Read Yucateco Ezequiel 5 Bible Online

Ezequiel 5 - Yucateco bible

Ezequiel 5

¹Yuumtzile' tu ya'alaj ti' teen: Wíinic, bejela'e' ch'a'a' jun p'éel xotob ma'alob jóokesa'anil u yej, je'el bix u yej nu'ucul dziique', ca dzic a pool yéetel a me'ex, cu dzo'ocole' ch'a'a' jun p'éel x ch'uyub p'ise' ca jóokes óox jaatz ti' le tzo'otzo'obo'.

²Le quéen dzo'ococ u ba'atelta'al Jerusalene', tóoc jun jaatz le tzo'otz tu chúumuc le caajo'; cu dzo'ocole' ch'a'a' jun p'éel xotobe' ca a xo'oxo'ot u láak jun jaatz tu bakpach le caajo', cu dzo'ocole' ca pulic tu saalat iik u dzooc u yóox jaatzo'. Tene' bíin xi'iquen tu paach le caaj, in machmaj in máascabo'.

³Cu dzo'ocole' ch'a'a' dze'edzec ti' le tzo'otzo'obo' ca a kax tu chi' a búuc.

⁴Cu dzo'ocole' ch'a'a u láak dze'edzeque', ca pulic ich káak u ti'al ca elec. Ti' bíin jóokoc káak u ti'al j bin tu yóokol tuláacal u caajil Israeli'.

⁵Teen Yuumtzile', teen a'alic: Je'el yaan Jerusaleno'. Teen tin dzáa tu chúumuc caajo'ob yéetel múuch' caajo'ob.

⁶Ba'ale' ma' tu yóoltaj u dzo'ocbes in nu'ucbe'en t'aano'ob, asab kaschaj ti' u láak caajo'ob yéetel múuch' caajo'ob yano'ob tu bakpacho', tumen ma' tu yu'ubaj t'antic in wa'almaj t'aano'ob mix tu dzo'ocbesic in nu'ucbe'en t'aano'ob.

⁷Le t o'ola'ale', teen Yuumtzile', teen a'alic: Te'exe' asab j ma' tzic t'aane'ex, ma' bey le caajo'ob bakpachmailexo', ma' cuxlaque'ex ti' in tzolbe'en t'aani', mix a dzo'ocbese'exo'obi'.

⁸Le t o'olale' teen Yuumtzile' teen a'alic: Tene' bin in ca'aj xan in ba'ateltech Jerusalén; bin in ca'aj in béeycunt le xot kiin ta wóokol tu táan u yich tuláacal le múuch' caajo'obo',

⁹mix jun téen in beetmaj beyo' mix bíin in ca'a beet tu ca'a téeni'. Jach p'ecbe'en tuláacal ba'axo'ob ca beetic.

¹⁰Ichil a caajile' bíin yanac taataob bíin u jaanto'ob u paalalo'ob, yéetel paalalo'ob bíin u jaanto'ob u taataob. Bíin in dzo'ocbes a xot kiin ta wóokol, cu dzo'ocole' le máaxo'ob bíin p'áataco'ob cuxa'ano'obe' bíin in ki'itbeso'ob tu can ti'itzil lu'um.

¹¹Teen Yuumtzile', quin jalach t'antic tu yo'olal in cuxtal: je'el bix ta manba'alcuntaje'ex in kulnaj yéetel a beetbil ma' utzil kuob bey xan a p'ecbe'en cuxtale'exo', bey xan tene' bíin in xe'exe'et'e'ex x ma' ch'a'a óotzilil; ma' bíin in ch'a'a te'ex óotzilili'.

¹²Jun óox jaatz ti' a caajile' bíin xu'uluc yéetel báan quíimil bey xan yéetel wi'ij ichilech, u láak óox jaatze' bíin quíimsa'ac tumen u aj p'eeco'ob ta bakpach, u dzo'oc óox jaatze' bíin in ki'itbeso'ob tu can ti'itzil yóokolcaab. Tene' bíin xi'iquen tu paacho'ob in machmaj in máascab.

¹³Teen túune' bíin in láal in p'uja'anil tu yóokolo'ob tac quéen náacac u yóole', cu jóomol in wóol. Le quéen dzo'ococ in láalic in p'uja'anil tu yóokolo'obe' bíin u yojéelto'ob teen Yuumtzil máax a'almajil ichil in p'uja'anil tu o'olal in p'eec in ke'exel.

¹⁴Tene' bíin in sut jun tucub x lab pakil u caajil Jerusalén; bíin in paj a subtal tu táan le caajo'ob bakpachtmailecho', u ti'al ca ila'ac tumen tuláacal máaxo'ob cu máan ta tzéel.

¹⁵Le quéen in láal in p'uja'anil yéetel in xot kiin ta wóokol u ti'al in chich jadziqueche', tuláacal máaxo'ob bíin poch'iquech, le quéen ila'ac tumen le caajo'ob ba'axo'ob cu yúuchul ti' teche' bíin u ch'a'ob nojoch sajaquil. Teen Yuumtzil, teen j a'ale.

¹⁶Tene' bíin in beet u taal wi'ij ta wóokole'ex, bey sajbe'en x u julubilo'ob jáaycabilo'obe'. Bíin in beet u taal ta wóokole'ex quíimil, wi'ijil yéetel yaan u p'áatal mina'an ba'ax jaanta'al.

¹⁷Beyo' bíin in beet u taal ta wóokole'ex wi'ij, koja'anil yéetel quíimil, bíin p'a'ataque'exo'ob xan x ma' paalal tumen dzíidzic ba'alche'ob; bíin in beet u quíimil ya'ab ti' te'ex ich ba'atelil. Teen Yuumtzil, teen a'almail.