Read Yucateco Ezequiel 46 Bible Online

Ezequiel 46 - Yucateco bible

Ezequiel 46

¹Teen, Yuumtzil, tene' quin wa'alic: U lakin jool najil le sujuy lu'um yaan chúumuco', u najmal u p'áatal kala'an tu bul seis kiinilo'ob cu yúuchul meyaj, bíin je'ebec tu kiinil sábado yéetel tu kiinil chichan uj.

²Le j méektáano', bíin ococ ichil le máacan yaan paachilo', u ti'al ca wa'alac tu chuun jun p'éel u yocomilo'ob le jool najo'. Ca'aliquile' le aj kiino'obo' bíin u tóoco'ob le ba'alche'ob cu quíimsa'alo'obo', yéetel bíin u kubo'ob u quíimsbil ba'alche'ilo'ob le ca'a bisajbáil táanbesa'ano'ob tumen le j méektáano', le j méektáano' bíin noclac j lu'um tu yicnal le pacab jool najo', cu dzo'ocole' cu jóokol. Le jool najo' ma' bíin ka'alac tac tu yocbal kiini'.

³Sábado'ob yéetel tu kiinil chichan uj, le caajo' bíin u kult Yuumtzil tu táan le jool najo'.

⁴Le ba'alche'ob bíin u táanbes le j méektáan tu kiinil sábado u ti'al tóocbilo'ob bey ti'ibil óolal u ti'al Yuumtzilo', seis mejen j tamano'ob yéetel jun túul j taman láaj utz yanil u wíinclilo'ob.

⁵Bíin u kub veinte litros jejeláas janalbe'en neeko'ob tu yo'olal jun túul j taman, tu yo'olal le mejen j tamano'obo', le buca'aj u káate'. Tu yo'olal veinte litros jejeláas janalbe'en neeko'obe', bíin u kub óox p'éel litros ca tac táancoch aceite.

⁶Tu kiinil chichan uje', bíin u kubo'ob jun túul chan wacax yéetel seis j tamano'ob, láaj utz u wíinclilo'ob.

⁷Tu yo'olal jun túul chan wacaxe' bíin u kubo'ob veinte litros jejeláas janalbe'en neeko'ob, yéetel veinte litros tu yo'olal jun túul j taman, tu yo'olal le mejen j tamano'obo' le buca'aj u káat u kube'. Tu yo'olal veinte litros jejeláas janalbe'en neeko'obe', bíin u kub óox p'éel litros ca tac táancoch aceite.

⁸Le quéen ococ le j méektáano' u najmal u yocol ti' u máacanil le jool najo', ti' xan bíin jóokoqui'.

⁹Le quéen ococ le caaj tu kiinilo'ob qui'imac óolal u ti'al u kulto'ob Yuumtzile', u najmal u beetico'ob beya': le máaxo'ob bíin ococco'ob ti' le jool naj yaan j xamano', bíin jóokoco'ob ti' le jool naj yaan j noojolo', le máaxo'ob bíin ococo'ob ti' le jool naj yaan j noojolo', bíin jóokoco'ob ti' le jool naj yaan j xamano'. Ma' bíin jóokoco'ob ti' le jool naj tu'ux j ooco'obo', tumen bíin jóokoco'ob ti' le yaan actáano'.

¹⁰Le j méektáano' u najmal u yocol tu yéetel le caajo' yéetel u najmal xan u jóokol tu yéetel.

¹¹Ti' le jejeláas qui'imac óolo'obo', bíin ku'ubuc veinte litros jejeláas janalbe'en neeko'ob tu yo'olal jujun túul mejen wacax bey xan tu yo'olal jujun túul j taman; tu yo'olal le mejen j tamano'obo', le buca'aj u káato'obe'. Tu yo'olal veinte litros jejeláas janalbe'en neeko'obe', bíin ku'ubuc óox p'éel ca'a tac táancoch litros aceite.

¹²Le j méektáano', le kiin bíin u kub ti' Yuumtzil jun p'éel ti'ibil óolal tu juunal yóole', je'el bix jun túul ba'alche' u ti'al láaj tóocbil wa jun túul u quíimsbil ba'alche'il ca'a bisajbáile', bíin je'ebec le jool naj yaan j lakino' u ti'al u kubic le quíimsbil ba'alche' láili' je'el bix u beetic u ti'al sábado. Le quéen dzo'ococ u jóokole' bíin ka'alac le jool najo'.

¹³Sáamsamal tu ja'atzcab kiinile', bíin ku'ubuc jun túul chan ja'aben j taman u ti'al tóocbil ba'alche' ti' Yuumtzil.

¹⁴Bey xan jujun ja'atzcab, bíin dza'abac ti' Yuumtzil jun p'éel u ti'ibil óolal siete litros jejeláas janalbe'en neeko'ob yéetel jun p'éel litro aceite, bíin we'equec tu yóokol le juuch'o'. Le kiinkuja' manaltzail u beeta'al u ti'al kiino'ob mina'an xuul.

¹⁵Le quíimsbil ba'alche' iquil u tóoca'al le chan j taman yéetel u ti'ibil óolal le jejeláas janalbe'en neeko'ob bey xan le aceiteo', mantadz u najmal u ku'ubulo'ob ja'atzcab kiin.

¹⁶Teen Yuumtzil, tene' quin wa'alic: Wa le j méektáan cu síic ti' u paalal jun xéet' lu'um u ti'ale', bíin p'áatac u ti'alint jun puli' bey u kamba'albáil u ch'i'ibale'.

¹⁷Ba'ale' wa le j méektáan cu síic jun xéet' u lu'um ti' jun túul u aj meyajo'obe', chéen bíin u ti'alint tac tu kiinil u kuchul u ja'abil jáalkabil, ti' le kiino' bíin ti'alinta'ac tu ca'a téen tumen le j méektáano' u ti'al dzáa u kamba'albáil u paalal.

¹⁸Le j méektáano', ma' bíin páatac u toquic u lu'um mix máaqui'. Le ba'ax bíin u dzáa u ti'al u kamba'albáil u paalale', bíin u jóokes ichil ba'al u ti'al; beyo' mix máac bíin p'áatac mina'an u lu'um yéetel ma' bíin ki'itpajac in caajali'.

¹⁹Cu dzo'ocole' le máaco' tu bisajen ti' le jool bej yaan tu tzéel le jool najo', ti' le káasab najo'ob yano'ob tu tojil j xaman jun páaycuna'ano'ob chéen u ti'al le aj kiino'obo'. Tu ye'esaj ti' teen jun p'éel cúuchil tu tojil j chikin te paachilo',

²⁰ca tu ya'alaj ti' teen: Way u najmal u loocansa'al tumen le aj kiino'ob u bakel le ba'alche'ob cu quíimsa'alo'ob tu yo'olal si'ipil yéetel yo'olal kebano', way xan u najmal u takancunta'al u ti'ibil óolal le jejeláas janalbe'en neeko'obo'. Beyo' ma' kabéet a jóokese'ex ti' le sujuy lu'um yaan paachilo', mix xan le caaj bíin nupuba'ob yéetel le quili'ich ba'alo'obo'.

²¹Cu dzo'ocole' tu bisajen ti' le sujuy lu'um yaan paachilo', ca tu beetaj in xíimbaltic tu can ti'itzo'obo'. Tin wilaj yaan jun p'éel chan táancab ti' u jujun p'éelil u can ti'itzil le sujuy lu'umo'. Tu jujun p'éelilo'ob cu p'isico'ob veinte metros chowaquil yéetel quince cóochil;

²³tu bakpacho'obe' yaan jun p'éel pak tuunich u ca'aj, yéetel tu chuun le pako' yaan u nu'uculo'ob u t'a'abal káaki'.

²⁴Tu ya'alaj túun ti' teen: Lela' leti' le kóobeno'ob tu'ux le máaxo'ob cu meyajo'ob kulnajo' bíin u chaco'ob le wacaxo'ob cu ku'ubul tumen le caaj, u ti'al j táanbesbil quíimsbil ba'alche'.