Read Yucateco Ezequiel 9 Bible Online

Ezequiel 9 - Yucateco bible

Ezequiel 9

¹Cu dzo'ocole' tin wu'uyaj jun p'éel ka'amcach t'aan tu yawtaj tu jool in xiquin: ¡Dzo'oc u kuchulo'ob máaxo'ob bíin jadzic le caajo', tu jujun túulilo'ob u machmajo'ob u nu'ucul u xu'ulsajo'ob!

²Tin wilaj túun táan u yocol seis wíinico'ob ti' le noj jool yaan j xamano', tu jujun túulilo'ob u machmajo'ob jujun p'éel x bajab máascab. Tu chúumuco'obe' cu taal ca'ach jun túul máac u búuquintmaj lino u ch'icnaktmaj u nu'uculo'ob u yúuchul dzíib. Le ca j ooco'obe' j wa'alajo'ob tu chuun le multuunil kultaj bronce u ca'ajo'.

³U nojbe'enil túun u Ku Israele', j líik tu yóokol le aj cuxa'ano'ob yaan u xiiko'ob, tu'ux yaan leti' ca'acho' ca j bin tac tu jool najil le kulnajo'. Yuumtzile' tu t'anaj le máac u búuquintmaj le linoo' u ch'icnaktmaj u nu'uculo'ob u yúuchul dzíibo',

⁴ca tu ya'alaj ti': Xíimbalt u caajil Jerusalén, cu dzo'ocole' dzáa jun p'éel chíicul tu táan poolal le máaxo'ob cu yaj óoltico'ob tuláacal le p'ecbe'en ba'alo'ob cu yúuchulo'ob ichilo'.

⁵Cu dzo'ocole' tin wu'uyaj u ya'alic ti' u láak máaco'obo': Xeene'ex tu paach le caaj a xíimbalte'exo', cu dzo'ocole' líikbal tin kulnaje', quíimse'ex x ma' ch'a'a óotzilil nuxibo'ob tu yéetel j xi'ipalal, x ch'úupalal, mejen paalal yéetel co'olelo'ob. Ba'ale' ma' a quíimsique'ex mix jun túul ti' le máaxo'ob dza'an u chíiculalo'obo'. Leti'ob túune' tu chu'unsajo'ob u quíimsajo'ob le nuxibo'ob yano'ob actáan le kulnajo'.

⁷Cu dzo'ocole' tu ya'alaj ti'ob: Xeene'ex ichil le kulnajo' ca a manba'alcunte'ex, chupe'ex tu yéetel quimeno'ob u sujuy táancabilo'ob le kulnajo'. Leti'obe' jóoko'obe' ca tu cáajsajo'ob u quíimsico'ob u wíiniquilo'ob le caajo'.

⁸Ba'ale' ca'aliquil táan u beetico'obe' tene' j p'áaten tin juun. Noclajen tac j lu'um, ichil in ki'inamile' tin awat a'alaj: Yuumtzil, ¿bin a ca'a a láal a p'uja'anil tu caajil Jerusalén tac a xu'ulsic le jun p'íit ba'al p'áatalo'ob Israelo'?

⁹Yuumtzile' tu núucaj ti' teen: U keban u caajil Israel yéetel Judae' sen nojoch. Le lu'umo' chuup tu yéetel u quíimsaj wíiniquilo'ob; le caajo' chuup tu yéetel loobilo'ob. Leti'obe' táan u tucultico'ob dzo'oc in xúunp'attic le lu'umo', ma' bin, tin wilic ba'axo'ob cu beetico'ob.

¹⁰Tene' ma' bíin in ch'a'a óotzilil ti'obi', bin in ca'aj in káat ca u cáanto'ob u si'ipilo'ob tu yo'olal cuxtalo'ob.

¹¹Le máac túun u búuquintmaj le lino u dzaamaj tu kaxnak u nu'ucul u yúuchul dzíibo', j suunaje' ca tu ya'alaj: Dzo'oc in dzo'ocbesic le ba'ax ta wa'alaj ti' teno'.