Read Yucateco Ezequiel 6 Bible Online

Ezequiel 6 - Yucateco bible

Ezequiel 6

¹Yuumtzile' tu t'anajene' ca tu ya'alaj ti' teen:

²Dzáa a paacat tu tojil u pu'uquilo'ob Israele' ca a wa'al ti'ob tin kaaba':

³a'al ti'ob beya': U pu'uquile'ex Israel ch'en xiquinte'ex ba'ax cu ya'alic Yuumtzil ti' pu'uco'ob, ti' jo'ol lu'umo'ob, ti' áalcab ja'ob yéetel ti' táax koomo'ob: Bin in ca'aj in beet u taal ba'atel ta wóokole'ex u ti'al ca kascunta'ac u cúuchilo'ob tu'ux ca manba'al kultaje'exo'

⁴Bíin in láaj xiixcunt u cúuchilo'ob tu'ux ca kubique'ex quíimsbil ba'alche'ob yéetel tu'ux ca tóoquique'ex poomo', bíin xan in beet u lúubul quimen u cajnáalilo'ob tu táan u beetbil kuobo'.

⁵Bíin in pula'ant u quimen wíinclilo'ob le j israelitaob tu táan u beetbil kuobo', bey xan bíin in ki'itbes u baaquelo'ob tu táan u multuunilo'ob u kultajo'ob.

⁶Tuláacal le cúuchilo'ob tu'ux cajnáale'exo' bíin xiixcunta'ac u caajilo'ob bíin xiixcunta'ac xan u multuunilo'ob u kulta'al le beetbil kuobo'. U multuunilo'ob u kultajo'obe', bíin p'áataco'ob láaj xiixil, u beetbil kuilo'obe' bíin ca'acacha'aco'ob; u multuunilo'ob u kultajo'ob tu'ux cu tóoquico'ob poome' bíin láaj je'enec; tuláacal ba'ax a beetmaje'exe' bíin sa'atac.

⁷Le quéen a wile'ex u lúubul quimeno'ob ya'abcach máaco'ob ichile'exe', bíin a táan óolte'ex teen Yuumtzil.

⁸Ba'ale' tene' bíin in toc ti' quíimil dze'edzec ti' te'ex u ti'al in ki'itbes ich múuch' caajo'ob.

⁹Le máaxo'ob bíin p'áataco'ob cuxa'ano'ob ti' le múuch' caajo'obo' bíin u ka'ajseno'ob; bíin ka'ajac ti'ob bix úuchic in beetic u mukyajo'ob tu yo'olal ma' tu kubajo'ob u yóolo'ob ti' teni', yéetel tumen tu cúulpachcuntajeno'ob u ti'al u kultico'ob u beetbil kuob. Leti'obe' bíin taacchajac u xejo'ob tu yo'olal tuláacal le ba'axo'ob kaastaco'ob tu beetajo'obo', yéetel tu yo'olal u p'ecbe'en cuxtalo'ob.

¹⁰Bey túuno' bíin u kaj óolto'ob tene' Yuumtzilen, le ca tin wa'alaj in u túuxtic le numyajo'obo' ma' tin wa'alaj chéen u ti'al in sajbesico'obi'.

¹¹Yuumtzile' tu ya'alaj ti' teen: Áacam okolnen táan a loox yéetel táan a cocochaak; wéekec a yaayaj awat tu yo'olal u p'ecbe'en loobilo'ob, u caajil Israel, tumen bin u ca'ajo'ob j quíimil ich ba'atel, ich wi'ijil yéetel ich koja'anilo'ob.

¹²Le máaxo'ob náach yanilo'obe' bíin quíimico'ob ti' koja'anil, le máaxo'ob naadz yano'obe' bíin quíimico'ob ich ba'atel, yéetel le máaxo'ob bíin u jecho'ob le quíimilo'obo', bíin quíimico'ob yéetel wi'ij. Bey bíin in dzo'ocbes in láalic in p'uja'anil tu yóokolo'obo'.

¹³Le quéen ila'ac u j quimen wíinclilo'ob le máaco'ob ichil u beetbil kuob yéetel tu bakpach u multuunil u kultajo'ob, tu yóokol tuláacal ca'anal jo'ol pu'uco'ob, tu p'íich ca'analil le witzo'obo', tu yáanal tuláacal che'ob ya'axtaco'ob, bey xan tu yáanal tuláacal búuc le' che'ob, yéetel tu cúuchilo'ob tu'ux ca'ach cu kubico'ob qui'iboc ja'ob ti' u kuobe', bíin ojéelta'ac túun, teen Yuumtzilen.

¹⁴Bíin in líikes in kab u ti'al in jadzico'ob, bey túuno' líikbal ti' le x tocoy lu'um yaan j noojol tac Ribla te j xamano', bíin in beet u suut sajbe'en x tocoy lu'umil u lu'umilo'ob tu'ux yaan máaco'ob cajacbalo'ob. Bíin u kaj óolto'ob túun, teen Yuumtzilen.