Read Yucateco Ezequiel 44 Bible Online

Ezequiel 44 - Yucateco bible

Ezequiel 44

¹Le máaco' tu ca'a bisajen ti' u jool bejil u yoocbal máac u táancabil tu lakin le kulnajo', le jool najo' kala'an ca'achi.

²Te'elo' Yuumtzile' tu ya'alaj ti' teen: Le jool naja' bíin p'áatac kala'an; ma' u najmal u je'ebeli'. Mix máac bíin páatac u yocoli', tumen ti' j ooc u Kuil Israeli'. Bey túuno' bíin p'áatac kala'an.

³Chéen bíin páatac u yocol le j méektáan u ti'al j cutal u jaant le quili'ich janal tu táan Yuumtzilo'. U najmal u yocol ti' u máacanil le jool najo', ti' xan u najmal u jóokoli'.

⁴Cu dzo'ocole' le máaco' tu bisajen tu xaman tu'ux cu yúuchul ocol actáan ti' le kulnajo'. Tin wilaj dzo'oc u chu'upul le kulnaj yéetel u nojbe'enil Yuumtzil ca j noclajen j lu'um.

⁵Yuumtzil túune' tu ya'alaj ti' teen: Wíinic, teche' p'il ma'alob a wich yéetel u'uy ma'alob ba'ax quin in wa'al ti' teech tu yo'olal u ya'almaj t'aanilo'ob yéetel u ya'almaj xiquinilo'ob le kulnajo'. U'uy ma'alob máaxo'ob je'el u páajtal u yocolo'ob yéetel u jóokolo'ob te j kulnajo'.

⁶A'al ti' u j dzu'uy pool caajil Israel: lela' leti' ba'ax cu ya'alic Yuumtzil: U caajil Israel p'ate'ex le p'ecbe'en cuxtalilo'.

⁷Te'exe' ca manba'alcuntique'ex in kulnaj iquil a cha'ique'ex u yocol j táanxel lu'umilo'ob ichil, máaco'ob mina'an u chíiculal in nup t'aan tu tuuculo'ob mix tu wíinclilo'ob; cu manba'alcuntico'ob le quéen u kubo'ob ti' teen tzaatz yéetel u ki'ikel le ba'alche'ob cu quíimsa'alo'ob ti' teno', yéetel cu dzáico'ob jun tzéelil in nup t'aan yéetel le kaakas ba'alo'ob cu beetico'obo'.

⁸Mix tu dzo'ocbeso'ob u quili'ich nu'ucbesajil in kultajilo'obi', ba'ale' dzo'oc u p'atco'ob tu kab j táanxel lu'umilo'ob.

⁹Le t o'olal, teen Yuumtzil, tene' quin wa'alic: Ma' bíin ococ tin kulnaj mix jun túul j táanxel lu'umil wa mina'an u chíiculal in nup t'aan tu tuucul yéetel tu wíinclil; mix le j táanxel lu'umil cajnáal ichil le j israelitaobo'.

¹⁰Le j levitaob náachchajo'ob ti' teen le ca j cúulpachnaj Israel tin táan u ti'al u kultico'ob beetbil kuobe', u najmal u kamico'ob u jaadzil u kebano'ob.

¹¹Je'el u páajtal u meyajo'ob tin kulnaj bey aj canan jool najo'obe', bey xan ti' u láak u meeyjulo'ob le kulnajo'; leti'ob bíin quíimsic le ba'alche'ob cu tóocalo'obo', bey xan le cu taasa'alo'ob tumen le caaj u ti'al u ti'ibil óolalo', u láak ba'ale', u najmal u dzáic u yóolo'ob u ti'al u meyajto'ob le caajo'.

¹²Leti'ob meyajt le j israelitaob u ti'al u kultico'ob le beetbil kuobo', bey túuno' tu beetajo'ob u kebanchajalo'ob. Le t o'olalo', bíin u bo'oto'ob u kebano'ob. Teen Yuumtzil, teen a'alic.

¹³Ma' bíin páatchajac u beetico'ob u aj kiinilo'ob ti' teni', mix bíin páatchajac u náadzalo'ob ti' in quili'ich ba'alo'obi', mix xan ti' le asab quili'icho'obo'. Bíin u pa'ajac u subtalo'ob tu yo'olal le kaakas ba'alo'ob tu beetajo'obo'.

¹⁴Chéen ti' le meyajo'ob ma' quili'ichtaco'ob bíin meyajnaco'obo', leti'ob bíin láaj beetic le meyajo'ob kabéeto'obo'.

¹⁵Le aj kiino'ob j levitaob u ch'i'ibalo'ob Sadoc ma' tu p'atajo'ob u meeyjul in kulnaj le ca tu p'atajo'ob in beelo'ob le j israelitaob, je'el u páajtal u náadzalo'ob u meyajteno'obe'. Leti'obe' je'el u páajtal u náadzalo'ob ti' tene' u ti'al u kubo'ob ti' teen le tzaatz yéetel u ki'ikel le quíimsbil ba'alche'obo'. Teen Yuumtzil, teen a'alic.

¹⁶Je'el xan u páajtal u yocolo'ob ti' in kulnaj yéetel u náadzalo'ob ti' u multuunil in kulta'al u ti'al u meyajtiqueno'obe', leti'ob bíin meyajtiquen.

¹⁷Le quéen ococo'ob ti' u jool najil le sujuy lu'um yaan chúumuco', u najmal u búuquintico'ob le nook lino u ca'ajo'. Le quéen meyajnaco'ob ichil le sujuy lu'um yaan chúumuco' wa te j kulnajo', ma' bíin u dza'ob búuc beeta'an yéetel u tzo'otzel j tamani'.

¹⁸Bíin u dza'ob tu poolo'ob jun p'éel pix jo'ol lino u ca'aj, yéetel xut' eexo'ob láili' lino u ca'ajo'obe', ma' bíin u dza'ob tu tojil u kaxnako'ob mix ba'al u ti'al ca beeta'ac u kíilcabanquilo'obi'.

¹⁹Ma'ili' u jóokolo'ob te j sujuy lu'um yaan paachil le tu'ux yaan le caajo', u najmal u lukesico'ob le búuco'ob úuchic u meyajo'ob te j kulnajo', u ti'al ca u p'ato'ob tu kalab tuunilo'ob le kulnajo', u ti'al ca u dza'ob yaanal búuco'ob, tu yo'olal beyo', u quili'ichil le búuco', ma' u máan ti' le caajo'.

²⁰Ma' bíin u kolist u poolo'obi', mix bíin u p'ato'ob chowactaco'obi'; chéen bíin u koso'ob.

²¹Mix jun túul ti' le aj kiino'ob bíin u yuko'ob vino le quéen ococo'ob ichil le sujuy lu'um yaan chúumuco'.

²²Ma' bíin dzo'ococ u beel yéetel jun túul x quimen íicham wa yéetel jun túul x p'at íichami', chéen yéetel jun túul x sujuy israelita, wa yéetel jun túul u x quimen íicham jun túul aj kiin.

²³Le aj kiino'obo' u najmal u ca'ansico'ob ti' in caajal u kaj óolto'ob ba'ax quili'ich yéetel ba'ax p'ecbe'en, ba'ax utz yanil yéetel ba'ax ma' utz yanili'.

²⁴Ti' ba'atelo'obe', leti'ob bíin u beeto'ob u aj ilaj tac poolilo'ob, bíin p'is óolnaco'ob je'el bix in wa'almaj t'aano'obe'. Bíin u dzo'ocbeso'ob tuláacal in wa'almaj t'aano'ob yéetel ba'axo'ob in ca'anbesmajo'ob tu yo'olal in kiinbesajo'ob, yéetel xan bíin u tzico'ob tuláacal in quili'ich sábado'ob.

²⁵Mix bikin u najmal u machico'ob jun túul quimen tu yo'olal ma' u kastal yanilo'ob, chéen je'el u páajtal u machic u quimen wíinclil u taata wa u maama, u j xibil paal, u x ch'upul paal, u sucu'un wa u yíidzin wa jun túul u quiic wa u yíidzin ma' dzoca'an u beeli'.

²⁶Wa cu machico'ob jun túul quimene', u najmal u yutzquintic u yanil, cu dzo'ocole', u najmal u pa'atico'ob u máan siete kiino'ob.

²⁷Le quéen ca ococo'ob ichil u chúumuc sujuy lu'umil le kulnaj u ti'al u beeto'ob u meyajo'obo', bíin u táanbeso'ob u quíimsbil ba'alche'il tu yo'olal keban. Teen Yuumtzil, teen a'alic.

²⁸Le aj kiino'obo' chéen téen bíin u kameno'ob u ti'al u kamba'albáilo'ob. Ma' bíin dza'abac mix ba'al u ti'alinto'ob tu lu'umil Israeli'. Teen u kamba'albáilo'ob.

²⁹Bíin páatchajac u jaantico'ob tuláacal le jejeláas neeko'ob cu taasa'alo'ob kubbil tumen le j israelitaobo', bey xan le ba'alche'ob tu yo'olal keban yéetel u ba'alche'ilo'ob tu yo'olal si'ipil. Bey xan tuláacal le ba'axo'ob bíin jun páaycunta'ac ti' teen tumen le j israelitaobo', u ti'alo'ob.

³⁰Le aj kiino'obo', bíin xan u kamo'ob u asab ma'alobil le yáax joocho'ob yéetel tuláacal ti'ibil óolalo'ob. Cu dzo'ocol xane', le quéen a ya'ach'te'ex u juuch'il waaje', u asab ma'alobile' bíin a dza'ex ti' leti'ob. Beyo' bíin jéedzec in qui' t'aan tu yóokol a wotoche'ex.

³¹Le aj kiino'obo' ma' u najmal u jaantico'ob mix jun túul ch'íich' wa jun túul ba'alche' chéen quíimi' wa cu xe'exe'et'a'al tumen jun túul chi'ibal ba'alche'i'.