Read Yucateco Ezequiel 42 Bible Online

Ezequiel 42 - Yucateco bible

Ezequiel 42

¹Cu dzo'ocole' le máaco' tu jóokesajen j xaman tu'ux yaan le sujuy lu'um ca tu beetaj in wocol tu'ux yaan u múuhch'ul le najo'ob yano'ob j xaman actáan ti' le táancab kala'ano', yéetel noj naj yaan tu paach le kulnajo'.

²Le múuch' najo'obo' cu p'isic ca'ach cincuenta metros u chowaquil tu tojil j xaman yéetel veinticinco metros u cóochil.

³Ti' jun tzéele' cu jóokol u táancabil paachil, yaan ca'ach diez metros u cóochil, tu láak jun tzéele' cu jóokol tu'ux yaan ca'ach le u táas tuunichil le sujuy lu'um yaan tu bakpach le sujuy lu'um yaan chúumuco'. Yaan ca'ach óox yáalo'ob, tu jujun yáalilo'obe' asab oca'an ichil ti' le yaan yáanalo'.

⁴Actáan ti' le káasab najo'obo' yaan ca'ach jun p'éel u cúuchil máan cinco metros u cóochil yéetel cincuenta metros u chowaquil, cu bin ca'ach tac ichil. U jool najilo'ob le káasab najo'obo' ti' ca'ach cu p'áatalo'ob j xamane'.

⁵U káasab najilo'ob yano'ob ca'analo' asab cóontaco'ob ti' le yaan tu yáalal chúumuc yéetel ti' le yano'ob caabalo', tu jujun p'éelil u yáalalo'obe', asab oca'ano'ob ichil ti' le yano'ob tu yáanalo'.

⁶Le káasab najo'oba' óox yáalo'ob beeta'anilo'ob ca'achi, ba'ale' mina'an ca'ach u yocom tuunichilo'ob je'el bix u najilo'ob le sujuy lu'ume', tumen u káasab najilo'ob u yáalalo'ob yano'ob ca'analo', asab juupul yanilo'ob ti' le yano'ob chúumuco' yéetel ti' le yano'ob caabalo'.

⁷U tzoolol u káasab najilo'ob sujuy lu'um yaan tu bakpach le chúumuc sujuy lu'umo', veinticinco metros ca'ach u chowaquil. Ti' tuláacal u actáanil le káasab najo'obo', yaan ca'ach jun t'o'ol pak, veinticinco metros u cóochil cu kuchul ca'ach tac te j sujuy lu'um yaan tu bakpach le sujuy lu'um yaan chúumuco'. Tuláacal u chowaquil le cúuchil máano' yaan ca'ach cincuenta metros ti'.

⁹Tu caabal yáalal le otocho'oba' cu kuchul tac ichil le sujuy lu'um yaan tu bakpach le sujuy lu'um yaan chúumuco', lelo' tu tojil j lakin,

¹⁰le tu'ux cu kuchul u pakil le sujuy lu'um yaan tu bakpach le u láako'. Tu noojol, actáan ti' le táancab kala'an yéetel ti' pakil naj yaan tu chiikin le kulnajo', yaan xan káasab najo'ob ca'achi'

¹¹lajqueet beeta'anilo'ob bey xan u p'iisilo'ob, lajqueet xan tzola'anilo'ob, yaan xan tu'ux u yúuchul ocol yéetel u yúuchul jóokol je'el bix ti' le káasab najo'ob yano'ob j noojolo', yaan xan jun p'éel u cúuchil máan actáan ti'ob.

¹²U ti'al u kuchul máac ti' le káasab najo'ob yano'ob tu tzéelil j noojole', yaan ca'ach jun p'éel jool naj te tu'ux cu chúunul le u cúuchil máan yaan actáan ti' le pak balmail le jool bej yaan j lakino'.

¹³Le máaco' tu ya'alaj ti' teen: Tuláacal le najo'ob yano'ob j xaman je'el bix le yano'ob j noojol actáan ti' le táancab kala'ano', quili'ich káasab najo'ob. Le aj kiino'ob cu nadzicuba'ob ti' Yuumtzilo', ti' cu jaantico'ob le asab quili'ich ti'ibil óolalo'obo'. Ti' xan cu dzáico'ob le ti'ibil óolalo'ob sen quili'icho'ob je'el bix u ti'ibil óolalo'ob jejeláas janalbe'en neeko'ob yéetel u ti'ibil óolalo'ob tu yo'olal keban yéetel u ti'ibil óolalo'ob tu yo'olal si'ipil, tumen lelo', jun p'éel quili'ich cúuchil.

¹⁴Le quéen ococ le aj kiino'ob ti' le kulnajo', ma' unaj u jóokolo'ob te j sujuy lu'um yaan tu bakpach le sujuy lu'um yaan chúumuc wa ma' xi'ico'ob u p'ato'ob u nookil u meyajo'ob ichil le káasab najo'obo', tumen le nooko' quili'ich. U ti'al u jóokolo'ob tu'ux yaan le caajo', unaj u kexic u búuco'ob.

¹⁵Le ca j dzo'oc u p'isic ichil le kulnaj le máaco', tu bisajen tu paach le jool naj yaan j lakino', ca xan jo'op' u p'isic u lu'umil u paachil.

¹⁶Tu ch'a'aj u p'iste'e' ca tu p'isaj u tzéelil j lakin: tu p'isaj doscientos cincuenta metros.

¹⁷Cu dzo'ocole' tu p'isaj u tzéelil j xaman, ca xan tu dzaj doscientos cincuenta metros.

¹⁸Cu dzo'ocole' tu tzéel j noojole' tu p'isaj doscientos cincuenta metros xan.

¹⁹Tu dzooque' tu p'isaj tu tzéel j lakin, ca xan tu dzaj doscientos cincuenta metros.

²⁰Tu p'isaj tu can tzéelil. Le kulnajo' yaan ca'ach tu bakpach jun p'éel pak cu p'isic doscientos cincuenta metros tu jujun tzéelil u bakpacho'ob, u ti'al u jatzic ba'ax quili'ich tu yéetel le ma' quili'icho'.