Read Yucateco Ezequiel 37 Bible Online

Ezequiel 37 - Yucateco bible

Ezequiel 37

¹Yuumtzile' tu dzaj u kab tin wóokole', ca tu beetaj in jóokol chuup tu yéetel u páajtalil, ca tu wa'alcuntaje'en ti' jun p'éel táax kóom lu'um chuup yéetel u baaquelo'ob quimeno'ob.

²Yuumtzile' tu beetaj in láaj xíimbaltic le cúuchilo'; le táax kóom lu'umo' chuup ca'ach yéetel u baaco'obo', táaj ya'abo'ob ca'achi, jach tiquin baaco'ob ca'achi.

³Yuumtzil túune' tu káat chi'itaj ti' teen: ¿Ca tucultic je'el wa u páajtal u ca'a yantal cuxtal ti' le baaco'oba'? Tene' tin núucaj ti': Yuumtzil lelo' chéen teech a wojel.

⁴Yuumtzil túune' tu ya'alaj ti' teen: T'aan tin kaaba' le baaco'oba'. A'al ti'ob: tiquin baaque'ex u'uye'ex u péectzil Yuumtzil.

⁵Yuumtzile' cu ya'alic ti' te'ex: Bin in ca'aj in woques ichile'ex u múus iikil cuxtal, u ti'al a ca'a cuxlaque'ex.

⁶Bin in ca'aj in dzáa a xiich'ele'ex, bin in ca'aj in ca'a chupe'ex yéetel bak, bin in ca'aj in to'ex yéetel oot'el, bíin in ca'aj in dzáa u múus iikil cuxtal u ti'al a ca'a cuxtale'ex. Bey túuno' bíin a kaj óolte'ex, tene' Yuumtzilen.

⁷Tene' tin t'anajo'ob je'el bix tu ya'aljilac teno'. Ca'aliquil táan in t'anico'obe' tin wu'uyaj jun p'éel u juum jun p'éel u quíilbal lu'um, le baaco'obo' jo'op' u much'icuba'ob tu jujun p'éelilo'ob tu wíinclilo'ob.

⁸Tin wilaj táan u chíichpajal u xiich'elo'ob yéetel u bakelo'ob tu yóokolo'ob, cu dzo'ocole' búucbesa'abo'ob xan tumen u yoot'elo'ob. Ba'ale' mina'an u múus iikil cuxtal ti'ob ca'achi.

⁹Yuumtzil túune' tu ya'alaj ti' teen: T'aan tin kaaba' u múus iikal le cuxtalo' ca a wa'al ti': Bey u ya'alic Yuumtzila': U múus iikil cuxtal co'oten ti' u can ti'itzil lu'um u ti'al a dzáa cuxtal ti' le wíinclilo'ob quimeno'oba'.

¹⁰Tene' j t'aanajen tu kaaba' Yuumtzil je'el bix tu ya'alajilac ti' tene', ca túun j taal u múus iikal le cuxtalo' ca j ooc ti' leti'ob, leti'ob túune' j cuxlajo'obe' ca j wa'alajo'ob. Tu yo'olal ya'abo'obe' béeychajo'ob jun múuch' aj ba'atelo'obe'.

¹¹Yuumtzil túune' tu ya'alaj ti' teen: U caajil Israele', beyo'ob je'el bix le baaco'oba'. Táan u máano'ob u ya'alo'ob: C baaquelo'obe' tiquintaco'ob; mix bikin bíin c líikes c jo'ol tu ca'a téen. Dzoca'an to'on beya'.

¹²Bey túuno', t'ano'ob tin kaaba'e' ca a wa'al ti'ob: Je'el ba'ax cu ya'alic Yuumtzila': In caajal, bin in ca'aj in lukes u maac a mucnale'ex; bin in ca'aj in jóokese'ex ichilo'ob u ti'al ca in beet a suute'ex tu lu'umil Israel.

¹³Le quéen in je'eláant a mucnale'ex u ti'al in jóokesique'ex ichilo'obe', te'ex in caajale'exe' bíin a kaj óolte'ex, tene' Yuumtzilen.

¹⁴Tene' bíin in dzáa ti' te'ex in múus iik u ti'al a cuxtale'ex; bey xan bíin in bise'ex ta lu'ume'ex. Bey túuno' bíin kaj óolta'ac, tene' Yuumtzilen, tin wa'alaj tin beetaj xan. Teen Yuumtzil, teen a'alic.

¹⁵Yuumtzile' tu t'anajene' ca tu ya'alaj ti' teen:

¹⁶Ch'a'a jun p'éel che'e', ca a dzíibt tu yóokol: Judá yéetel j israelitaob u yéet kax t'aano'ob. Cu dzo'ocole' ch'a'a u láak jun p'éel che'e' xan: Efraín máax dza'an tu cúuchil José yéetel u chuucáan j israelitaob u yéet kax t'ano'ob.

¹⁷Tu séeblaquile', nup ta kab le ca'a p'éel che'obo', ca p'áatac jun tacáalil.

¹⁸Le quéen a'ala'ac ti' teech tumen a wéet caajalo'ob: Tzol ti' to'on ba'ax u káat u ya'al le ba'ala',

¹⁹a'al ti'ob: Je'el ba'ax cu ya'alic Yuumtzila': Bin in ca'aj in ch'a'a u xóolte' José yaan tu kab Efraín yéetel tu kab u láak múuch' cajtalilo'ob yano'ob tu yéetel Israelo', u ti'al ca in nup yéetel u xóolte' judá u ti'al ca p'áatac jun p'éelili' xóolte' tin kab.

²⁰Ch'a'a ta kab tu táan u yich tuláacalo'ob le ca'a p'éel che'ob tu'ux dzíibnajecho'.

²¹Cu dzo'ocole' a'al ti'ob: Je'el ba'ax cu ya'alic Yuumtzila': Bin in ca'aj in jóokes le j israelitaob ichil le múuch' caajo'ob tu'ux bisa'abo'obo'; bin in ca'aj in ch'a'ob ti' le jejeláas cúuchilo'obo', ca in beet u suuto'ob tu lu'umo'ob.

²²Bíin in beet u suuto'ob jun p'éelili' múuch' caajil tu pu'uquilo'ob Israel, ca yanac chéen jun túul ajaw ti'ob. Ma' bíin ca'a jóokoc ca'a p'éel múuch' caajo'ob ti'obi', mix bíin u jatzuba'ob ti' ca'a p'éel ajawilo'obi'.

²³Mix xan bíin u ca'a kascuntuba'ob tu yo'olal u kultico'ob beebtbil p'ecbe'en kuobi', mix bíin cuxlaco'ob ti' tuláacal u jejeláas kebano'obi'. Teen bíin in toco'ob ti' tuláacal le kex óolo'ob tu beetajo'obo', bey xan bíin in p'o'olanto'ob ti' u kebano'ob. Leti'obe' bíin p'áataco'ob in caajalo'ob, tene' bíin u Kuinteno'ob.

²⁴In palitzil Davide' chéen leti' bíin u beet u ajawil ichilo'ob, cu dzo'ocole' bíin u yu'ubaj t'anteno'ob bey xan bíin u dzo'ocbeso'ob in wa'almaj t'aano'ob yéetel ba'axo'ob quin wa'alic.

²⁵Bíin cajlaco'ob ti' le lu'umo'ob tin dzáa ti' in palitzil Jacob, tu'ux cajlaj xan u máanja'an ch'i'ibalo'obo'. Te'elo' ti' bíin p'áataco'ob cajtal jun puli'i', leti'ob yéetel u paalalo'obi', bey xan tuláacal u ch'i'ibalo'ob; in paal Davide', bíin u beet u nojchil u ti'al kiino'ob mina'an u xuul.

²⁶Bíin in beet jun p'éel nup t'aan tu yéetelo'ob u ti'al u jun p'éel jéedzel cuxtal. Lelo' jun p'éel nup t'aan u ti'al kiino'ob mina'an u xuul. Bíin in beet u jach ya'abtalo'ob, bíin in dzáa in kulnaj ichilo'ob u ti'al kiino'ob mina'an u xuul.

²⁷Bíin cajlaquen ichilo'ob, bey xan bíin u Kuinteno'ob, yéetel leti'obe', bíin in caajalto'ob.

²⁸Le quéen yanac in kulnaj ichilo'ob u ti'al kiino'ob mina'an u xuule', u chuucáan múuch' caajo'obo', bíin u kaj óolto'ob teen tin yéeyaj Israel bey ba'al quili'ich in ti'ale'.