Read Yucateco Ezequiel 33 Bible Online

Ezequiel 33 - Yucateco bible

Ezequiel 33

¹Yuumtzile' tu t'anajene' ca tu ya'alaj ti' teen:

²Wíinic teche' t'an a wéet caajalo'obe' ca a wa'al ti'ob: Le quéen in túuxt ba'atel ti' jun múuch' caajo'obe', u cajnáalilo'ob le caajo' cu yéeyico'ob jun túul ichilo'ob u ti'al u beet u aj canan caaj.

³Le aj canan caajo', le quéen u yila'a táan u taal múuch'ul u aj ba'atelo'ob le aj p'eeco'obo', cu jóopsic u paaxil u ti'al u yojéeta'al tumen caaj.

⁴Wa yaan máax ma' tu táan óoltic jun le paaxo', wa cu kuchul j quíimsbil tumen le aj p'eeco', ti' leti' yaan u si'ipilil úuchic u quíimil,

⁵tumen tu yu'ubaj u juum le paaxo', ba'ale' ma' tu táan óoltaji'; ti' leti' yaan u si'ipilil úuchic u quíimil, tumen wa ca u táan óolte' ma' ca'ach tu quíimsa'ale'.

⁶Ba'ale' wa le aj canan caaj cu yilic u kuchul u aj ba'atelo'ob le aj p'eeco'ob, ma' tu jóopsic u paaxil u ti'al ojéeltbil tumen caaje', wa cu kuchulo'ob le aj p'eeco'ob wa cu quíimsico'ob wa máaxe', le máaco' bíin quíimic tu yo'olal u keban, ba'ale' tene' bíin in beet u cáantic u si'ipil tu yo'olal le máax j quíimo'.

⁷Wíinic, teech túune' dzo'oc in dzáiquech u ti'al u aj cananil in caajal Israel. Teche' u najmal a wu'uyic ba'axo'ob quin wa'alic u ti'al ca wa'al ti'ob.

⁸Je'el u yantal ba'ax o'olal in xot kintic u ti'al j quíimil jun túul loolob wíinique'; wa teech ma' ta wa'alic ti' ca u p'at u kebane', wa leti' ma' tu p'atique', le loolob wíinico', bíin quíimic tu yo'olal u keban, ba'ale' bíin in p'is óoltech tu yo'olal úuchic u quíimil.

⁹Ba'ale' wa teech ca a wa'alic ti' le j loolob wíinic ca u p'at u kebane', ba'ale' leti' ma' tu p'atique', leti'e' bíin quíimic tu yo'olal u keban, ba'ale' teche' ca jechic le quíimilo'.

¹⁰Wíinic, teche' a'al ti' u caajil Israel: Te'exe' ca wa'alique'ex: To'one' chuupo'on yéetel si'ipilo'ob bey xan yéetel keban. Le t o'olal táan c tu'utal bey cuxa'anilo'ona'. ¿Bix je'el u páajtal c cuxtale'?

¹¹Ba'ale', teen Yuumtzile', quin jalach t'antic tu yo'olal in cuxtal ma' in káat ca quíimic le j loolob wíinico', ba'ale' in káat ca u kex u cuxtal tu yo'olal u jechic le quíimilo'. Israel, p'at le a kaakas cuxtalo'. ¿Ba'ax o'olal bíin quíimiquech?

¹²Wíinic, teche' a'al ti' a wéet caajalo'ob: Wa cu kebanchajal jun túul utzil máaque', ma' tu yo'olal yúuchben utzil bíin u jech le quíimilo', wa jun túul loolob máac cu p'atic xan u loolob cuxtale', ma' tu yo'olal u yúuchben kasa'anil bíin beeta'ac u quíimili'. Wa cu kebanchajal jun túul utzil máaque', u yúuchben utzile' mix ba'al u biilal u ti'al ca cuxlac.

¹³Wa quin séeb chi'itic cuxtal ti' jun túul utzil máaque', wa cu tucultic tu yo'olal utzil cu beetic ba'ax kaase', ma' bíin in tucult wa tu beetaj ba'ax yutzi', ba'ale' bíin quíimic tu yo'olal le kaas tu beetajo'.

¹⁴Wa quin xot kintic j quíimil jun túul j loolob wíinique', ba'ale' leti'e' cu p'atic u keban, cu beetic xan ba'ax ma'alob yéetel ti'ibilile' bíin cuxlac,

¹⁵yéetel cu sutic le ba'ax tu kamaj u ti'al u chíiculal p'aax, wa le ba'ax u yocoltmajo', cu dzo'ocbesic xan in wa'almaj t'aano'ob cu dzáico'ob cuxtal, yéetel cu xulic u beetic ba'ax kaase', jach tu jaajile' bíin cuxlac, ma' bíin quíimiqui'.

¹⁶Tu yo'olal ma'alob u cuxtal bejela'e' yéetel ti'ibil ba'ax cu beetique', bíin cuxlac, ma' bíin ka'ajac ti' teen mix jun p'éel u kebano'obi'.

¹⁷A wéet caajalo'obe' bíin wal u ya'alo'ob ma' tu beel ba'ax quin beetique'; ba'ale' leti'ob beetic ba'axo'ob ma' tu beeli'.

¹⁸Wa le utzil máac cu xulic u beetic ba'ax utz, cu beetic ba'ax kaase', bíin quíimic tu yo'olal lelo'.

¹⁹Ba'ale' wa le loolob máac cu xulic u beetic ba'ax kaas, cu beetic ba'ax utze', bíin cuxlac tu yo'olal lelo'.

²⁰Te'exe' ca babal a'alique'ex: Yuumtzile' ma' tu beel ba'ax cu beetiqui'. Ba'ale' j israelitaex bíin in p'is óolte'ex ta jujun túulile'ex tu yo'olal ba'ax ca beetique'ex.

²¹Ti' u cinco kiinil ti' u diez winalil ti' u doce ja'ab tojolch'inta'aco'on t lu'ume', jun túul máac j púudz ca'ach líikbal tu caajil Jerusalene' j taale' ca tu tzicbaltaj ti' teen, dzo'oc bin u lúubul Jerusalén tu kab le aj p'eeco'.

²²Jun p'éel áakab ma'ili' kuchuc le máax púudzo', Yuumtzile' dzo'oc ca'ach u dzáic u kab tin wóokol; tu ja'atzcab kiinil le ca j taal le máaco', Yuumtzile' tu beetaj in ca'a t'aane', ca j p'áat ma' tooteni'.

²³Yuumtzile' tu t'anajene' ca tu ya'alaj ti' teen:

²⁴Le wíinico'ob cajnáalo'ob tu jeenel caajilo'ob Israelo', táan u máano'ob u ya'alico'ob: Abrahame', tu juun ca'achi, ba'ale' j kuch u ti'alint le lu'umo'oba'; je'el bix ya'abo'ona' je'el c ti'alintique'ex le lu'umo'oba'.

²⁵Bey túuno', a'al ti'ob: Bey u ya'alic Yuumtzila': Te'exe' ca jaantique'ex bak pa'ate' yéetel u ki'ikel, ca kultique'ex beetbil kuob, ca beetique'ex a quíimsaj wíiniquile'ex, ¿ca tucultique'ex je'el a kuchule'ex a beetjaba'ex u yuumil le lu'umo'oba'?

²⁶Ca machique'ex u nu'uculo'ob a meyaj loobe'ex, ca beetique'ex ba'axo'ob in p'ectmaj, tuláacale'ex ca núup kebantale'ex, ¿ca tucultique'ex je'el a beeticaba'ex u yuumil le lu'umo'oba'?

²⁷A'al ti'ob xan: Bey u ya'alic Yuumtzila': Quin jalach t'antic tu yo'olal in cuxtal, bíin quíimsa'aco'ob xan le máaxo'ob cajnáalo'ob ti' le jeenel caajo'obo', le cajnáalo'ob te j káaxo' bíin in beet u jaanta'alo'ob tumen le j chi'ibal ba'alche'obo', cu dzo'ocole' le cajnáalo'ob ichil áactuno'obo' bíin quíimico'ob tu yéetel koja'anilo'ob.

²⁸Le lu'umo'oba' bíin in sut x tocoyil bey xan jeenel u caajilo'ob, bíin in pa'a le u muuk tu yo'olal ca'analchaj u yicho'. U káaxilo'ob Israele', bíin p'áataco'ob chakanilo'ob; mix máac bíin káatac ichilo'obi'.

²⁹Le quéen dzo'ococ in sutic x tocoyil yéetel x lab caajil u lu'umo'ob tu yo'olal le p'ecbe'en ba'alo'ob tu beetajo'obo', bíin u kaj óolto'ob, tene' Yuumtzilen.

³⁰A wéet caajalo'obe' cu t'aano'ob ta wo'olal tu chuun le tuulumo'obo' yéetel tu tzéel u jool najilo'ob le najo'obo', cu ya'alico'ob tu baatzilo'ob: Co'otene'ex, cone'ex u'uyic ba'ax péectzilil cu túuxtic ti' to'on Yuumtzil.

³¹Beyo' in caajale' cu taal j cutal ta táan je'el bix suuquil u beetique', u ti'al u yu'ub ba'ax bíin a wa'ale. Ba'ale' ma'atech u dzo'ocbesico'ob. Cu babal a'alico'ob óoli' bey le kaayo'ob cu kayic máax cu yichtic jun túul x ch'úupale', ba'ale' u pucsi'ikalo'obe' ti' cu bin tu paach taakine'.

³²Leti'obe' cu tucultico'ob jun túul aj kaay cu kayic u kaayil máax cu yichtic jun túul x ch'úupale', máax qui'ichquelem u kaay yéetel ma'alob xan u paxic arpa. Cu ch'en xiquintico'ob a t'aan, ba'ale' ma' tu dzo'ocbesico'ob.

³³Ba'ale' bíin úuchuc tuláacal; le quéen béeychajaque', bíin u kaj óolto'ob yaan aj bóobat ichilo'ob.