Read Yucateco Ezequiel 38 Bible Online

Ezequiel 38 - Yucateco bible

Ezequiel 38

¹Yuumtzile' tu t'anajene' ca tu ya'alaj ti' teen:

²Wíinic, teche' sutabáa tu tojil Magog, t'aanen tin kaaba', tacpoolt Gog, u asab nojochil Mesec yéetel Tubal.

³A'al ti': Je'el ba'ax cu ya'alic Yuumtzila': Gog u asab nojchil Mesec yéetel Tubal, tene' quin cáantic a aj p'eequen.

⁴Bin in ca'aj in beet a suut ta paach, bin in ca'aj in dzáa x léechebo'ob ta chi', bin in ca'aj in jóokesech pa'ate' yéetel tuláacal a tziimino'ob, bey xan a aj nat' tzíimino'ob u dzaamajo'ob búuquilo'ob ba'atel, le ya'abcach aj ba'atelo'ob u ch'a'amajo'ob u máascabo'ob bey xan tuláacal u jejeláasilo'ob chimalo'obo'.

⁵Bíin xi'ico'ob láakinta'ano'ob tumen u cajnáalilo'ob Persia, Etiopía yéetel Libia, tuláacalo'ob u ch'a'amajo'ob u chimalo'ob yéetel u p'óoquil u ba'atelo'ob,

⁶u yéet bino'ob xan u aj ba'atelo'ob Gomer yéetel Bet-togarma tu asab náachil j xaman, le u asab ya'abil caajo'ob a beetmaj kax t'aan tu yéetelo'obo'.

⁷Nu'ucbesabáa bey xan ch'a'a u nu'ucul a ba'atel, teech yéetel tuláacal u múuch'ul le aj ba'atelo'ob yaan ta wicnalo', ch'a'a tu yáanal a túuchi' t'aan.

⁸Le quéen máanac ya'abcach ja'abo'obe', bíin a'ala'ac ti' teech ca xi'iquech a ch'a'a' jun múuch' caajo'ob táan ca'ach u ba'atel, ba'ale' dzo'oc u ch'a'ic u yóol tu ca'a téen; jun p'éel caaj ki'itpaja'an ca'ach ichil ya'abcach múuch' caajo'ob, tumen jach dzaab u dzooc ti'ob jun puli', ba'ale' dzo'oc u ca'a much'talo'ob tu pu'uquilo'ob Israel. Ti' le kiino'obo', leti'obe' dzo'oc wal u lukulo'ob ti' le ya'abcach lu'umo'obo' u ti'al u suuto'ob tu lu'umo'ob j cajtal x ma' sajaquil.

⁹Teche' bíin kuchuquech beyech jun p'éel nojoch box múuyal u ti'al a bal le lu'umo'obo', yéetel bíin ocoquech ichil beyech jun p'éel chac iikal yéetel a aj ba'atelo'ob bey xan yéetel ya'abcach caajo'ob.

¹⁰Teen, Yuumtzil, tene' quin wa'alic: Ti' le kiino'obo', bíin ococ ta tuuculo'ob kaakas jok jo'olo'ob.

¹¹Bíin a wa'al: Bin in ch'a'a jun múuch' caajo'ob ma' tu páajtal u toquicubáa, cajnáalilo'obe' jedzecnac yanilo'ob, mina'an u sajaquilo'ob, mix jun p'éel u caajilo'ob yaan u tuulumilo'ob, mix u maac u jool caajilo'ob, mix u x kalabche'ilo'ob.

¹²Bin in ca'aj in láaj ocolte; bin in ca'aj in ba'atelt le caajo'ob dzo'oc u yutzquinta'alo'ob tumen jun p'éel caaj j luuk ti' ya'abcach caajo'ob u ti'al u much'quinticuba'ob, yaan u wacaxo'ob yéetel u láak u ayikalilo'ob, cu dzo'ocol xane' tu chúumuc yóokolcaab caja'ano'ob.

¹³U cajnáalilo'ob Sabá yéetel Dedán, bey xan u j coonolilo'ob Tarsis yéetel u chuucáan caajo'obe', bíin u káat chi'ito'ob ti' teech: ¿J taalech oocol? ¿Ta much'quintaj a aj ba'atelo'ob u ti'al a láaj ocoltic plata yéetel oro, wacaxo'ob yéetel u láak ba'alo'ob u ti'al a bisic ya'abcach ayikalilo'ob?

¹⁴Ma'alob túun, t'an Gog tin kaaba'e' ca a wa'al ti': Je'el ba'ax cu ya'alic Yuumtzila': Le quéen p'áatac jeedzel cajlic in caajal Israele', teche' bíin a chu'uns a xíimbal

¹⁵líikbal ta lu'ume', tu asab náachil j xaman láakinta'anech tumen aj ba'atelo'ob mu'uka'ano'ob yéetel ya'abo'ob, bey xan yéetel u aj ba'atelilo'ob j nat' tzíimino'ob,

¹⁶bíin a puljabáa a ba'atelt in caajal Israel. Teche' Gog bíin a bal le lu'um je'el bix u ba'alal tumen jun p'éel nojoch box múuyal. Te tu dzooc kiino'obo' bíin in beet a taal tu yóokol in lu'um, tu yo'olal beyo' ta wéetel bíin kaj óolta'aquen, tumen u chuucáan múuch' caajo'ob le quéen in we'es in quili'ichil tu táano'obe'.

¹⁷Teen Yuumtzil, tene' quin wa'alic: Ta wo'olal j t'aanajen úuch ca'ach tu chi' in palitzilo'ob u aj bóobatilo'ob Israel; leti'ob tu ya'alajo'ob bíin in beet a taal a ba'atelte Israel.

¹⁸Teen Yuumtzil, tene' quin wa'alic: Le quéen ococ Gog Israele', bíin sen p'u'ujuquen.

¹⁹Ichil in sen p'uja'anile', quin jalach t'antic bíin yanac jun p'éel nojoch quíilbal lu'um tu caajil Israel ti' le kiino'obo'.

²⁰U cayilo'ob ka'anab, u ch'íich'ilo'ob ca'an, u j chi'ibal ba'alche'ilo'ob káax yéetel le ba'alche'ob cu jíilticuba'obo' bíin quiquilnaco'ob tin táan pa'ate' yéetel tuláacal u cajnáalilo'ob lu'um. Le pu'uco'obo' bíin pa'abaco'ob, le nucuch tuunicho'obo' bíin lúubuco'ob, tuláacal xan le tuulumo'obo' bíin jéeneco'ob.

²¹Tene' bíin in beet u taal tu yóokol Gog tuláacal u jejeláasilo'ob loob u ti'al chu'upuc yéetel sajaquil. Bíin in jadz yéetel koja'anilo'ob, bíin quíimic xan yéetel meyaj loob. Bíin in beet u lúubul tu yóokol leti' tu yóokol u aj ba'atelo'ob ka'amcach ja', j bat, káak yéetel si'intun, cu dzo'ocole' u aj ba'atelo'obe' bíin u paaclan quíimsjuba'ob yéetel máascab. Teen Yuumtzil, teen a'alic.

²³Beyo' bíin in we'es ti' ya'abcach caajo'ob in nojbe'enil yéetel in quili'ichil. Tene' bíin in dzáinbáa j kaj óoltbil tumeno'ob, bíin u kaj óolto'ob, tene' Yuumtzilen.