Read Yucateco Ezequiel 8 Bible Online

Ezequiel 8 - Yucateco bible

Ezequiel 8

¹Ti' u cinco kiinil u seis winalil ti' u seis ja'abo'obe', ti' culucbalen ca'ach tin wotoch yéetel u nuuquilo'ob Judae'. Ti' lelo' Yuumtzile' tu téec dzaj u kab tin wóokol,

²ca tin wilaj jun p'éel ba'al bey wíinique'. Ti' jun p'éel ba'al bey u kaxnak tac caabale', tin wilaj jun p'éel ba'al bey káake', líikbal tu kaxnak tac ca'anale', cu jóopbal ca'ach bey jun máascab ja'aba'anile'.

³Le wíinico' tu tich'aj le ba'ax quin wilic bey u kabe' ca tu machajen tu tzo'otzel in pool. Líiksa'aben túun tumen u páajtalil Ku, ichil le náay tu beetaj Ku u yantal ti' teno', tu bisajen Jerusalene', ca tu wa'alcunsajen tu noj joolil le caaj yaan j xaman tu'ux yaan le j beetbil ku cu beetic u p'u'ujul Yuumtzilo'.

⁴Te'elo' ti' yaan ca'ach u nojbe'enil u Ku Israeli', je'el bix le tin wilaj ca'ach ti' le náay yanchaj ti' teen te j táax lu'umo'.

⁵Tu ya'alaj túun ti' teen: Sut a wich j xaman. Tin sutaj in wich j xaman tu jool caaj, tu u jool u multuunil kultajo', ca tin wilaj le beetbil ku cu beetic u p'u'ujul Yuumtzilo'.

⁶Cu dzo'ocole' tu ya'alaj ti' teen: ¿Táan a wilic le p'ecbe'en ba'alo'ob cu beetico'ob le j israelitaob, yéetel le ba'ax cu beetico'oba' cu náachcuntiqueno'ob ti' in quili'ich kulnajo'? Bíin a wil xan u láak ba'alo'ob táaj kaastac.

⁷Cu dzo'ocole' tu bisajen tu jool u táancabil le kulnajo'. Ti' le pako' cu yila'al joma'an ca'ach le pako'.

⁸Leti' túune' tu ya'alaj ti' teen: Cóochquint u joma'anil le pako'. Le ca tin cóochquintaj u jooma'anil le pako'. Ca tin wilaj yaan jun p'éel u cúuchil oocbali'.

⁹Tu ya'alaj túun ti' teen: ooqueni' u ti'al a wilic le ba'axo'ob sen kaakas ba'alo'ob cu beetico'obo'.

¹⁰J ooquene' ca tin pactaj tuláacal tu chowaquil le pako', ca tin wilaj dzíibta'an tuláacal u jejeláasil u yoochelo'ob ba'alche'ob cu jíiltico'ob u nako'ob j lu'um u ti'al u xíimbalo'ob yéetel u láak ba'alche'ob ma' utz yanilo'obi, bey xan tuláacal u beetbil kuilo'ob u caajil Israel.

¹¹Setenta u nuuquilo'ob Israel ti' yaan Jaazanías u paal Safán ichilo'obe', táan u kultico'ob ca'ach le beetbil kuobo'. Tu jujun túulilo'obe' u machmajo'ob u nu'uculo'ob u yúuchul p'ultaj yéetel poom, sen tat ca'ach u buudzil u poomo'ob.

¹²ca tu ya'alaj ti' teen: ¿Dzo'oc a wilic ba'ax cu x mucul beetico'ob u nuuquilo'ob le j israelitaobo', tu jujun túulilo'ob tu chuun u nu'ucul tu'ux u dzaamajo'ob u beetbil kuobo'? Táan u tucultico'ob ma' táan in wilico'ob, táan u tucultico'ob dzo'oc in xúunp'attic le múuch' caajo'.

¹³Tu ya'alaj xan: Ca'aliquil bíin a wil u beetico'ob u láak ba'alo'ob asab kaastaco'ob.

¹⁴Ca tu bisajen tu jool najil u kulnaj Yuumtzil, le yaan j xamano'. Te'elo' culucbal dze'edzec co'olelo'ob táan u yokolo'ob tu yo'olal ku Tamuz.

¹⁵Ca túun tu ya'alaj ti' teen: ¿Dzo'oc a wilic lelo'? Bíin a wil u láak ba'alo'ob asab kaastaco'ob ti'.

¹⁶Tu bisajen túun ichil u sujuy táancabil u kulnaj Yuumtzil, bey xan tu jool quili'ich naj, chúumuc ti' le x máacan pak yéetel u multuunil u kulta'ajo', Te'elo' ti' yaan ca'ach míin veinticinco wíinico'ob cúulpach ti' u kulnaj Yuumtzil; nococbalo'ob j lu'um tu tojil j lakin, ca'ach táan u kultico'ob le kiino'.

¹⁷Yuumtzil túune' tu ya'alaj ti' teen: ¿Dzo'oc a wilic? ¡U caajil Judae' ma' náacac u yóol yéetel le p'ecbe'en ba'alo'ob cu beetico'ob waya', ba'ale' dzo'oc xan u chupico'ob le lu'um tu yéetel meyaj loob! Xi'ic u bin u beetico'ob u p'u'ujico'ob in kuuxil, táan u beetico'ob u kuchul u tu'ilo'ob tin ni'.

¹⁸Ba'ale' tene' bin in ca'aj j meyaj yéetel in p'uja'anil. Ma' bíin in ch'a'aj mix jun p'íit óotzilil ti'obi'. Quex awat káat óolnaco'ob ti' tene', ma' bíin u ch'en xiquinto'obi'.