Read Yucateco Ezequiel 7 Bible Online

Ezequiel 7 - Yucateco bible

Ezequiel 7

¹Yuumtzile' tu t'anajene' ca tu ya'alaj ti' teen:

²Teen Yuumtzile', quin wa'alic ti' u lu'umil Israel: Ta'itac u kuchul u kiinil u xu'ulsa'al, ta'itac u kuchul u kiinil u xu'ulsa'al tuláacal a lu'umilo'ob.

³Israel, táan u kuchul u kiinil a xu'ulsa'al. Bin in ca'aj in láal in p'uja'anil ta wóokol; bin in ca'aj in káat ti' teech ca cáant bix cuxlajiquech, bíin in ca'aj in jadzech tu yo'olal tuláacal u p'ecbe'enilo'ob ba'axo'ob ca beetic.

⁴Ma' bíin in t'anech yéetel ch'a'a' óotzilili'; bin in ca'aj in jadzech tu yo'olal ma' toj a cuxtali', yéetel bin in ca'aj in beet a muuk yaj tu yo'olal tuláacal ba'axo'ob p'ecbe'eno'ob a beetmaj. Bíin a kaj óolte'ex túune', teen Yuumtzilen.

⁵Teen Yuumtzil, teen a'alic: Ilawile, dzo'oc u náadzal u kiinil le xu'ulsajo', bin talac loob tu paach u láak loob; dzo'oc u náadzal u kiinil a xu'ulsa'al.

⁷U cajnáalile'ex le múuch' caaja', táan u kuchul u kiinil le xu'ulsaja'. Dzo'oc u kuchul u súutuquil; táan u kuchul u kiinil u yantal chéen jak óolal. Bíin xu'uluc le qui'imac óolal te j witzo'obo'.

⁸Sen séeba'an bíin in láal in p'uja'anil ta wóokol, tac quéen máanac in p'uja'anil, bíin in káat ti' teech ca a cáant tuláacal ba'axo'ob a beetmaj, bíin in jadzech tu yo'olal tuláacal u p'ecbe'enilo'ob a cuxtal.

⁹Ma' bíin in t'anech yéetel ch'a'a óotzilili'; bin in ca'aj in jadzech tu yo'olal u keechelil a cuxtal yéetel bin in ca'aj in beet a mukyaj tu yo'olal u p'ecbe'enilo'ob a cuxtal. Te'ex túune' bíin a kaj óolte'ex tene' Yuumtzilen, máax jadzique'ex.

¹⁰¡Je'el u kiinila'! ¡Dzo'oc u kuchul! ¡Dzo'oc u taal le xu'ulsajo'! Le loobilo' táan u béeytal tuláacal tu'ux, dzo'oc u sen ya'abtal le j ma' subtalilo'.

¹¹Le meyaj loobo' cu chíicpajal u ti'al u beet loob. Ba'ale' ma' bíin béeyaco'ob yéetel u ayikalilo'ob mix yéetel u ka'amcach t'aano'obi'. Mix ba'al u biilal le ba'alo'obo'.

¹²Dzo'oc u kuchul u súutuquil, dzo'oc u kuchul u kiinil. Mix le aj coonol bíin yanac ba'ax o'olal u qui'imacchajal u yóolo', mix le aj maan bíin yanac ba'ax o'olal u yaj óolalo'. Bin in ca'aj in jadz yéetel in p'uja'anil u ca'anal ichil Israel.

¹³Le máax cu conic wa ba'axe', mix bikin bíin páatac u ca'a manic, mix bíin páatac u wach'ic le u kax t'aanil coonol u beetmajo'. Le loolob máaco'obo' ma' bíin p'áataco'ob cuxa'ano'obi'.

¹⁴Cu jóopsa'al le trompetaob u ti'al u chúunul ba'atel; tuláacalo'ob cu nu'ucbesicuba'ob, ba'ale' mix máac cu jóokol j ba'atel. Bin in ca'aj in jadz yéetel in p'uja'anil u j ca'anal ichil Israel.

¹⁵Tu paach caaje' yaan ba'atel, ichile' yaan koja'anilo'ob yéetel wi'ijil. Le máaxo'ob yano'ob tu cúuchil ba'atelo' bíin quíimico'ob ichil ba'atel, le máaxo'ob yano'ob ich caaje' bíin quíimico'ob tu yéetel wi'ijil bey xan tu yéetel koja'anil.

¹⁶Quex ca yanac máaxo'ob j púudzul te j witzo'ob bey u púudzul sacpacalo'ob jaka'an u yóolo'obe', tu láacalo'ob bíin quíimico'ob tu yo'olal u kebano'ob.

¹⁷Tuláacalo'ob bíin lúubuc u muuk u kabo'ob bíin jo'op'oc xan u quiquilanquil u píixo'ob.

¹⁸Bíin u búuquinto'ob to'och nooko'ob tu yo'olal u chíiculal yaj óolal; bíin jo'op'oc u quiquilanquil tuláacal u wíinclilo'ob, cu dzo'ocole' bíin xi'ico'ob chac xique'eno'ob tu yo'olal sublaquilo'ob, bey xan u dzicmajo'ob u poolo'ob.

¹⁹Bíin u pulo'ob ti' bejo'ob u plataob; bíin u pulo'ob u oro'ob je'el bix u pu'ulul u ta' míise'. Ma' bíin páatac u to'ocolo'ob tumen u plataob mix tumen u oro'ob tu kiinil u p'uja'anil Yuumtzili'. Ma' bíin páatac u náaysic u yóol u wi'ijilo'obi', mix bíin na'ajchajco'obi', tumen u oro'obe' leti' j beet u loolob wíinictalo'ob.

²⁰Tu yo'olal u sen qui'ichquelmil u co'ocoj ba'alo'obe', j ca'analchaj u yicho'ob, cu dzo'ocole' tu beetajo'ob p'ecbe'en kuob tu yéetelo'ob. Let o'olal tene', bíin in suut ta' míisil u co'ocoj ba'alo'ob.

²¹Bíin in beet u taal j táanxel lu'umilo'ob u ti'al ocoltic ti'ob, bíin in beet u taal u asab p'ecbe'enil wíinico'ob yóokolcaab u ti'al toquic ti' leti'ob, bíin ila'aco'ob bey ba'alo'ob ma' utz yanilo'obe'.

²²Tene' bíin in sut in paach ti' le múuch' caajo', bíin in p'at u manba'alcunta'al in kulnaj, in co'ocoj ayikalil ca'ach. Bíin taalac j oocolo'ob u ti'al manba'alcuntic.

²³Nu'ucbes jun p'éel máascab suum, tumen te j múuch' caajo' ya'abcach máaco'ob cu xot kinta'alo'ob tu yo'olal u quíimsaj wíiniquilo'ob, cu dzo'ocole' le caajo' chuup yanil yéetel meyaj loolo'ob.

²⁴Tene' bin in ca'aj in beet u taal j loolob máaco'ob u ti'al ch'a'aláantic u najilo'ob le caajo'. Bin in ca'aj in xu'uls u j ca'anal ichil u nucuch ba'alilo'ob le caajo'; bíin in beet u manba'alcunta'al u quili'ich cúuchilo'ob.

²⁵Bíin sen sajacchajco'ob; bíin u caxto'ob le jéedzelo', ba'ale' ma' bíin u nuptáanto'obi'.

²⁶Bíin taalac loob tu paach u láak loob; loolob péectzilo'ob tu paach u láak loolob péectzilo'ob. Chéen cunel bino'ob u caxto'ob aj bóobato'ob u ti'al a'alic ti'ob ba'ax cu taal u kiinil; ma' bíin yanac aj kiino'ob ca'anbesico'obi', mix u nuuquilo'ob caaj u ti'al a'almaj xiquintico'ob.

²⁷Le ajawo', bíin u búuquint u nookil okom óolal, le méektáano' bíin sen yaachajac u yóol le caaj xano' bíin jo'op'oc u quiquilanquil. Bíin in beet ti'ob ba'ax cu najmatico'ob tu yo'olal u keechelil u cuxtalo'ob yéetel bíin in p'is óolto'ob je'el bix u p'is óolalo'obe'. Beyo' bíin u kaj óolto'ob teen Yuumtzilen.