Read Yucateco Ezequiel 4 Bible Online

Ezequiel 4 - Yucateco bible

Ezequiel 4

¹Wíinic, teche', ch'a'a' jun xéet' pak lu'ume', dzáa ta táan u ti'al ca a dzíibt tu yóokol u caajil Jerusalén.

²Cu dzo'ocole' dzíibt tu bakpach aj ba'atelo'ob u ch'a'amajo'ob u nu'ucul u ch'a'ico'ob caaj, dzáa u pakil u bakpach, bey xan u níix bejil u ti'al u yila'al jun caaj p'éel bakpachta'an.

³Séeb ch'a'a' jun p'éel xamach fierro u ca'aje' ca dzáa chúumuc ti' teech yéetel ti' le caaj je'el bix jun p'éel tuulume', ca a katcunt tu táan le caaj, bey táan a ba'ateltique'. Lela' bíin meyanac bey ca'anbesajil ti' le j israelitaobo'.

⁴Teche' bíin chilaquech tu yóokol a x dzíiquil, ca a dzáa ta wóokol u si'ipil u caajil Israel. Teche' yaan a chital ti' le tzéelilo' u ti'al a cuchic u si'ipilo'ob

⁵trecientos noventa kiino'ob, jun p'éel kiin tu yo'olal u jujun ja'abil u si'ipil Israel.

⁶Le quéen chúucpajac le kiino'obo' ca chital x no'ojile', ca dzáic ta wóokol u si'ipil Judá bul cuarenta kiino'ob. Jun p'éel kiin tu yo'olal u jujun ja'abil.

⁷Cu dzo'ocole' ca suticabáa tu tojil Jerusalén bakpachta'an tumen u aj p'eeco'obo'; ca bablic u kabil a nooke' ca loolob t'antic tin kaaba'.

⁸Il a wile', bin in ca'a in kaxech yéetel suumo'ob u ti'al ma' u páajtal a suticabáa jujun tzéelil tac quéen chúucpajac u kiinilo'ob a mukyaj.

⁹Ch'a'a' tu séeblaquil jun p'íit trigo, cebada, mijo yéetel avena bey xan habaob, yéetel lentejaob; ya'ach'to'ob ti' jun p'éelili' nu'ucul ca a beet a wo'och waaj tu yéetelo'ob. Lelo' leti' bíin a jaant bul trecientos noventa kiino'ob chilicbalech ta x dzíiquil ch'ala'atel.

¹⁰Ma' u máan u yorail a janal, docientos cincuenta gramos unaj a jaantic sáamsamal;

¹¹ma' xan bíin a cha'a u máan u yoorail a wukic a wo'och ja'i', táancoch litro ja' unaj a wukic sáamsamal.

¹²Bíin a jaant jun p'éel u waajil cebada a póocma yéetel u káakil u ta' wíinic, bíin a máakant tu'ux cu páajtal u yila'al tumen caajo'.

¹³Cu dzo'ocole' tu ca'a a'alaj Yuumtzil: Janalo'ob, ma' utz yanilo'ob bíin u jaanto'ob le j israelitaob ti' le múuch' caajo'ob tu'ux bíin in biso'obo'.

¹⁴Tene' tin núucaj ti': In Yuumtzil tene' mix jun téen in machma ba'ax ma' utz yanili'; mix jun téen in jaantmaj u bakel ba'alche' cu quíimil tu juunal wa xe'exe'et'a'an tumen dzíidzic ba'alche'ob, mix jun téen xan in túunt bak ma' utz yanili'.

¹⁵Leti' túune' tu ya'alaj ti' teen: Bin in ca'aj in cha'a' a ch'a'ic u ta' wacax u jeelint u ta' máac u ti'al a póoquic a wo'och waaj.

¹⁶Cu dzo'ocole' tu ya'alaj ti' teen: Bin in ca'aj in beet u p'áatal mina'an janalo'ob tu caajil Jerusalén. Bíin t'o'oxoc jujun p'íitil le janalo', le máaco'obo' bíin janaco'ob tu yéetel okom óolal, le ja'o' bíin p'i'isic, yéetel sajaquil bíin u yuko'ob.

¹⁷Bíin p'áatac mina'an ja' yéetel janal ti'ob, bíin u paaclan pactuba'ob yéetel sajaquil. Tu yo'olal u kebano'obe', cuxa'ano'ob bíin jo'op'oc u tu'utalo'ob.