Read Yucateco Ezequiel 34 Bible Online

Ezequiel 34 - Yucateco bible

Ezequiel 34

¹Yuumtzile' tu t'anajene' ca tu ya'alaj ti' teen:

²Wíinic, teche' t'aanen tin kaaba' tu yóokol u aj canano'ob in caajal Israele', a'al ti'ob: Je'el ba'ax cu ya'alic Yuumtzila': ¡Yaj yanil u aj canano'ob Israel, cu cananticuba'ob tu juunalo'ob! Ba'ax j tamanilo'ob u najmal u canantic le aj canano'obo', leti' le múuch' caajo'obo'.

³Te'exe' ca wukique'ex leche, ca beetique'ex a búuque'ex yéetel u tzo'otzelo'ob, ca quíimsique'ex u asab poloctaquilo'ob, ba'ale' ma' ta canantique'ex le j tamano'obo'.

⁴Te'exe' ma' ta wáantique'ex le j tamano'ob mina'an u muuko'obo', mix ta dzaquique'ex le koja'antaco'obo', mix ta to'ique'ex u yooc le j taman caachal u yooco', mix ta dzáique'ex tu tojil bej le máaxo'ob keechel u bino'obo', mix ta bine'ex a caxte'ex le dzo'oc u sa'atalo'obo', ba'ale' ca jadzique'exo'ob yéetel ca loobiltique'exo'ob.

⁵In j tamano'obe' j p'áato'ob ma' aj cananil, ca j ki'itpajo'obe', ca jaanta'abo'ob tumen j chi'ibal ba'alche'ob.

⁶Ki'itpajo'ob ti' tuláacal káaxo'ob yéetel ti' ca'anal pu'uco'ob, bey jo'ol lu'umo'ob, j sa'ato'ob ti' tuláacal yóokolcaab, ma' j yanchaj máax yaj óoltico'ob u ti'al ca xi'ic u caxanto'obi'.

⁷Bey túuno' aj canan j tamane'ex u'uye'ex ba'ax quin bin in wa'ale.

⁸Teen Yuumtzil, tene' quin jalach t'antic tu yo'olal in cuxtal: Le u jejeláasil chi'ibal ba'alche'ob, tu yocoltajo'ob yéetel tu jaantajo'ob in j tamano'obo', tumen mina'an u aj canan j tamano'ob. In aj canan j tamano'obe' ma' tu bino'ob u caxanto'ob le j tamano'obo'. Le aj canan j tamano'obo' cu cananticuba'ob tu juunalo'ob, ba'ale' ma' tu canantico'ob in j tamano'ob.

⁹Le t o'olale' aj canan j tamane'ex u'uye'ex le t'aano'ob

¹⁰teen Yuumtzile' quin wa'alic ti' te'ex: J canan j tamane'ex tene' quin beetiquinbáa in aj p'eeque'ex, bíin in ca'aj in káat ti' te'ex ca kube'ex teen in j tamano'ob; bin in ca'aj in tzele'ex ti' a j cananile'ex, tu yo'olal ca xu'uluc a cananticaba'ex ta juunale'ex; bíin in toc ti' te'ex in j tamano'ob tu yo'olal ca jáawac a jaantique'exo'ob.

¹¹Tene' Yuumtzilen, tene' quin wa'alic: Teen bíin in canant in j tamano'ob ma' u yaanali'.

¹²Je'el bix le aj canan j taman cu dzáic u yóol ti' u j tamano'ob le quéen u yila'a ki'itpaja'ano'ob, bey bíin in beet tu yéetel in j tamano'ob; bíin xi'iquen in ch'a'ob tu cúuchil tu'ux ki'itpaja'ano'ob ti' jun p'éel u yéekjoch'e'enil chac iikal.

¹³Bíin xi'iquen in ch'a'ob ti' táanxel caajilo'ob, bíin in much'quinto'ob, bíin in biso'ob tu lu'umo'ob. Bíin in biso'ob janal tu káaxilo'ob Israel, yéetel ti' le t'o'ol ja'obo', yéetel ti' tuláacal tu'ux yaan u cajnáalilo'ob le lu'umo'obo'.

¹⁴Bíin in biso'ob u jaanto'ob u asab ma'alobil xíiw tu ca'anal pu'uquilo'ob Israel. Te'elo' bíin páatac u je'elelo'ob yéetel u jaantico'ob u asab ma'alobil janalo'ob.

¹⁵Teen bíin in canant in j tamano'ob ma' u yaanali', teen bíin in biso'ob je'elel. Teen Yuumtzil, teen a'alic.

¹⁶Bíin in caxant le j tamano'ob saatalo'obo', bíin in taas le tzéelo'ob ti' u beelo'obo', bíin in to'o u yooc le caachal u yooco'obo', bíin in wáant le lúubul u muuko'obo' yéetel bíin in canant le poloctaco'ob yéetel mu'ukano'obo'. Teen bíin in cananto'ob je'el bix u najmale'.

¹⁷Teen Yuumtzil, tene' quin wa'alic: In j tamane'ex ch'en xiquintene'exi': Bin in ca'aj in beet ba'ax ti'ibil ichil mejen j tamano'ob yéetel ichil in mejen j yuuco'ob.

¹⁸¿Ma' utz ta wóole'ex a jaantique'ex ma'alob xíiwo'ob, ba'ale' ca xanabcha'atique'ex xan le cu p'áatalo'ob? Ca wukique'ex le sac ja'o', u yalabe' ca pu'uktique'ex yéetel a wooque'ex.

¹⁹Beyo' in j tamano'obe' yaan u jaantico'ob le xíiwo'ob dzo'oc a xanabcha'atique'exo' yéetel yaan u yukico'ob le ja' dzo'oc a pu'uktique'exo'.

²⁰Let o'olale', teen Yuumtzil, tene' quin wa'alic: Bin in ca'aj in beet ba'ax ti'ibil ichil le j tamano'ob poloctaco'ob yéetel le dzoya'antaco'obo'.

²¹Te'exe' ta lelench'intaje'ex le j ma' muuko'ob u ti'al a náachcuntique'exo'ob, ta kóokochaje'exo'ob yéetel lelo' ta beetaje'ex u púudzulo'ob.

²²Ba'ale' tene' bin in ca'aj in toc in j tamano'ob. Bin in ca'aj in wet' u yocolta'alo'ob. Ma' bíin in cha'a' a u bin u bin a wocoltique'exi'. Bin in ca'aj in beet ba'ax ti'ibil ichil in j tamano'ob.

²³Bin in ca'aj in beet u sut in palitzil David, u ti'al ca in dzáa aj cananil chéen leti', leti' bíin canantico'ob. Leti' bíin u beet u aj canan j tamanil.

²⁴Teen Yuumtzil, teen bíin u Kuinten, in palitzil Davide' bíin u beet u aj nojochil. Teen Yuumtzil, teen t'aanajen.

²⁵Bin in ca'aj in beet jun p'éel nup t'aan tu yéetelo'ob, u ti'al ca in dzáa ti'ob u jaajil jéedzel. Bíin in beet u mina'antal j chi'ibal ba'alche'ilo'ob le lu'umo'obo', tu yo'olal u yantal jéedzel ti' in j tamano'ob ti' jéechcab cool yéetel u ti'al ca weneco'ob ti' le káaxo'obo'.

²⁶Tene' bíin in dzáa in j tamano'ob tu bakpach in quili'ich pu'uc, u ti'al ca in qui' t'anto'ob; bíin in túuxt u qui' t'aanilo'ob u káaxal ja' je'el bix u najmale'.

²⁷U che'ilo'ob le káaxo'obo' bíin yanac u yicho'ob, le lu'umo' bíin u dza'ob u joochilo'ob, yéetel leti'obe' bíin cajlaco'ob yéetel jéedzel tu lu'umo'ob. Le quéen in toc in caajal ti' máaxo'ob palitziltmaile', bíin túun kaj óolta'ac tene' Yuumtzilen.

²⁸Ma' bíin ch'a'abaco'ob tumen j táanxel caajilo'obi', mix bíin jaanta'aco'ob tumen j chi'ibal ba'alche'obi'. Bíin cajlaco'ob yéetel jéedzel, mix máac bíin ja'asic u yóolo'ob.

²⁹Bíin in dzáa pakalo'ob ti'ob ma'alob u dzáico'ob yich, ma' bíin u ca mukyajto'ob wi'iji mix xan bíin p'a'astaco'ob tumen u láak múuch' caajo'obi'.

³⁰Bey túuno' bíin kaj óolta'ac teen Yuumtzilen, teen yanen tu yéetelo'ob, yéetel Israele' in caajal. Teen Yuumtzil, teen a'alic.

³¹Te'exe' in j tamane'ex, u j tamanile'ex in cool. Tene' a Junab Kuene'ex. Teen Yuumtzil, teen a'alic.