Read Yucateco Ezequiel 3 Bible Online

Ezequiel 3 - Yucateco bible

Ezequiel 3

¹Ca túun tu ya'alaj ti' teen: Xiib teche' jaant le dzíiba', cu dzo'ocole' ca bin a t'an u múuch' caajilo'ob Israel.

²Tin japaj in chi'e ca tu beetaj in jaantic le dzíibo'.

³Cu dzo'ocole' tu ya'alaj ti' teen: Luk le dzíib quin dzáic ti' techa', na'ajcuntabáa tu yéetel. Tene' tin jaantaj, ca tin wu'uyaj sen ch'ujuc bey caabe'.

⁴Ca túun tu ya'alaj ti' teen: Xeen a wa'al ti' u caajil Israel ba'ax unaj in wa'alic ti'.

⁵Tene' ma' táan in túuxtiquech ti' jun p'éel caaj talam u na'atal u t'aan, ti' u caajil Israel quin túuxtiquech.

⁶Ma' táan in túuxtiquech ti' múuch' caajo'ob jela'an u t'aano'ob ti' a t'aan u ti'al ma' a na'atic u t'aano'ob. Ba'ale' wa ca in túuxtech ti' le caajo'obo' je'el u táan óoltico'ob ba'ax bíin a wa'ale'.

⁷Ba'ale' u caajil Israele' ma' bíin u yóolt u táan óoltechi', tumen ma' u káat u táan óolteno'obi'. Tuláacal u caajil Israel nonolqui u pucsi'ikalo'ob, dzu'uy xan u poolo'ob.

⁸Ba'ale' bin in ca'aj in beet u no'oltal a pucsi'ikal je'el bixo'obe' yéetel u dzu'uytal xan a pool ti'ob.

⁹Bin in ca'aj in beet a dzu'uytal je'el bix box took, asab dzu'uy ti' le tuunicho'. Ma' a ch'a'ic sajaquil ti'ob mix u ja'asico'ob a wóol le quéen u dzíijcunto'ob u yicho'ob, quex u sen dzu'uyquint u pucsi'ikalo'ob.

¹⁰Cu dzo'ocole' tu ya'alaj ti' teen: U'uy ma'alob ba'ax cu bin in wa'al ti' teech, ma' u tu'ubul ti' teech.

¹¹Xeen a wil a wéet caajalo'ob bisa'ano'ob táanxel lu'umilo', ca u yóolto'ob yu'ubo'ob t'aan wa ma'e', a'al ti'ob: Je'el le t'aan cu ya'alic Yuumtzila'.

¹²U páajtalil túun Yuumtzile' tu líiksajen, ca tin wu'uyaj tin paach jun p'éel ka'amcach juum bey u quíilbal lu'um, le ca j líik tu cúuchil u nojbe'enil Yuumtzil.

¹³Le juumo' ti' cu jóokol ca'ach tu xiik le aj cuxa'ano'ob le quéen u jili'ichtuba'ob tu baatzilo'ob le xiiko', yéetel ti' le petenche'ob yano'ob tu tzéelo'obo'; le juumo' bey jun p'éel u quíilbal lu'ume'.

¹⁴U páajtalil Kue' tu ch'úuyajen ca tu jóokesajen te'elo', ca j binen sen okom in wóol, yéetel yaj in wóol, ca'aliquile' Yuumtzile', tu ma'alob machajen.

¹⁵Ca j kuchen Tel Abib tu jáal u áalcab ja'il Quebar, tu'ux ki'itpaja'ano'ob le j israelitaobo', ca p'áaten bul siete kiino'ob tu yicnalo'ob, ma' tin caxtaj ba'ax in beeti' mix tin caxtaj ba'ax in wa'ali'.

¹⁶Cu máan le siete kiino'obo' Yuumtzile' tu t'anajene' ca tu ya'alaj ti' teen:

¹⁷Xiib, teche' dzo'oc in dzáiquech a beet a aj cananil u ti'al in caajal Israel. Le quéen in dzáa ti' teech jun p'éel péectzile', u najmal a bin a wa'al ti'ob tin kaaba', u ti'al ca u yojéelto'ob ba'ax quin wa'alic.

¹⁸Ma' xan ca in wa'al u t'aanilo'ob xot kiin tu yo'olal jun túul loolob wíinique'; ba'ale', wa teech ma' ta wa'alic mix ba'al ti' le j loolob wíinico', u ti'al a ka'ajsic u yiik tu yo'olal u p'atic u j loolob cuxtal u ti'al ma' u quíimil, leti'e' bíin quíimic tu yo'olal u keban, ba'ale' bíin in káat ca a cáant ba'ax ta beetaj tu yo'olal ma' u quíimil.

¹⁹Ba'ale' wa teech ca bin a t'an le loolob wíinic u ti'al a wa'al u nu'uc ti'e', wa ma' tu yóoltaj u p'at u kaasil u cuxtal u ti'al ma' u quíimile', leti'e' bíin quíimic tu yo'olal u keban, ba'ale' teche', ma' bíin quíimiquechi'.

²⁰Ma' xan ca kuchuc u kiinil u kéechel u cuxtal jun túul wíinic toj u cuxtale', ca u beet ba'ax kaas, tu yo'olal tin nadzilac tu chi' kebane', wa ma' ta ka'ajsic u yiike', leti'e' bíin quíimic. Tene' ma' bíin in wila'a' le utz tu beetajo', bíin quíimic tu yo'olal u keban, ba'ale' ti' teche' bíin in káat ca cáant ba'ax tu beetaj tu yo'olal ma' u quíimil.

²¹Ba'ale' wa teech ca wa'alic ti' le wíinic ma' u kebanchajal, leti'e' ma' tu kebanchajale', leti'e' ma' bíin quíimiqui' tumen tu táan óoltaj ba'ax ta wa'alaj ti', teche' ca toquic a cuxtal.

²²Yuumtzile' tu dzaj u kab tin wóokol ti'ili'e' cúuchilo', ca tu ya'alaj ti' teen: Líikene' ca xi'iquech te j táax koom lu'umo', tumen ti' quin t'anechi'.

²³Tene' j líikene' ca j binen te j táax koom lu'umo', ca tin wilaj u nojbe'enil Yuumtzile', je'el bix le tin yáax ilaj tu jáal u yáalcab ja'il Quebare'. Ca j noclajen j lu'um,

²⁴ba'ale' u páajtalil Yuumtzile' j ooc ti' tene' ca tu beetaj in wa'atal. Yuumtzil túune' tu t'anajen beya': Xeene' ca a kalabáa ta wotoch.

²⁵U'uye, bíin ka'axaquech yéetel suumo'ob u ti'al ma' u páajtal a jóokol te j caajo'.

²⁶Teen xane' bíin in beet u táakal a waak ta na'aca'an u ti'al a p'áatal tootil. Ma' bíin páatchajac a keyico'obi', quex jun p'éel caaj ma' tu tziquic in t'aan.

²⁷Ba'ale' le quéen in wóolt in wa'al wa ba'ax ti' teche', quin ca'a beetic a t'aan, teech túune' bíin a wa'al ti'ob: Je'el ba'ax cu ya'alic Yuumtzila'. Le máax u káat u'uyaje', bíin u'uyajnac, ba'ale' le máax ma' u káate' ma' bíin u'uyajnaqui'. Tumen leti'obe' jun p'éel caaj ma' tu tziquico'ob in t'aan.