Read Yucateco Ezequiel 31 Bible Online

Ezequiel 31 - Yucateco bible

Ezequiel 31

¹Ti' u yáax kiinil u yóox p'éel winal ti' u once ja'abile', Yuumtzile' tu t'anajene' ca tu ya'alaj ti' teen:

²A'al ti' faraón u ajawil Egipto, yéetel ti' tuláacal u caajale': ¿Ba'ax yéetel je'el u páajtal u que'etel a nojochile'?

³Beyech jun cúul cipres wa jun cúul u kuulche'il Líbanoe', yéetel u qui'ichquelem kabo'obe' cu dzáic bo'oy te j káaxo', tu yo'olal u jach ca'analile' u ni' u kabo'obe' cu kuchul tac ichil le múuyalo'obo'.

⁴Le cháac yéetel u ja'il le lu'uma', leti'ob áantic j ch'íijil; yanchaj áalcab ja'ob tu bakpach tu'ux paka'an; u ja'ilo'ob cu yáalcabo' tu láaj jóoyabtaj u pakalilo'ob le lu'umo'obo'.

⁵Tu yo'olal yaan ca'ach ya'ab u ja'ile', nojochchaj asab ti' u che'ilo'ob le káaxo'; u kabo'obe' ya'abchajo'ob, ca nojoch xíit'lajo'ob.

⁶Tuláacal u jejeláasilo'ob ch'íich'o'ob cu beetico'ob ca'ach u ku'ob tu kabo'ob; tuláacal u jejeláasil u ba'alche'ilo'ob káaxe' cu yantal ca'ach u mejenilo'ob tu yáanalo'ob. Tu yáanal u bo'oye' cu páajtal u cajtalo'ob ca'ach ya'abcach múuch' caajo'ob.

⁷Jun cúul qui'ichquelem nojoch che' ca'achi, jach chowactac u kabo'ob, tumen u mootzo'obe' cu kuchla'ajal tu'ux ca'ach yaan ya'abcach ja'.

⁸Mix jun cúul ti' le kuulche'ob yano'ob tu x péetpach u pakal nicte' Ku cu páajtal ca'ach u queticubáa tu yéetele'; mix jun cúul pino yaan ca'ach u kabo'ob je'el bix yanil u kabo'ob leti'e', mix jun cúul castaño yaan u le' je'el bix yanil u le' leti'e', mix jun cúul u che'il u x péetpach u pakal nicte' Ku je'el u que'etel ca'ach yéetel u qui'ichquelmile'.

⁹Tene' j beet qui'ichquelem yéetel ya'abcach u kabo'ob, u láak u che'ilo'ob u x péetpach u pakal nicte' Ku, dzíibolta'an ca'achi.

¹⁰Tu yo'olal lelo', bey u ya'alic Yuumtzila': Le che'o' jach ca'analchaji, kuch tac ichil le múuyalo'obo'; tu yo'olal sen nojochchajico' j chu'up x ca'anal ichil.

¹¹Le t o'olalo' tene' dzo'oc in dzáic jun tzéelil; bin in ca'aj in cha'a u lúubul tu kab jun túul náacom táanxel lu'umil, u ti'al ca u loolob t'ant je'el bix cu najmatic u kasa'anile'.

¹²U asab loolob j táanxel lu'umilo'ob wíinico'obe' leti'ob bíin ch'aquic u ti'al ca u xúunp'atto'ob; u kabo'obe' bíin lúubuco'ob ca'acacho'ob ti' tuláacal pu'uco'ob, táax koom lu'umo'ob yéetel u ko'opilo'ob, cu dzo'ocole' tuláacal le máaco'ob cajnáalo'ob ca'ach tu yáanal u bo'oyo'obo', bíin u xúunp'atto'ob.

¹³Tuláacal u jejeláasil ch'íich'o'ob bíin talaco'ob u beet u ku'ob ti' le che' luba'ano', bey xan u jejeláasil ba'alche'ob bíin talaco'ob j chital tu yóokol u kabo'ob.

¹⁴Mix jun cúul che' bíin sen nojochchajac tu ca'a téen quex ti' yaan tu jáal ja'e', quex sen jóoyabta'aque', ma' bíin ca'a kuchuc u ni' che'il ich múuyalo'obi', mix bíin kuchuc buca'aj ca'analilo'. Tuláacalo'ob láaj xot kinta'ano'ob u ti'al j quíimil, u ti'al ca éemeco'ob cajtal tu caabalil u yóokolcaab tu yáanal lu'um u ti'al u yantalo'ob ichil le yano'ob tu mucnalo'obo'.

¹⁵Tene', Yuumtzilen, tene' quin wa'alic: le quéen éemec le che' tu ajawil le quíimilo', bíin in beet u tijil le taamtam ka'anab tu yo'olal óotzil óolal; bíin in kat u beel le áalcab ja'ob tac xan le t'o'ol ja'obo'; tu yo'olal leti'e' bíin in beet u yantal yaj óolal ti' u che'ilo'ob Líbano yéetel bíin tijic tuláacal u che'ilo'ob le káaxo'.

¹⁶Le quéen in beet u yéemel tu ajawil quíimil u ti'al in much'quintic yéetel le máaxo'ob dzo'oc u quíimilo'obo', u juum u lúubulo'obe' bíin u beet u quíilbal le múuch' caajo'obo'. Beyo' te tu yáanal le lu'umo', bíin qui'imachajac u yóolo'ob u che'ilo'ob Edén, u asab jadzutztaquilo'ob yéetel u asab ma'alobil jóoyabta'anilo'ob le Líbano'.

¹⁷Leti'ob xane' bíin éemeco'ob tu yéetel tu ajawil le quíimil je'el bix leti'e', u ti'al u much'juba'ob tu yéetel le j quíimo'ob ich ba'atelo'. Le yano'ob ca'ach tu bo'oyo'obo', bíin ki'itpajaco'ob ichil múuch' caajo'ob.

¹⁸Mix jun cúul ti' u che'ilo'ob Edén je'el u que'etel ca'ach tu yéetel u jadzutzil yéetel u ca'analile'; ba'ale' bíin éemec yéetel u chuucáan u che'ilo'ob Edén tu yáanal le lu'umo', u ti'al j cajtal ichil ma' ocsaj óol wíinico'obo', yéetel wíinico'ob j quíimo'ob ti' ba'atel. Le che'o', faraón pa'ate' yéetel u caajal. Teen Yuumtzil, teen a'alic.