Read Yucateco Ezequiel 30 Bible Online

Ezequiel 30 - Yucateco bible

Ezequiel 30

¹Yuumtzile' tu t'anajene' ca tu ya'alaj ti' teen:

²Wíinic, teche' t'aanen tin kaaba'e' a'al beya': Bey cu ya'alic Yuumtzila': Awat t'aanene'ex tu yo'olal le kiin cu náadzalo'; ¡táan u náadzal u kiinil Yuumtzil! ¡jun p'éel kiin bíin noocoychajac, jun p'éel kiin sajbe'en u ti'al múuch' caajo'ob!

⁴Bíin talac ba'atel tu yóokol Egipto. Le quéen quíimsa'ac ya'abcach máaco'ob, yéetel le quéen ocolta'ac ya'ab u ayikalilo'ob, yéetel le quéen xu'ulsa'ac Egipto tac u chuun pakilo'ob, Etiopíae', bíin jo'op'oc u quiquilanquil.

⁵Bíin quíimico'ob xan ichil ba'atel u aj ba'atelilo'ob Etiopía yéetel Libia, Lidia, tuláacal Arabia, Cub, yéetel u láak caajo'ob, bey xan u láak lu'umo'ob áantic u ti'al j ba'atelo'.

⁶Je'el ba'ax cu ya'alic Yuumtzila': Le máaxo'ob lat'ab pachtic Egiptoe', bíin quíimico'ob ichil ba'atel, líikbal Migdol tac Asuán. U noj ba'alil páajtalil Egiptoe', bíin pa'ajac u subtal. Tene' Yuumtzilen, teen dzáic u t'aanil.

⁷Egiptoe', bíin suunac jun p'éel lu'um láaj asab kascunta'an ti' u chuucáan lu'umo'ob, u noj caajilo'obe' u asab jena'anilo'ob.

⁸Le quéen in beet u tóoca'al u múuch' caajilo'ob, yéetel u láaj quíimsa'al máaxo'ob lat'ab pachtique'. Leti'ob túune'; bíin u káat óolto'ob tene' Yuumtzilen.

⁹Le quéen kuchuc u kiinil u ja'adzal Egiptoe', bíin in túuxt aj bisaj t'aano'ob ti' ka'anab, u ti'al ca u dza'ob sajaquil ti' u náayal óol cajnáalilo'ob Etiopía, bíin chu'upuco'ob yéetel noj sajaquil. Le kiino' chéen ta'aytac u kuchul.

¹⁰Tene' Yuumtzilen, tene' quin wa'alic: Bin in ca'aj in ch'a'a Nabucodonosor u ajawil Babilonia, u ti'al in xu'ulsic u ayikalil Egipto.

¹¹Bíin xi'ico'ob yéetel u aj ba'atelo'ob, máaxo'ob asab loolob wíinico'ob, u ti'al jáay u xu'ulsico'ob le cajnáalilo'ob le lu'umo'. Bíin u ba'atelto'ob Egipto tu yéetel u ca'amat yej máascabo'ob, bíin u p'ato'ob le lu'um chuup yéetel quimeno'obo'.

¹²Bíin in beet u tijil le Niloo', bíin xan in dzáa cajnáalilo'ob le lu'um tu kab loolob wíinico'ob; tu yéetel le j táanxel lu'umilo'obo', bíin in p'at jeenel caajilo'ob le lu'umo' pa'ate' yéetel tuláacal ba'axo'ob yano'obi'. Teen Yuumtzil, teen j a'ale.

¹³Teen, le Yuumtzilo' quin wa'alic: bin in ca'aj in xiixcunt le beetbil kuobo' bin in ca'aj in xu'uls le j ma' jaaj u kuilo'ob Menfis. Egiptoe', ma' bíin yanac tu ca'a téen máax méektáantiqui', cu dzo'ocole' bíin in chup yéetel noj sajaquil u múuch' caajilo'ob.

¹⁴Bíin in sut x lab caajilo'ob u noojol Egipto, bíin in tóoc Soán bíin xan in xot kint Tebas.

¹⁵Bíin in láal in p'uja'anil tu yóokol Sin, u muuk Egipto, bíin xan in xu'uls u ayikalil Tebas.

¹⁶Bíin in t'ab káakt Egipto, Sinee' bíin u ch'o'och'o'otubáa tu yo'olal ki'inam; bíin póot jo'oloc tu tuulumilo'ob Tebas, Menfis xane' bíin ba'atelta'ac tu pika'anil sáasil kiin.

¹⁷U táanquelemilo'ob On yéetel Bubastise', bíin quíimico'ob ichil ba'atel, u chúuca'an u cajnáalilo'obe', bíin ma'achaco'ob bisbil kalbilo'ob.

¹⁸Le quéen dzo'ococ in p'atic x ma' páajtalil Egipto yéetel in pa'ic u muuk tu yo'olal lelo' cu nonoj ba'alcunticubáe', le kiino' bíin éekjoch'e'enchajac tu caajil Taafnes, jun p'éel múuyal bíin balic Egipto, u cajnáalilo'ob u caajilo'ob xane', bíin ma'achaco'ob u ti'al j bisbilo'ob j kalbil.

¹⁹Tene' bíin in béeycunt u xot kiinil Egipto, beyo' bíin kaj óolta'ac túun, tene' Yuumtzilen.

²⁰Ti' siete kiinil ti' u yáax winal ti' le once ja'abo', Yuumtzile' tu t'anajene', ca tu ya'alaj ti' teen:

²¹Tene' dzo'oc in wop'ic u baaquel muuk u kab faraón u ajawil Egipto, mix máac dzacmail mix xan tu to'omail u ti'al ca u ch'a'a u muuk tu ca'a téen u ti'al u machic u ca'amat yej máascab.

²²Le t o'olale', teen Yuumtzile' quin wa'alic: Tene' quin beetiquinbáa jun túul aj p'eec ti' faraón u ajawil Egipto. Bin in ca'acach tu ca'a dzíital u baaquel u muuk u kab, le ma'alobo' bey le caachal ca'acho', bíin in beet ca lúubuc u máascab tu kab.

²³Bin in ca'aj in ki'itbes le egipciob ichil u chuucáan múuch' caajo'obo', bin in ca'aj in ki'itbeso'ob táantanxel lu'umilo'ob.

²⁴Bin in ca'aj in dzáa muuk tu kab u ajawil Babilonia, yéetel bin in ca'aj in dzáa in máascab tu kab. Bin in ca'aj in cach u baaquel u muuk u kab faraón, leti' túune' bíin u yil loobilta'an tu táan u aj p'eec.

²⁵Bíin in mu'uka'anquint u muuk u kab u ajawil Babilonia, bíin in p'at x ma' muukil u muuk u kab faraón. Le quéen in dzáa in máascab tu kab u ajawil Babilonia u ti'al u líikesic tu yóokol Egiptoe', bíin kaj óolta'ac, tene' Yuumtzilen.

²⁶Bíin in ki'itbes le j egipciob ichil u chuucáan caajo'ob yéetel múuch' caajo'obo', bey túuno' bíin kaj óolta'ac, tene' Yuumtzilen.