Read Yucateco Ezequiel 40 Bible Online

Ezequiel 40 - Yucateco bible

Ezequiel 40

¹Ti' u kiinil diez ti' le winalo', leti' u kiinil le túumben ja'abo', Yuumtzile' tu dzaj u kab tin wóokole' ca tu bisajen tu lu'umil Israel. Ta'aytac ca'ach u chuquic veinticinco ja'abo'ob bisa'aco'on Babilonia, yéetel catorce ja'abo'ob ch'a'abac Jerusalén. Tu lu'umil Israele', tu dzajen Yuumtzil tu yóokol jun p'éel witz seten ca'anal; ti' wa'alacbalene' ca tin wilaj tu tojil j noojol jun múuch' najo'ob bey jun p'éel noj caaje'.

³Yuumtzile' tu bisajen te'elo', ca tin wilaj jun túul máac chica'an bey broncee'. Ti' wa'alacbal ca'ach te j jool najo', u machmaj jun p'éel suum lino u ca'aj yéetel jun p'éel p'iste'.

⁴Le máaco' tu ya'alaj ti' teen: Paacaten ma'alob yéetel qui' ch'en xiquinten; il a wil ma'alob tuláacal ba'ax bin in ca'aj in we'es ti' teech, tumen Kue' tu taasajech way j cúuchil u ti'al ca in we'es ti' teech. Cu dzo'ocole', a'al ti' israel tuláacal ba'ax bíin a wile.

⁵Tu paach le kulnajo', yaan ca'ach jun p'éel tuulum bakpachtmail. Le xóolte' yaan ca'ach tu kab le máaco', óox p'éel metros u chowaquil. Tu p'isaj túun le tuulumo', yaan ca'ach óox p'éel metros u piimil yéetel óox p'éel u ca'analil.

⁶Cu dzo'ocole' j bin le tu'ux yaan le jool bej cu p'áatal j lakino', j na'ac tu eebilo'obe', ca tu p'isaj u piimil u pakil le tu'ux yaan le jool najo', ca tu yilaj yaan ca'ach óox p'éel metros u piimil.

⁷Le kalab najo'ob yaan ca'ach tu jujun tzéel le jool najo', cu p'isico'ob ca'ach tu jujun p'éelilo'ob óox p'éel metros chowaquil yéetel óox p'éel metros cóochil, jun p'éel káasab túun tu tzéel láak káasab tuunilo'ob, ca'a p'éel metros ca tac táancoch ca'ach náachil. Cu dzo'ocole' tu táakale' ti' yaan ca'ach le jool naj cu bin tu tojil le máacan yaan tu tojil le kulnajo'. U piimil u pakil tu'ux yaan le jool najo', óox p'éel metros ca'achi.

⁸Le máaco' tu p'isaj le máacan yaan tu jool le kulnajo', le máacano' tu p'isaj can p'éel metros. Yaan ca'ach ca'a p'éel u ocom tuunicho'ob jujun p'éel metro u poloquilo'ob.

⁹

¹⁰(Yaan ca'ach óox p'éel u káasab tuunilo'ob tu jujun tzéelil u jool j lakin jun tacáalili' u nuuquilo'ob, yaan xan u ocom tuunichilo'ob u jujun tzéelilo'ob láili' lajqueet u nuuquilo'obe'.)

¹¹Cu dzo'ocole' le máaco' tu p'isaj u maac le jool bejo': yaan ca'ach cinco metros u cóochil yéetel seis metros ca tac táancoch u joolo'.

¹²Tu táan ca'ach u jujun p'éelil le káasab tuuno'obo', yaan ca'ach jun p'éel chan pak táancoch metro u cóochil tu jujun tzéelil. Tu jujun p'éelil le káasab tuuno'obo' cu p'isic ca'ach óox p'éel metros u cóochil yéetel óox p'éel metros u chowaquil.

¹³Cu dzo'ocole' tu p'isaj tuláacal u cóochil le joolo' tu taamil jun p'éel káasab túun tac tu taamil u láak káasab túun yaan actáano', cu ch'actic jun p'éel jool naj tac tu láak jool naj yaan actáano', ca tu p'isaj doce metros ca tac táancoch.

¹⁴Cu dzo'ocole' tu p'isaj le máacano': tu p'isaj diez metros. Le naj yaan te j joolbejo, cu táakal ti' tuláacal u ti'itzilo'ob le sujuy lu'umo'.

¹⁵Tuláacal u chowaquil líikbal tu paach le noj jool najo' tac ichil le máacano', cu p'isic ca'ach veinticinco metros.

¹⁶Tuláacal le káasab tuuno'ob je'el bix u yocom tuunichilo'obo', yaan u calom kiinilo'ob yéetel u maaco'ob ichil yéetel tu bakpach le naj yaan te tu joolo'. Le máacano' yaan xan ca'ach u calom kiinilo'ob tu bakpach ichilo'. Te ocom tuunicho'obo' dzíibta'an xa'ano'ob ca'achi'.

¹⁷Cu dzo'ocole' le máaco' tu bisajen sujuy lu'umil actáan. Le sujuy lu'umo' yaan ca'ach u but' tuunichil tu bak paach, yéetel yaan treinta u káasab najilo'ob tu tzéelo'ob.

¹⁸Le but' tuunicha' jun p'íit caabalil ti'o', cu jáayal ca'ach tu bakpach le najo'ob yano'ob ca'ach actáano', u cóochile' láaj queet yéetel u cóochil le najo'obo'.

¹⁹Le máaco' tu p'isaj buca'aj náachil líikbal tu táan le jool naj yaan cabal tac tu paachil le jool naj yaan ichilo', yaan ca'ach cincuenta metros ti'.

²⁰Yaan xan ca'ach jun p'éel jool tu xaman le jáal pach sujuy lu'umo'. Le máaco' tu p'isaj u chowaquil yéetel u cóochil.

²¹Yaan xan ca'ach óox p'éel u káasab tuunilo'ob tu jujun tzéelil, bey xan u ocom tuunichilo'ob yéetel u máacano'ob lajqueet u p'iisilo'ob yéetel le jool yaan j lakino', u káat u ya'ale' veinticinco metros u chowaquil yéetel doce metros ca táancoch u cóochil.

²²Le máacan, le calom kiino'ob yéetel le xa'ano'obo', lajqueet u p'iisilo'ob yéetel le yano'ob ti' le jool yaan j lakino'. Te'elo' cu na'acal ca'ach máac ti' siete eebo'ob, le máacano' cu p'aatal ca'ach ichil.

²³Je'el bix j lakin bey xan tu xaman le jool yaan paachilo', yaan ca'ach u láak jool cu bin te j sujuy lu'um yaan ichilo'. Le máaco' tu p'isaj buca'aj náachil yanil le ca'a p'éel joolbejo'obo', ca tu p'isaj cincuenta metros.

²⁴Cu dzo'ocole' tu bisajen j noojol tu'ux yaan jun p'éel jool, ca tu p'isaj u ocom tuunichilo'ob yéetel u máacanil, lajqueet u p'iisilo'ob yéetel le dzo'oc u yáax p'i'isico'obo'.

²⁵Le naj te jool bej yéetel u máacanilo', yaan ca'ach u calom kiinilo'ob tu bakpach je'el bix u láako'obo'. Tuláacale' cu p'isic ca'ach veinticinco metros u chowaquil yéetel doce metros ca'a tac táancoch u cóochil.

²⁶Yaan ca'ach siete u eebilo'ob, u máacanile' ti' yaan ca'ach tu taamile'. Le ocom tuunicho'obo' dzíibta'an xan ca'ach u xa'anilo'ob tu jujun tzéelilo'ob.

²⁷U sujuy lu'umil yaan chúumuco' yaan xan ca'ach jun p'éel u jool najil tu tzéel j noojol. Le máaco' tu p'isaj buca'aj u náachil le ca'a p'éel jool najo'ob yaan j noojolo', ca tu p'isaj cincuenta metros.

²⁸Cu dzo'ocole' tu bisajen tu jool bejil le sujuy lu'um yaan chúumuco'. Tu p'isaj le jool naj yaan j noojolo' ca tu yilaj lajqueet yéetel u p'iisil le jool najo'ob tu yáax p'isláantajo'obo'.

²⁹U káasab pakilo'ob, u máacanil yéetel u yocomilo'obe', lajqueet ca'ach yéetel le yáaxo'obo'. U káasab tuunilo'ob le jool bej yéetel u máacanilo' yaan xan ca'ach u calom kiinilo'ob u bakpache', cu p'isico'ob veinticinco metros tuláacal u chowaquil yéetel doce ca'a tac táancoch u cóochil.

³⁰

³¹Le máacano' ti' yaan ca'ach tu tojil le sujuy lu'um yaan tu bakpacho'. Dzíibta'an ca'ach xa'ano'ob tu bakpacho'ob. Le jool naja' ti' ca'ach yaan tu yóokol ocho eebo'obe'.

³²Tu séeblaquil tu bisajen te j sujuy lu'um yaan chúumuc tu tojil lakino', ca tu p'isaj le joolbejo, ca tu yilaj lajqueet u p'iisil tu yéetel le yáaxo'obo'.

³³U káasab tuunilo'ob, u yocom tuunichilo'ob yéetel u máacanile', lajqueet ti' p'iisil le yáaxo'obo'. U najil le joolbej yéetel u máacanilo', yaan u calom iikilo'ob tuláacal u bakpach, cu p'isic ca'ach veinticinco metros u chowaquil yéetel doce ca'a tac táancoch u cóochil.

³⁴Le máacano' ti' ca'ach yaan tu tojil le sujuy lu'um yaan tu bakpach le sujuy lu'um yaan chúumuco'. Le ocom tuunicho'ob ca'acho' dzíibta'an xa'ano'ob tu bakpach tu jujun p'éelil. Le jool naja' ti' ca'ach yaan tu yóokol ocho eebo'obe'.

³⁵Cu dzo'ocole' le máaco' tu bisajen ti' le jool cu paacat j xamano', u p'iisile' lajqueet tu yéetel le yáax jool najo'obo',

³⁶yaan xan u kalab tuunilo'ob, u yocomilo'ob, u máacanil yéetel u calom iikilo'ob u bakpach. U najil le jool bejo' cu p'isic ca'ach veinticinco metros u chowaquil yéetel doce ca'a tac táancoch u cóochil.

³⁷Le máacano' ti' ca'ach yaan tu tojil le sujuy lu'um yaan tu bakpach le sujuy lu'um yaan chúumuco'. Dzíibta'an ca'ach xa'ano'ob tu yocomilo'ob. Le jool naja' yaan ca'ach ocho u eebilo'ob u ti'al u yocol máac ichil.

³⁸Yaan xan ca'ach jun p'éel káasab najil naj cu táakal ti' le máacan yaan te j jool bejo'. Ti' ca'ach cu p'o'obol le ba'alche'ob cu tóoca'alo'obo'.

³⁹Tu máacanil le jool najo' yaan ca'ach cuatro táasche'ob, ca'a p'éel tu jujun tzéelil, tu yóokolo'ob ca'ach cu quíimsa'al le ba'alche'ob u ti'al tóocbilo'ob yéetel u ti'al u quíimsbil ba'alche'ilo'ob keban wa u ti'al sa'atsaj si'ipil.

⁴⁰Tu paach le máacan yaan j noojolo', yaan xan ca'ach ca'a ca'a p'éel táasche'ob tu jujun tzéelil,

⁴¹beyo' yaan ca'ach can p'éel táas che'ob ichil yéetel can p'éel tu paach le naj yaan te jool bejo': ocho tu pa'ate'il. Tu yóokolo'ob ca'ach cu quíimsa'al le ba'alche'obo'.

⁴²Le can p'éel táasche'ob tu'ux cu tóoca'al le ba'alche'obo', beeta'ano'ob ca'ach tu yéetel póolbil tuunich; tu jujun p'éelilo'ob cu p'isico'ob ca'ach sesenticinco centímetros u chowaquilo'ob bey xan u ca'analilo', yéetel cincuenta centímetros u ca'analilo'ob, tu yóokolo'ob ca'ach cu dza'abalo'ob le ti'ibil óolalo'obo'. Ichil le kalab túun ti' tuláacal u bakpacho' yaan ca'ach jun p'éel u tip'a'anil joka'an cu p'isic seis centímetros u cóochil u ti'al u dza'abal u ti'ibil óolalil juuch', yéetel le nu'uculo'ob cu meyaj u ti'al u quíimsa'al le ba'alche'ob cu tóocalo'obo'.

⁴³

⁴⁴Ti' le sujuy lu'um yaan chúumuc tu paach le jool najo'ob yano'ob ichilo', yaan ca'ach ca'a p'éel káasab najo'ob, jun p'éel yaan tu tzéel le jool najil j xaman yaan tu tojil j noojolo', yéetel u láak jun p'éel yaan tu tzéel u jool najil j noojol tu tojil j xamano'.

⁴⁵Le máaco' tu ya'alaj ti' teen: Le káasab naj yaan tu tojil j noojolo', u ti'al le aj kiino'ob cu meyajo'ob te j kulnajo',

⁴⁶yéetel le káasab naj yaan tu tojil j xamano', u ti'al le aj kiino'ob cu meyajo'ob ti' u multuunil kultaj. Leti'obe' u ch'i'ibalo'ob Sadoc, chéen leti'ob je'el u páajtal u náadzalo'ob ti' Yuumtzil u ti'al ca u meyajto'obe',

⁴⁷Cu dzo'ocole' le máaco' tu p'isaj le sujuy lu'um yaan chúumuco', lelo' yaan ca'ach cincuenta metros ti' u jujun can tzéelilo'. U multuunil le kultajo' ti' yaan ca'ach actáan ti' le kulnajo'.

⁴⁸Le máaco' tu bisajen tu máacanil le kulnajo' ca tu p'isaj u yocom tuunichilo'ob le máacano': yaan ca'ach ca'a p'éel ca'a tac táancoch u poloquil tu jujun p'éelil. U jool najile' yaan ca'ach siete metros cóochil, u nu'uculo'ob tu'ux u machmajubáa le jool najo', jun p'éel metro ca'a tac táancoch u cóochil tu jujun p'éelilo'ob.

⁴⁹Le máacano' cu p'isic ca'ach diez metros ca'a tac táancoch u cóochil yéetel seis metros u taamil, yaan ca'ach diez u eebilo'ob u ti'al u na'acal máaqui'. Tu chuun u jujun p'éelile' ocom tuunicho'ob, yaan ca'ach jujun p'éel ocom tuunichi'.