Read Yucateco Ezequiel 41 Bible Online

Ezequiel 41 - Yucateco bible

Ezequiel 41

¹Tu séeblaquile' tu bisajen le máac ichil le kulnajo' ca tu p'isaj le ocom tuunicho'obo': tu p'isajo'ob óox p'éel metros tu jujun p'éelilo'ob.

²Le jool najo' yaan ca'ach cinco metros u cóochil; u nu'ucul tu'ux taka'ane' cu p'isico'ob ca'a p'éel metros ca'a tac táancoch u cóochilo'ob tu jujun p'éelilo'ob. Cu dzo'ocole' tu p'isaj le noj káasab yaan chúumuco', lelo' yaan ca'ach veinte metros u chowaquil yéetel diez metros u cóochil.

³Cu dzo'ocole' j bin tu naklic le káasabo' ca tu p'isaj le ocom tuunicho'obo', tu jujun p'éelilo'ob tu p'isajo'ob jun p'éel metros u cóochil. U jool bejile' yaan ca'ach óox p'éel metro u cóochil, yéetel le ocom tuunicho'ob yaan tu tzéelo'obo', cu p'isico'ob ca'ach óox p'éel metros ca'a tac táancoch tu jujun p'éelilo'ob.

⁴Cu dzo'ocole' tu p'isaj le káasab yaan tu naklilo', lelo' diez metros u jujun tzéelilo'ob. Ca túun tu ya'alaj ti' teen, lela', leti' le sen quili'ich cúuchila'.

⁵Cu dzo'ocole' le máaco' tu p'isaj u pakil u paach le kulnajo', lelo' tu p'isaj óox p'éel metros u cóochil. Tu bakpach le kulnajo' taakal ca'ach te j kalab najo'ob ca'a ca'a p'éel metros u taamilo'obi'.

⁶Le kalab najo'oba' yáalman yáal yanilo'ob ca'ach tu yóokol, u láak, óox yáal ca'achi, yaan ca'ach treinta u kalab tuunilo'ob u jujun yáalil. U pakil le kulnajo' cu bin u jaaytal ti' jujun p'éelil u yáalalo'ob cu cáapal u katáalilo'ob le kalab tuuno'obo', beyo' ma' kabéet pa'akal te j pako'.

⁷Tu paach le kalab najo'ob bakpachmail ca'ach le kulnajo', yaan jun p'éel níix cu kuchul tac ca'anal, beyo' cu páajtal u na'acal máac líikbal caabale', tac ti' le yáal yaan chúumuco', bey xan ti' le yaan ca'analo'.

⁸Tene' tin wilaj tuláacal u tzéelilo'ob le kulnajo', t'uchquina'an ca'ach tu yóokol jun p'éel ca'anal chuun pak, tu yóokole' ti' xan beeta'an le kalab tuuno'obo'. Le chuun paka' yaan ca'ach óox p'éel metros u ca'analil.

⁹U paach pakil le kalab tuuno'obo', ca'a p'éel metros ca'a tac táancoch ca'ach u piimilo'ob, tu bakpach tuláacal le kulnaj yéetel tu chúumuc ti' le kalab tuuno'ob bakpachmail le kulnaj yéetel u káasab najilo'ob le aj kiino'obo' yaan jun p'éel cúuchil jáanpike'en diez metros ca'a tac táancoch u cóochil.

¹¹Le kalab tuuno'obo' yaan jun p'éel u jool najil tu tzéel j xaman yéetel jun p'éel u jool najil tu tzéel j noojol u ti'al u jóokol te tu'ux jáanpike'eno'. Te jáanpike'enilo', yaan jun p'éel pak tuláacal u chowaquil ca'a p'éel metros ca'a tac táancoch u piimil.

¹²J chikin tu tojil le táancab kala'ano', yaan ca'ach jun p'éel pakil naj cu p'isic treinticinco metros u cóochil, yéetel cuarenta y cinco metros u chowaquil, u pakile', ca'a p'éel metros ca'a tac táancoch u piimil.

¹³Le máaco' tu p'isaj le kulnajo' ca tu yilaj cincuenta metros tuláacal u chowaquil. U cúuchil le táancab kala'an pa'ate' yéetel u najilo'obo' tac xan u pakilo'obo' cincuenta metros xan.

¹⁴U táan le kulnaj pa'ate' yéetel le táancab kala'an tu tojil j lakino', cu p'isic xan cincuenta metros.

¹⁵Cu dzo'ocole' tu p'isaj u chowaquil le pakil naj yaan tu paach le kulnaj, actáan ti' le táancab kala'an pa'ate' yéetel u pakilo'obo', ca xan tu p'isaj cincuenta metros. U káasabilo'ob ichil le kulnaj yéetel u máacanilo'

¹⁶bala'ano'ob ca'ach yéetel che'. U calom kiino'ob yaan u maaco'ob yéetel u pakabilo'ob u jool najilo'obo' tuláacal u bakpache', láaj bala'ano'ob yéetel che' tu yóox tzéelilo'ob. Líikbal lu'um tac tu'ux yaan le calom kiino'obo' tac tu ca'analil le jool najo'ob, láaj bala'ano'ob xan. U pakilo'ob le kulnaj ichil yéetel paachile',

¹⁸chuuptaco'ob yéetel cuxa'an aj xiknalo'ob bey xan xa'ano'ob dzíibta'ano'obi'. Tu jujun túulil le xiknal aj cuxa'ano'obo', yaan ca'ach ca'a p'éel u táan u yicho'ob;

¹⁹ti' jun tzéele' u táan yich jun túul máac cu pactic jun cúul xa'an, ti' u láak u tzéele' u táan yich jun túul león cu pactic u láak jun cúul xa'an. Bey yanil ti' tuláacal u bakpach le kulnajo',

²⁰dza'an le xiknal aj cuxa'ano'ob yéetel le xa'ano'obo', líikbal j lu'ume' tac tu ca'analil le jool najo'obo'. Tu pakil le káasab yaan chúumuco',

²¹u pakabilo'ob le jool najo' yaan ca'ach u yocomilo'ob can ti'itz. Actáan ti' le sen Quili'ich Cuuchilo' yaan ca'ach jun p'éel ba'al bey

²²jun p'éel u multuunil kultaj che' u ca'aje', cu p'isic ca'ach jun p'éel metro tu can tzéelilo'ob yéetel jun p'éel ca'a tac táancoch metro' u ca'analil. Yaan ca'ach u ti'itzo'ob, u nu'ucul u yedztal yéetel u tzéelilo'obe', beeta'ano'ob ca'ach tu yéetel che'. Le máaco' tu ya'alaj ti' teen: Lela' leti' le táasche' yaan tu táan Yuumtzila'.

²³Je'el bix le noj káasab yéetel le sen Quili'ich Cúuchilo', yaan ca'ach ca'a wáal u maaco'ob, tu jujun p'éelil ca'a wáal u jool najilo'ob. Tu ca'a wáalal cu je'epajalo'ob tu tojil le pako'.

²⁵U jool najilo'ob le noj káasab yaan chúumuco', yaan ca'ach xiknal aj cuxa'ano'ob yéetel xa'ano'ob dza'ano'ob je'el bix le yano'ob ca'ach te j pako'obe'. Tu táan le máacan yaan paachilo' yaan ca'ach jun p'éel x jit'ib che'obi'.

²⁶Tu jujun tzéelil le máacano' yaan ca'ach calom kiino'ob yéetel u maaco'ob, bey xan dza'an u yoochelo'ob xa'ano'obi'. Le kalab tuuno'ob taakalo'ob ti' le kulnajo', yaan xan u x jit'ib che'ilo'ob.