Read Yucateco Ezequiel 32 Bible Online

Ezequiel 32 - Yucateco bible

Ezequiel 32

¹Ti' u yáax kiinil ti' u winalil doce ti' u doce ja'abe', Yuumtzile' tu t'aanajene' ca tu ya'alaj ti' teen:

²Kay u kaayil quíimil, ti' faraón u ajawil Egipto: Beyech jun túul león ichil le múuch' caajo'obo'; beyech jun túul u ba'aba'alil ka'anabe': ca ponponchaak ichil a wáalcab ja'il, ca p'u'ukbesic le ja' yéetel a wooco'ob, ca xa'akbesic le ja' cu yáalcabo'.

³Je'el ba'ax cu ya'alic Yuumtzila': Quex tumen ti' yanech ichil ya'ab caajo'obe', bíin in pul in x léecheb ta wóokol u ti'al in léechtiquech.

⁴Bíin in jíiltech j lu'um, bíin xan in p'atech tudzucbal. Bíin in beet u t'úuchul u jejeláasil ch'íich'o'ob ta wóokol, ca xan na'ajchajco'ob yéetel a bakel tuláacal u dzíidzic ba'alche'ilo'ob káax.

⁵Bíin in chup le káaxo'ob le táax kóom lu'umo'ob tu yéetel u x tu'utu' bakel a wíinclil.

⁶Bíin in pa'apak a ki'ikel te j lu'umo', lelo' bíin kuchuc tac te j pu'uco'obo', yéetele' bíin chu'upuc u beel le áalcab ja'obo'.

⁷Le quéen in ch'éejseche', bíin in beet u yéekjoch'e'ental ca'an bey xan bíin in beet u tu'upul eeko'ob; le kiino' bíin in bal tu yéetel múuyalo'ob, le lunaob ma' bíin ca'a léembalnaqui'.

⁸Ta wo'olale', bíin in láaj tup u sáasililo'ob ca'an, bey xan bíin in chup a lu'um tu yéetel éekjoch'e'enil. Teen Yuumtzil, teen a'alic.

⁹Le quéen kuchuc u péectzilil a ch'éejsa'al te j múuch' caajo'ob ma' kaj óoltmaj ca'acho', bíin in beet u chi'ichnactal ya'ab caajo'ob.

¹⁰Ta wo'olale' bíin in beet u yantal noj sajaquil ichil ya'abcach caajo'ob; U ajawilo'obe' bíin chu'upuco'ob yéetel sajbe'enil le quéen in pi'ikt in máascab tu táano'ob. Le quéen lúubuqueche', bíin quiquilnaco'ob tu yo'olal u cuxtalo'ob.

¹¹Yuumtzile' cu ya'alic: U ca'amat yej máascab ajaw Babiloniae' bíin taalac ta wóokol.

¹²Bin in ca'aj in beet u lúubul quimen a nojoch caajal yéetel u ch'aac máascabo'ob j loolob aj ba'atelo'ob. Bíin u xu'ulso'ob nojchil Egipto, bíin u xu'ulso'ob le yaan cach caajo'.

¹³Bíin in xu'uls tuláacal le wacaxo'ob cu yukulo'ob ti' a ja'il, ta wicnalo', cu dzo'ocole' mix bikin bíin pu'ukta'aco'ob tu ca'a téen tumen wa máax mix tumen ba'alche'ob yéetel u yooco'ob.

¹⁴Teen túune' bíin in beet u sáasiltal u ja'il le áalcab ja'obo', le áalcab ja'ob xano' bíin áalcabnaco'ob xan jedzecnac bey u yáalcab aceitee'. Teen Yuumtzil, teen a'alic.

¹⁵Le quéen in sut Egipto x tocoy lu'umil yéetel le quéen p'áatac mix máac cajnáal ti' le caajo', bíin u kaj óolto'ob túun tene' Yuumtzilen.

¹⁶Lela' jun p'éel u kaayil quíimil, bey unaj u ka'ayal tumen u x co'olelilo'ob le jejeláas múuch' caajo'ob le quéen u yokto'ob Egipto yéetel tu yo'olal u ya'abcach cajnáalilo'obe'. Teen Yuumtzil, teen a'alic.

¹⁷Ti' u quince kiinil ti' u doce winalil ti' u doce ja'abile', Yuumtzile' tu t'anajene' ca tu ya'alaj ti' teen:

¹⁸Wíinic, teche' kaaynen yéetel u múuch'ul u co'olelilo'ob jejeláas múuch' caajo'ob jun p'éel u kaayil quíimil tu yo'olal u ya'abcach cajnáalilo'ob Egipto, bey xan tu yo'olal u nuuquilo'ob: Le j nucuch ba'alo'obo' cu bino'ob yáanal lu'um, tu yéetel le máaxo'ob dzo'oc u yéemelo'ob j mucnalo'.

¹⁹¿Ca tucultic Asab qui'ichquelemech ti' u chuucáano'ob? Éemene' ca xan peclaquech tu tzéel le j ma' ocsaj óolo'obo'.

²⁰Leti'obe' bíin quíimico'ob pa'ate' yéetel le máaxo'ob cu lúubulo'ob ich ba'atelo'. Le ca'amat yej máascabo' nu'ucbesa'an. Tu yéetelo'obe' bíin xi'ico'ob u nucuch múuch' caajilo'ob.

²¹Le náacomo'ob jach nucuch ba'alo'obo', leti'ob bíin kamo'ob le j egipciob yéetel máaxo'ob áantic tu ajawil le quíimil, táan u ya'alico'ob: ¡Dzo'oc u yéemelo'ob! ¡J p'áato'ob jayacbalo'ob le ma' ocsaj óolo'obo', j quíimo'ob ichil ba'atel!

²²Te'elo' ti' yaan Asiria pa'ate' yéetel tuláacal u aj ba'atelo'ob tu bakpach u mucnalo'. Tuláacalo'ob láaj quíimo'ob ich ba'atel.

²³Muca'ano'ob tu asab taamil le mucnalo'. U aj ba'atelo'obe' tu yocsajo'ob sajaquil ichil le cuxa'ano'ob ca'acho', ba'ale' j lúubo'ob quimentaco'ob ichil ba'atel, bejela' xane' u súutpaachtmajo'ob u mucnal Asiria.

²⁴Te'elo' ti' yaan Elam yéetel tuláacal u aj ba'atelo'ob tu súutpaach u mucnale'. Tuláacalo'ob j quíimo'ob ichil ba'atel, j ma' ocsaj óolo'ob j lúubo'ob tu yáanal lu'um. Tu yocsajo'ob noj sajaquil ichil le máaxo'ob cuxa'ano'obo', ba'ale' bejela'e' ti' yano'ob x ma' tziiquil tu yéetel le máaxo'ob j éemo'ob ichil mucnalo'.

²⁵Elame' ti' tudzucbal tu chúumuc le máaxo'ob j quíimo'ob ichil tuláacal u aj ba'atelo'ob, tuláacalo'obe' j ma' ocsaj óolo'ob le j quíimo'ob ich ba'atel, bejela'e' u súutpachmajo'ob u mucnal. Tu yocsajo'ob noj sajaquil ichil le cuxa'ano'obo', ba'ale' bejela'e' ti' yano'ob x ma' tziiquil ichil le j éemo'ob te j mucnalo'. J p'áato'ob ichil wíinico'ob quíimsa'ano'ob.

²⁶Te'elo' ti' yano'ob Mesec yéetel Tubal, pa'ate' yéetel u aj ba'atelo'ob tu súutpaach u mucnali', tuláacalo'ob j ma' ocsaj óolo'ob quíimo'ob ichil ba'atel, tu yoquesajo'ob ca'ach noj sajaquil ichil le cuxa'ano'obo'.

²⁷Ma' muca'ano'ob tu yéetel le úuchben nucuch aj ba'atelo'ob j éemo'ob u ch'a'amajo'ob u nu'ucul u ba'atelo'ob tu ajawil le quíimilo', le u káan pooltmajo'ob u ca'amat yej máascabo'ob, u chimalo'ob dza'ano'ob tu yóokol u wíinclilo'ob, cu dzo'ocol u yocsico'ob nojoch sajaquil ichil le máaxo'ob cuxa'ano'obe'.

²⁸Egipto teche', ti' bíin yanaquech tu chúumuc le j ma' ocsaj óolo'obo', xe'exe'et'a'an yéetel muca'ano'ob pa'ate' yéetel u quimenilo'ob ba'atele'.

²⁹Te'elo' ti' yaan Edom yéetel u ajawilo'obi' bey xan u méektáano'obi'. Quex tumen nucuch ba'alo'ob ca'achi, ti' yano'ob ichil u quimenilo'ob ba'atele', muca'ano'ob ichil ma' ocsaj óolo'ob, ichil máaxo'ob j éemo'ob ich mucnal.

³⁰Te'elo' ti' yaan tuláacal u náacomilo'ob j xamani', bey xan tuláacal le j sidonilo'obo'. Jach yaan ca'ach u páajtalilo'ob yéetel tu yoquesajo'ob noj sajaquil, ba'ale' bejela'e' dzo'oc u yéemelo'ob ichil u quimenilo'ob ba'atel, chuupo'ob tu yéetel sublaquil. J ma' ocsaj óolo'ob, muca'ano'ob xan x ma' tziiquil ichil u quimenilo'ob ba'atel, ichil le máaxo'ob j éemo'ob ichil mucnalo'.

³¹Le quéen u láaj ila'a faraone', bíin utzac tu yóol úuchic u quíimil tuláacal u caajal, tumen tuláacal u aj ba'atelo'obe' j quíimo'ob ichil ba'atel. Teen Yuumtzil, teen a'alic.

³²Le faraono' tu yoquesaj noj sajaquil ichil le cuxa'ano'obo'; le t o'olal muca'an ichil le j ma' ocsaj óolo'obo', ichil u quimenilo'ob ba'atel, bey xan u ya'abcach aj ba'atelo'ob. Teen Yuumtzil, teen a'alic.