Read Yucateco Ezequiel 43 Bible Online

Ezequiel 43 - Yucateco bible

Ezequiel 43

¹Le máaco' tu bisajen ti' le jool naj yaan j lakino',

²ca tin wilaj táan u taal j lakin u nojbe'enil Yuumtzil u Kuil Israel. Cu yu'uba'al ca'ach jun p'éel juum je'el bix u juum jun p'éel áalcab ja' sen ya'ab u ja'ile', ca chu'up yéetel sáasil le lu'umo'.

³Le náayo' bey le je'el bix yanchaj ti' teen le kiinac ca j taal Yuumtzil u xu'uls Jerusalene', yéetel je'el bix le tin wilaj tu jáal u yáalcab ja'il Quebare'. J noclajen tac kuchic in táan jo'olal j lu'um,

⁴u nojbe'enil Yuumtzile' j ooc ti' le jool naj yaan j lakino'.

⁵U páajtalil túun Yuumtzile' tu líikesajene', ca tu bisajen te j sujuy lu'um yaan chúumuco', ca tin wilaj dzo'oc u chu'upul le kulnaj yéetel u nojbe'enil Yuumtzil.

⁶Le máaco' j wa'alaj tin tzéele', ca tin wu'uyaj táan u t'aniquen Yuumtzil líikbal ichil le kulnajo',

⁷táan ya'alic ca'ach ti' teen: Lela' u cúuchil in jalach káanche', u cúuchil in wooc; way tu chúumuc le j israelitaob bíin cajlajquen u ti'al kiino'ob mina'an u xu'ul. Mix leti'ob, mix u ajawilo'ob bíin u ca'a pajo'ob u subtal in quili'ich kaaba' yéetel u kex óolalo'ob: ma' bíin u ca'a wa'acunto'ob u nucuch tuunichilo'ob u ka'ajsico'ob u kaaba'ob u ajawilo'ob le quéen dzo'ococ u quíimilo'obi',

⁸mix xan bíin u ca'a beeto'ob jalach najo'ob u ti'al ca yanac u jool najilo'ob tu tzéelo'ob, u jool najilo'ob in kulnaj bala'an chéen tumen jun p'éel pak tu chúumuqui'. Leti'obe' tu pajo'ob u subtal in quili'ich kaaba', yéetel ba'alo'ob in p'ectmaj; le t o'olal j kuuxchajen tu yéetelo'obe', ca tin beetaj u quíimilo'ob.

⁹Bejela'a' túune' u náachcunto'ob u kex óolalo'ob yéetel le nucuch tuunicho'ob cu líikesico'ob tu kaaba' u ajawilo'obo', ca páatchajac in wantal ichilo'ob u ti'al kiino'ob mina'an u xuul.

¹⁰Wíinic, teche' tzicbalt ti' le j israelitaob le ba'ax ta wilaj te j kulnajo', bey xan u ju'unil cu ye'esic bix beeta'anil pa'ate' yéetel u p'iisilo'ob, u ti'al ca u ch'a'ob subtal tu yo'olal u kebano'ob.

¹¹Wa cu ch'a'ico'ob subtal tu yo'olal tuláacal ba'axo'ob u beetmajo'obe', tzol ti'ob bix beeta'anil le kulnajo', a'al xan ti'ob ba'axo'ob yano'ob ichil, a'al ti'ob bix yanil tu'ux cu yocol máac bey xan tu'ux cu jóokol máac, láaj e'es ti'ob u ju'unil bix beeta'anil, bey xan le in wa'almaj t'aano'ob u najmal u dzo'ocbesico'obo'. Dzíibt tuláacal bix yanil tu táan u yicho'ob u ti'al ca u na'ato'ob ma'alob bix yanil u ti'al ca u beeto'ob. Dzíibt xan ti'ob tuláacal le a'almaj t'aano'ob u ti'al ca u dzo'ocbeso'obo'.

¹²Lela' u ya'almaj t'aanil kulnaj: tuláacal le cúuchil bakpachmail le kulnaj tu yóokol le pu'uco', sen quili'ich.

¹³Je'el u p'iisilo'ob u multuunil kultaj je'el bix p'isa'anilo'ob ca'acha'. Tu bakpach le multuunil kultajo' yaan ca'ach jun p'éel kóom páana'an táancoch metro taamil yéetel táancoch metro cóochil, cu líikil ca'ach tu bakpach jun p'éel u chi' yaan veinticinco centímetros ti'. U nu'ucul t'uchlic u multuunil kultaje', bey ca'acha':

¹⁴líikbal tu taamil le kóom páana'an tac tu jáal u chi' yaan caabalo', yaan ca'ach jun p'éel metro ca'analil. U cóochil caabale' cu tíip'il ca'ach táancoch metro. U cóochil chúumuco' cu p'isic ca'ach ca'a p'éel metros, yéetel cu tíip'il xan jun p'éel metro.

¹⁵U cóochil u ca'analil le tu'ux cu tóoca'al le ba'alche'obo', cu p'isic ca'ach ca'a p'éel metros u ca'analil. Yaan ca'ach can p'éel u baaco'ob cu jóokol ca'anal.

¹⁶U cóonchil u ca'analil multuunil kultajo' can ti'itz ca'achi, seis metros tu jujun ti'itzilo'ob ca'achi.

¹⁷U cóochil le chúumuco', can ti'itz xan ca'achi, siete metros ca'ach u jujun tzéelil. Le kóom páana'al yaan ca'ach tu bakpacho' yaan táancoch metro u cóochil, u chi' líikesa'ane' yaan ca'ach veinticinco centímetros u cóochil. U eebilo'ob u ti'al u yúuchul na'acal ti' le multuunil kultajo', ti' ca'ach yano'ob j lakine'.

¹⁸Cu dzo'ocole' Yuumtzile' tu ya'alaj ti' teen: Le quéen u chuc u kiinil u beeta'al le multuunil kultajo', unaj u beeta'al je'el bix a'ala'anila': Bíin tóoca'ac jun túul ba'alche' tu yóokol le multuunil kultaja', yéetel bíin wi'idzic u ki'ikel tu yóokol le multuunil kultajo'.

¹⁹Ti' le j levitaob aj kiino'ob u ch'i'ibalo'ob Sadoc u najmal u nadzicuba'ob u meyajteno'obo', bíin a dzáa ti'ob jun túul chan wacax u ti'al u quíimso'ob ti' teen tu yo'olal keban. Teen Yuumtzil, teen a'alic.

²⁰Cu dzo'ocole' bíin u ch'a'ob jun p'íit u ki'ikele', ca widzic tu yéetel le can p'éel baaco'ob, le can p'éel ti'itzilo'ob u chúumuc u cóochil le multuunil kultajo', bey xan tuláacal u chi' lika'ano'. Beyo' bíin a láaj wutzquint ti' keban.

²¹Cu dzo'ocole' ca ch'a'ic le chan wacax quíimsa'ab tu yo'olal kebano', ca tóoquic tu paach le kulnaj tu cúuchil yéeya'an u ti'a'al lelo'.

²²Tu láak kiine' bíin a quíims tu yo'olal keban jun túul chan j yuuc láaj utz yanil u wíinclil, le aj kiino'ob túuno' bíin u yutzquinto'ob u yanil le u multuunil kultaj je'el bix tu beetajilaco'ob tu yéetel le chan wacaxo'.

²³Le quéen dzo'ococ a beetico'ob u kultajilo'ob le utzquinajilo', bíin a ch'a'a jun túul chan wacax yéetel jun túul j taman, láaj utz yanil u wíinclilo'obe',

²⁴bíin a táanbes tin táan. Le aj kiino'obo' ca u widzo'ob yéetel ta'ab, ca xan u láaj tóoco'ob ti' in nojbe'enil.

²⁵Sáamsamal bul siete kiino'ob u najmal a quíimsic ti' teen jun túul chan j yuuc tu yo'olal keban, bey xan jun túul chan wacax yéetel jun túul j taman, láaj utz u wíinclilo'ob.

²⁶Sáamsamal ti' bul siete kiino'obe', le aj kiino'obo', u najmal u láaj utztal le multuunil kultajo', u ti'al ca meyajnac chéen ti' ba'axo'ob jun páaycuna'ano'ob.

²⁷Bey bíin beeta'ac bul siete kiino'obo', tu ocho kiine' bíin cáajac u tóoquico'ob ba'alche'ob yéetel u quíimsico'ob u ba'alche'ilo'ob ca'a bisajbáil. Teen túune' bíin in kame'ex tu yéetel utzil óolal. Teen, Yuumtzil, teen a'alic.