Read Yucateco Ezequiel 39 Bible Online

Ezequiel 39 - Yucateco bible

Ezequiel 39

¹Wíinic teche' t'aanen tin kaaba' tu yo'olal Gog, a'al ti': Gog u yáax noojoch Mesec yéetel Tubal, tene' quin cáantic a aj p'eequen.

²Bin in ca'aj in beet a suut; jujun p'íitil, bíin in jóokesech te tu jach náachil j xamano', u ti'al ca in taasech tu pu'uquilo'ob Israel.

³Cu dzo'ocole' quin cachic le x p'úunche' ca bisic ta x dzíic kabo' yéetel quin beetic u lúubla'ajal le x julubo'ob ca bisic ta x no'oj kabo'.

⁴Teech yéetel a aj ba'atelo'ob bey xan le caajo'ob láakintmailecho', bíin lúubuque'ex quimene'ex tu pu'uquilo'ob Israel. Te'elo' bíin in kube'ex ti' tuláacal u jejeláasil ch'íich'o'ob cu janal quimeno'ob, yéetel ti' j chi'ibal ba'alche'ob, u ti'al u tzéenticuba'ob.

⁵Bíin p'áatac jayacbale'ex ti' jéechcab cúuchil. Teen Yuumtzil, teen a'alic. Tene' dzo'oc in dzáic u t'aanil.

⁶Bíin in túuxt káak tu yóokol Magog, bey xan tu yóokol le máaxo'ob jeedzel cajlico'ob tu lu'umilo'ob le ka'anabo'. Bíin túun kaj óolta'ac tene' Yuumtzilen.

⁷Tene' bíin in beet u kaj óolta'al in kaaba' tumen in caajal Israel, yéetel ma' bíin in cha'a ca xi'ic u bin u manba'alcunta'ali'. Beyo' le j táanxel múuch' caajilo'obo' bíin u yojéelto'ob teen Yuumtzile' quin we'esic in quili'ichil ti' Israel.

⁸Le kiin quin wa'alico', yaan u kuchul. Teen, Yuumtzil, a'alic.

⁹U cajnáalilo'ob Israele', bíin jóokoco'ob u tóoco'ob u nu'uculo'ob u ba'atelo'ob, u jejeláasil u chimalo'ob, u x p'úunche'ob, u x julubo'ob, yéetel u jejeláasil u x lóonte'ob, beyo' bíin yanac ya'ab si' u ti'al u t'abico'ob káak bul siete ja'abo'ob.

¹⁰Ma' bíin kabéetchajac u jóokol molo'och tu'ux jáanil, mix u bino'ob u ch'aco'ob si' ich poc che'i', tumen tuláacal u nu'ucul u ba'atelo'obe', bíin u si'into'ob. Bey túuno', leti'obe' bíin u yocolto'ob le máaxo'ob ocoltmailo'ob ca'ache', yéetel bíin u toco'ob xan u ba'aluba'ob le máaxo'ob tocmail úuch u ba'aluba'ob ca'acho'. Teen Yuumtzil, teen a'alic.

¹¹Ti' le kiino'obo', bíin in dzáa ti' Gog jun p'éel cúuchil tu lu'umil Israel, tu táax kóom lu'umil u'ula'ob, actáan ti' ka'anab, u ti'al u mu'uculo'. Le cúuchilo', bíin u kal le bejo', ti' bíin mu'ucuc Gog tu yéetel tuláacal u aj ba'atelo'obi', bey xan bíin dza'abac u kaaba'int u Táax kóom lu'umil u aj ba'atelo'ob Gog.

¹²Le j israelitaobo', bíin ka'abéetchajac bul siete winalo'ob ti'ob u ti'al u muquico'ob, u ti'al u jáanilcuntico'ob múuch' caajo'obo'.

¹³Tuláacal le máaco'ob bíin meyajnaco'ob ti' muquico'obo', jun p'éel tziiquil u ti'alo'ob. Ti' le kiino', bíin in we'es nojbe'enen. Teen Yuumtzil, teen a'alic.

¹⁴Yéetel xan le quéen dzo'ococ u máan le siete winalo'obo' bíin kubenta'ac ti' jun jaatz máaco'ob u ti'al xíimbaltic yéetel u ti'al xakal ilic le lu'umo'obo', u ti'al ca u muco'ob le máaxo'ob p'áatalo'ob te yóok lu'umo', u ti'al u p'atico'ob jáanil.

¹⁵Le quéen yanac wa máax, ti' le cu xíimbaltic le caajo'obo' ca yil jun p'éel u baaquel wíinique', bíin u dzáa u chíiculal tu yo'olal u bisa'al mucbil tu táax kóom lu'umil u aj ba'atelo'ob Gog.

¹⁶(Yaan xan jun p'éel caaj cu kaaba'intic u Múuch'ul aj ba'atelo'ob.) Bey bíin jáanilcunta'ac le caajo'obo'.

¹⁷Yuumtzile' tu ya'alaj ti' teen: A'al ti' tuláacal ch'íich'o'ob yéetel ti' tuláacal chi'ibal ba'alche'ob ca u much'uba'ob u ti'al ca talaco'ob tu pu'uquilo'ob Israel, u ti'al le quíimsaj bíin in beet u ti'alo'obo'. Bíin páatac u jaantico'ob bak yéetel u yukico'ob ki'ik;

¹⁸bíin u jaanto'ob u bakel aj ba'atelo'ob yéetel bíin u yuko'ob u ki'ikel u méektáano'ob lu'um, óoli' bey wa u bakel yéetel u ki'ikel j tamano'ob, mejen j tamano'ob, yuuco'ob, wa u poloc wacaxilo'ob Basane'.

¹⁹Ti' le quíimsaj bíin in beet u ti'alo'obo', bíin u jaanto'ob tzaatz tac quéen koja'achajaco'ob, bíin xan u yuko'ob ki'ik tac quéen cáalchajaco'ob.

²⁰Bíin in máakant jun p'éel noj janal u ti'alo'ob, yéetel u bakel tzíimino'ob, u bakel j nat', tzíimino'ob, yéetel u bakel tuláacal jejeláas aj ba'atelo'ob, u ti'al ca janaco'ob tac quéen na'ajchajaco'ob. Teen, Yuumtzil, teen a'alic.

²¹Beyo' bíin in we'es in nojbe'enil ti' táanxel lu'umilo'ob. Tuláacal múuch' caajo'ob bíin u yilo'ob bix úuchic in p'is óoltico'ob yéetel bix úuchic in jadzico'ob.

²²Líikbal ti' le kiino' Israele' bíin u kaj óolt, tene' Yuumtzilen, u Junab Ku.

²³Le yaanal caajo'obo' bíin u yojéelto'ob ba'ax o'olal j bisa'ab le j israelitaob táanxel lu'umilo'; tu yo'olal u kebano'ob yéetel u j ma' ocsaj óolilo'ob j bisa'abo'ob, teen túune' tin sutaj in paach ti'ob ca tin cha'aj u pa'abal u muuko'ob tumen u aj p'eeco'ob, bey xan quíimsa'abo'ob ichil ba'atel.

²⁴Tene' tin beetaj ti'ob je'el bix cu najmatic u ma' utz yanilo'obi', yéetel tu yo'olal u dzu'uy poolilo'ob tin cúulpachtajo'ob.

²⁵Le t o'olal, teen Yuumtzil, tene' quin wa'alic: Bejela'e' bin in ca'aj in ch'a'a óotzilil ti' tuláacal u caajil Israel, ti' tuláacal u ch'i'ibal Jacob. Bin in ca'aj in beet u bin utzil ti'ob, tu yo'olal in tzáic ca dza'abac nojbe'enil ti' in kaaba'.

²⁶Tene' bin in ca'aj in much'quinto'ob, bíin xi'iquen in ch'a'ob ti' le yaanal múuch' caajo'ob yéetel ti' le múuch' caajo'obo' tu'ux p'eca'ano'obo'; bíin cajlaco'ob túun x ma' sajaquil tu lu'umo'ob, mix máac bíin ja'akesic u yóolo'ob. Beyo' bíin in we'es in quili'ichil, ya'ab múuch' caajo'ob bíin ilic. Le j israelitaobo', bíin u mukyajto'ob u pa'ajal u subtalo'ob, tu yo'olal tu kexajeno'ob.

²⁸Tene' ti' túuxtajo'ob ti' le x tocoy lu'um ichil táanxel múuch' caajilo'obo', tene' bíin in ca'aj in much'quinto'ob tu lu'umo'ob. Ma' bíin in p'at ki'itpaja'an mix jun túuli'. Bíin u kaj óolto'ob túun, tene' Yuumtzilen u Junab Kuob.

²⁹Ma' bíin in ca'a cúulpachto'obi', tumen dzo'oc in dzáic in páajtal tu yóokol Israel. Teen, Yuumtzil, teen a'alic.