cajnáalo'ob ca'ache', bíin u beeto'ob jun p'éel ajawil ma' nojoch je'el bix u láako'obo'.

¹⁵Leti' bíin u beet u asab chichanil ti' le ajawo'obo', ma' bíin u beetubáa u poolil múuch' caajo'ob tu ca'a téeni', bíin in beet u asab chichantal u ti'al ma' u pa'ic u muuk u láak múuch' caajo'ob;

¹⁶u caajil Israel xane' ma' bíin u ca'a alab óolt Egiptoi', tumen lelo' bíin u beet u kaj óolt bix úuchic u tusicuba'ob le ca j bino'ob u káato'ob áantaj ti' Egiptoe'. Bíin túun u kaj óolto'ob tene' Yuumtzilen.

¹⁷Ti' u yáax kiinil ti' u yáax winalil ti' u ja'abil veintisiete, Yuumtzile' tu t'anajene' ca tu ya'alaj ti' teen:

¹⁸Nabucudonosor u ajawil Babiloniae', dzo'oc u túuxtic u aj ba'atelo'ob u ti'al u ba'atelto'ob Tiro; tuláacal le aj ba'atelo'obo' kolista'abo'ob j pokchaj xan u queléenbalo'ob; ba'ale' mix leti', mix u aj ba'atelo'ob tu ch'a'ajo'ob wa ba'ax ti' le ba'atel tu beetajo'ob Tiro'.

¹⁹Le t o'olal, tene' Yuumtzilen, tene' quin wa'alic: Bin in ca'aj in beet u ch'a'abal Egipto tumen Nabucodonosor u ti'al ca u toc tuláacal u ayikalilo'ob yéetel tuláacal ba'axo'ob yaan ti'; yéetel le ba'axo'ob bíin u yocolto' je'el u yantal u ti'al u bo'otic u aj ba'atelo'obe'.

²⁰Bin in ca'aj in beet u ch'a'abal Egipto tumen Nabucodonosor u ti'al u bo'oticubáa ti' le ba'atel bin u beet tu caajil Tiroo', tumen leti'e' dzo'oc u meyajtiquen. Teen Yuumtzil, teen a'alic.

²¹Ti' le kiino' bíin in beet u ya'abtal u muuk Israel, teech xane' Ezequiel bíin páatac jéechcab t'anico'ob. Bíin túun u kaj óolto'ob tene' Yuumtzilen.