Read Yucateco Ezequiel 45 Bible Online

Ezequiel 45 - Yucateco bible

Ezequiel 45

¹Le quéen a beete'ex u buulil u t'o'oxol le lu'umo'ob u ti'al j dza'abal ti' u jujun p'éelil u múuch' cajtalil le otochnáalo'obo', u najmal a p'atique'ex jun xóot' lu'um, doce kilómetros ca'a tac táancoch u chowaquil yéetel diez u cóochil, u ti'al u jun páaycunta'al ti' Yuumtzil. Tuláacal le lu'uma' bíin p'áatac quili'ich.

²Ti' lelo' bíin jóokesa'ac jun xéet'e' u ti'al beeta'al le kulnajo', ca yanac doscientos cincuenta metros ti' u jujun p'éel u can tzéelil, súut pachta'an tumen jun p'éel t'o'ol xíiwo'ob, ca yanac veinticinco metros cóochil u ti'al u tzéenta'al wacax.

³Ti' le jun xóot' jóokesa'an u ti'al Yuumtzilo' bíin p'i'isic jun p'éel cúuchil ca yanac doce kilómetros ca'a tac táancoch u chowaquil yéetel cinco u cóochil u ti'al ca p'áatac quili'ich cúuchilil: ti' bíin anac le kulnajo'.

⁴Le cúuchilo' bíin p'a'atac u ti'al le aj kiino'ob cu meyajo'ob tu kulnaj Yuumtzil máaxo'ob cu náadzalo'ob u ti'al meyajtico'. Ti' bíin u yanac u yotocho'obi'. Lelo' bíin p'áatac jun p'éel cúuchil chéen u ti'al kulnaj.

⁵U ba'ale', bíin yanac u láak cúuchil doce kilómetros ca'a tac táancoch u chowaquil yéetel cinco u cóochil jóokesa'an u ti'al le j levitaob cu meyajo'ob te j kulnajo', u ti'al u yantal tu'ux u cajtalo'ob.

⁶Tu dzooque' u najmal u jóokesa'al xan jun xóot' lu'um ca yanac doce kilómetros ca'a tac táancoch u chowaquil yéetel ca'a p'éel ca'a tac táancoch u cóochil, tu tzéel le quili'ich lu'umo'. Le lu'uma' u ti'al j ti'alintbil tumen tuláacal u caajil Israel.

⁷Bíin jóokesa'ac xan jun xéet' lu'um u ti'al j méektáan. Jun xéet'e' bíin anac j lakin, u láak jun xéet'e' j chikin, bey u na'ata'ala'; jun xéet'e' bíin p'áatac jun tzéel ti' le quili'ich lu'um jun páaycuna'an u ti'al le caajo' u láak jun xéet'e' ti' bíin p'áatac tu láak jun tzéele'. Líikbal j chikin tac j lakine' bíin yanac ti' u chowaquile' le buca'aj yaan ti' jun xéet' le lu'umo'ob jóokesa'ano'ob u ti'al jun múuch' cajtalil otochnáalo'obe'.

⁸Le lu'umo' u ti'al u j méektáan Israel; beyo' ma' bíin ca'a ye'edzec in caajal tumen le méektáano'obo', ba'ale' bíin u p'ato'ob u lu'umo'ob u ti'al le j israelitaob je'el bix buca'aj ya'abilo'ob ti' u múuch' cajtalil u yotochnáalo'obe'.

⁹Teen Yuumtzil, tene' quin wa'alic: ¡U j méektáanile'ex Israel way cu náacale'! ¡Xule'ex a meyaj loobe'ex, xuule'ex xan a woclique'ex u meyaj óotzil! ¡Beete'ex ba'ax tu beel! ¡Xule'ex a wocoltique'ex u lu'umo'ob in caajal! Teen, Yuumtzil, teen a'alic.

¹⁰Meyajnacte'ex x p'isibo'ob chuca'antac.

¹¹Le x p'isib u ti'al neeko'obo' unaj lajqueet le u x p'isibil le ba'alo'ob ja'il u ca'ajo'obo'. Le homer yaan doscientos litros u p'iisilo', leti' bíin meyajnac ti' te'ex u ti'al a beetique'ex u láak p'isibo'ob. Jun p'éel bato cu meyaj u ti'al p'i'isil ba'alo'ob ja'il u ca'ajo'obe' unaj u p'isic jun jaatz ti' diez jaatzul jun p'éel homer, jun p'éel efa neeko'obe', láili' jun jaatz ti' diez u jaatzul jun p'éel homere'.

¹²Bey xan le cu meyajo'ob u ti'al u p'i'isil ba'alo'ob aale': veinte gerase', u p'iis jun p'éel siclo, once gramos u aalil; setenta ciclose', jun p'éel mina.

¹³Bey u najmal jóokesico'ob u ti'ibil óolalo'oba': Ti' u joochil u pakal trigo'obe' yéetel ti' u pakal cebadaobe', bíin u jatzo'ob sesenta u tucubilo'ob láajqueto'ob, bíin u dza'ob jun tucub bey ti'ibil óolale'.

¹⁴Jach bey bíin u beeto'ob yéetel le aceite bíin yanac ti'obo', bíin u jóokeso'ob cien u jaatzul u ti'al ca u dza'ob jun jaatz bey ti'ibil óolale'.

¹⁵Ti' j tamano'obe' bíin u ch'a'ob jun túul ti' doscientos cu janalo'ob ti' u asab ma'alobil u xíiwil Israel. Lelo'oba' bíin meyajnac u ti'al u ti'ibil óolal jejeláas janalbe'en neeko'ob, u ti'al le ba'alche'ob cu láaj tóocalo' yéetel u quíimsbil ba'alche'il ca'a bisajbáil, cu ku'ubul u ti'al u ka'amal u sa'atsaj si'ipilo'ob kebano'obo'. Teen Yuumtzil, teen a'alic.

¹⁶Tuláacal u cajnáalilo'ob le lu'uma' u najmal u beeta'al u kubico'ob le ti'ibil óolal ti' u méektáan Israelo',

¹⁷le méektáano' bíin u dzáa le ba'alche'ob u ti'al tóocbilo'obo', bey xan le ba'ax kabéet u ti'al u ti'ibil óolalil jejeláas neeko'ob yéetel u vinoil chichan luna, sábado yéetel tuláacal u kiinbesajilo'ob Israel. U najmal xan u táanbesic u quíimsbil ba'alche'ilo'ob keban, u ti'ibil óolal u jejeláas janalbe'en neeko'ob, tóocbil ba'alche'ob yéetel le cu quíimsa'alo'ob u ti'al ca'a bisajbáilo', u ti'al ca sa'atsa'ac u kebano'ob Israel.

¹⁸Teen Yuumtzil, tene' quin wa'alic: Ti' u yáax jun p'éel kiin le yáax winalo', bíin a kube'ex quíimsbil jun túul chan wacax láaj utz u wíinclil, u ti'al u yutzquinta'al ti' keban le kulnajo'.

¹⁹Le aj kiino' bíin u ch'a'a jun p'íit u ki'ikel le ba'alche' kuba'an quíimsbil tu yo'olal kebano', u ti'al u cu'ult tu yocomilo'ob le kulnajo', tu can ti'itzil u multuunil kultaj yéetel tu yocomilo'ob u jool najilo'ob le sujuy lu'um yaan chúumuco'.

²⁰Bey bíin beeta'ac xan tu siete kiin tu yo'olal je'el máaxac j kebanchaj ma' tumen tu yóoltaji', wa ma' tu yojéeltaj wa j kebanchaji'. Bey bíin p'áatac utz yanil le kulnajo'.

²¹Tu catorce kiin ti' le yáax winalo' bíin cáajac a kiinbesique'ex u qui'imac óolal Táadz Máanbal, bul siete kiino'ob bíin a jaante'ex waaj x ma' pajil.

²²Le kiino' le j méektáano', bíin u kub jun túul chan wacax u ti'al quíimsbil tu yo'olal u keban yéetel tu yo'olal u keban tuláacal le caajo',

²³ti' u jujun p'éelil le bul siete kiino'ob cu xáantal le kiinbesajo', bíin u kub siete mejen wacaxo'ob yéetel siete j tamano'ob láaj utz u wíinclilo'ob u ti'al láaj tóocbil ti' Yuumtzil. Cu dzo'ocole' sáamsamal bíin u kub jun túul j yuuc u ti'al quíimsbil tu yo'olal keban.

²⁴Tu yo'olal u jujun túulil le mejen wacaxo'ob yéetel le j tamano'obo', bíin dza'abac xan u ti'ibil óolalil veinte litros jejeláas janalbe'en neeko'ob yéetel óox p'éel litros ca'a tac táancoch aceite.

²⁵Ti' u qui'imac óolalil Máacano'ob bíin xan kiinbesa'aco'ob tu quince kiinil ti' u winalil sietee', le j méektáano' u najmal u kubic bul siete kiino'ob láili' buca'aj u ya'abil u quíimsbil ba'alche'ilo'ob tu yo'olal kebano', bey xan bíin u tóoc láili' buca'aj u ya'abil ba'alche'obo', bey xan bíin u beeto'ob láili' buca'aj u ti'ibil óolalo'ob jejeláas janalbe'en neeko'ob yéetel aceite.