Read Yucateco Ezequiel 35 Bible Online

Ezequiel 35 - Yucateco bible

Ezequiel 35

¹Yuumtzile' tu t'anajene' ca tu ya'alaj ti' teen:

²Sutubáa tu tojil u pu'uquil Seire', ca tacpoolt tin kaaba'.

³A'al ti': Bey u ya'alic Yuumtzila': U pu'uquil Seir tene' quin beetquinbáa a aj p'eec, bin in ca'aj in jadzech u ti'al ca in p'atech x tocoy x lab caajil.

⁴Bin in ca'aj in p'at jeenel a caajilo'ob, bíin suunaquech jun p'éel x tocoy lu'umil. Bíin kaj óolt túun, tene' Yuumtzilen.

⁵Teche' ta beetajabáa u aj p'eec mina'an u xuul le j israelitaobo', ta ba'ateltajo'ob tu kiinil táan u kamico'ob u dzooc u jaadzil u kebano'ob.

⁶Ba'ale', teen Yuumtzile', quin jalach t'antic tu yo'olal in cuxtal bíin in kubech ti' quíimil, quíimil bíin u ch'a'apachtech. Teche' si'ipilnajana'anech u ti'al j quíimil, le quíimilo' leti' bíin ch'a'apachtiquech.

⁷U pu'uquil Seir, bin in ca'aj in p'atech x tocoyil yéetel jeenel caajil, ma' bíin in cha'a u ca'a máan mix máac ta lu'umilo'obi'.

⁸A pu'uquilo'ob, a jo'ol lu'umilo'ob, a táax kóom lu'umilo'ob yéetel a wáalcab ja'ilo'obe', bin in ca'aj in beet u chu'upul tu yéetel u quimenilo'ob ba'atel.

⁹Bíin in p'atech x tocoyil u ti'al kiino'ob mina'an u xuul, mix máac bíin cajlac ta caajilo'ob. Bey túuno' bíin a kaj óolte'ex, tene' Yuumtzilen.

¹⁰Teche' ta wa'alaj: U múuch' caajilo'ob Israel yéetel u ca'a p'éel ajawilo'obe', bíin in ti'alinte; bíin u yuumilten, quex ti' caja'an Yuumtzili'.

¹¹Ba'ale' teen, Yuumtzile', bíin in jalach t'ant tu yo'olal in cuxtal bin in ca'aj in beet ta wéetel le ba'ax ta beetaj ti' Israel, yéetel tuláacal a p'uja'anil, a loolob dzíibolaj yéetel a p'ectajile'. Le quéen in jadzeche', leti'obe' bíin u kaj óolteno'ob.

¹²Bey túuno' bíin a wila'a teen Yuumtzile', tin wu'uyaj tuláacal le pooch'ilo'ob ta beetaj ti' u pu'uquilo'ob Israelo'. Teche' ta wa'alaj: ¡Chéen x tocoy lu'umo'ob; bejela'e' je'el u páajtal c lukico'obe'!

¹³Ta japaj a chi' u ti'al a t'aniquen j ba'atel, ta p'u'up'uchaj a waak iquil a wa'alicten ba'al. Tene' tin wu'uyaj.

¹⁴Teen Yuumtzil, je'el ba'ax quin wa'alica': Tuláacal lu'um bíin qui'imacchajac u yóol le quéen in xu'ulsech.

¹⁵Teche', j qui'imacchaj a wóol le ca j xiixcunta'ab le múuch' caajo'ob tu kamaj u ti'alinto', ba'ale' bey bíin úuchuc ti' teech xano': teech u pu'uquil Seir u lu'umil Edom bíin p'áatquech x tocoyil. Bey túuno' bíin a kaj óolt tene' Yuumtzilen.