Read Yucateco Daniel 10 Bible Online

Daniel 10 - Yucateco bible

Daniel 10

¹Ti' u kiinilo'ob u yóox p'éel ja'abil u ajawil Ciro j Persiaile', Daniel cu kaaba'inta'al Beltsasar ca'ache', jach tu jaajil tu yilaj, ba'ale' talam u ti'al u na'ata'al. Chéen ba'ale' Daniele' tu kubaj tuláacal u yóol ti', u ti'al u na'atic le ba'ax tu yilajo'.

²Ti' le kiino'obo' teen Daniel jach okomchaj in wóol óox p'éel semanaob.

³Ma' tin jaantaj qui' janalo'obi', mix tin túuntaj baki' mix vinoi, mix tin ji'aj ti' teen mix jun p'éel qui'iboc ba'ali' tac ca j máan le óox p'éel semanaobo'.

⁴Ti' u kiinil veinticuatro ti' u yáax meesil le ja'abo', ti' yanen ca'ach tu jáal u nojoch áalcab ja'il Tigrise'.

⁵Téec paacatnajene' ca tin wilaj jun túul máac; u nooke' beeta'an yéetel lino, yéetel jun p'éel kaxnak ma'alob oro.

⁶U wíinclile' cu léenbal ca'ach bey topacioe', u táan yiche' cu jóopbal bey jun p'éel u léenbal cháaque', u yicho'obe' beyo'ob ca'ach t'aba'an táaj che'obe', u muuk u kabo'ob yéetel u yooco'obe' cu léenbalo'ob bey broncee', u juum u t'aane' bey u yu'uba'al u t'aan ya'abcach wíinico'obe'.

⁷Chéen téen páatchaj in wilaj le náayo', tumen le máaco'ob yano'ob ca'ach tin wéetele' ma' tu yilajo'ob mix ba'ali', tumen j ooc sajaquil ti'ob ca j áalcanajo'ob u ta'acbesuba'ob.

⁸Tin juunal yanen ca'ach ca tin wilaj le nojoch náaya'. Jach sacpile'enchajen, tin wu'uyaj xan cu bineltic ca'ach in muuk.

⁹Le ca'a tin wu'uyaj u t'aane', j sa'at in wóol ca j p'áaten tudzucbalen j lu'um.

¹⁰Tu séeblaquile', jun p'éel kab tu machajen ca tu beetaj in xoltal in t'alcuntmaj u táan in kabo'ob j lu'um.

¹¹Cu dzo'ocole' tu ya'alaj ti' teen: Daniel jun túul j xiib jach yaabilta'an tumen Ku, u'uy ma'alob ba'ax quin in wa'al ti' teech: líiken; tumen tene' túuxta'aben ti' teech. P'elac dzo'oquic u ya'alic le t'aano'oba', tene' j wa'alajen táan in quiquilanquil.

¹²Ca túun tu ya'alaj ti' teen: Daniel, ma' a ch'a'ic sajaquil tumen líikbal tu yáax kiinil ta wóoltaj a ch'a'a nu'uct le talam ba'alo'oba', yéetel le ca ta tuclaj a cabalcuntic a wóol tu táan a Kue', leti'e' tu yu'ubaj a payalchi'. Le t o'olal j taalen.

¹³U jalach ángel, u ajawil Persia tu kataj in beel veintiun kiino'ob; ba'ale' Miguel jun túul jalach ichil le ángelo'obo' j taal u yáanten, tumen p'áaten tin juunal tu tzéel u ajawo'ob Persia.

¹⁴Le t o'olal j taalen in tzol ti' teech ba'ax cu bin j úuchul ti' a caajal ti' le kiino'ob cu taalo'obo', tumen le náay yanji ti' techo' u chíiculal le kiino'ob bíin talaco'obo'.

¹⁵Ca'aliquil táan u ya'alic le ba'alo'oba', tene' táan ca'ach in paacat j lu'um, in macma in chi'.

¹⁶Ti' súutuco', jun túu máac chica'an ti' jun túul u paal xiibe' tu dzáal kabtaj in chi'. Ca túun tin wa'alaj ti' le máax yaan ca'ach actáan ti' teno': In Yuum, le náaya' jach tu p'atajen jach okom in wóolal yéetel x ma' muukil.

¹⁷¿Bix cu bin j páajtal u t'aan le palitzil ta wéetela', wa mina'an in muuk, cu bineltic xan in wóol?

¹⁸Le máax chica'an ti' jun túul u paal xiibe' tu ca'a dzáal kabtajen ca tu dzaj ti' teen túunben muuk

¹⁹ca tu ya'alaj ti' teen: ¿Ma' a ch'a'ic sajaquil mix a náak tucultic. Kue' u yaabiltmajech; ¡Ch'a'a a wóol ma' a ch'a'ic sajaquil! Ca'aliquil táan u t'aane', tin wu'uyaj táan u yantal in wóol, ca tin wa'alaj: In Yuum t'aanen tumen dzo'oc a sutic in muuk.

²⁰Ca túun tu ya'alaj ti' téen: A wojel ba'ax o'olal j taalen in wilech? Tumen bejela'e' yaan in ca'a suut j ba'atel yéetel u ángel u jalachil Persia. Le quéen dzo'ococ in ba'atel tu yéetele', cu taal u ángel u jalachil Grecia.

²¹Bejela'e' bin in ca'aj in wa'al ti' teech le ba'ax dzíibta'an ti' u dzíibil ju'unil jaaj': Ichil in ba'atelil yéetelo'obe' chéen yaan ti' teen u áantaj Miguel, u ángel jalachil Israel.