Read Yucateco Daniel 11 Bible Online

Daniel 11 - Yucateco bible

Daniel 11

¹Teen xane' tin líikesaj u yóol yéetel tin wáantaj, tu yáax ja'abil u ajawil Darío, u ajawil Media.

²Bejela'e' bin in ca'aj in beet a kaj óoltic u jaajil: Láili' bíin méektáanta'aco'ob Persiae tumen óox túul ajawo'ob, cu dzo'ocol leti'obe' bíin méektáanac u can túul ajaw máax bíin asab ayikalchajac ti' le óox túulo'obo'. Le quéen u chuc u méektáanil tu yo'olal u ayikalile' leti'e', bíin u ba'atelt tuláacal u ajawil Grecia.

³Ba'ale' cu dzo'ocole' bíin méektáanac jun túul ajaw jach j ba'atel, u méektáane' bíin náachchajac, bíin u chuc u ajawtal tu yóokol ajawilo'ob, bíin u beet je'el ba'alac u káate'.

⁴Chéen ba'ale' le quéen jéedzec u noj ajawile' bíin mix ba'alcunsa'ac, ca jóokesa'ab can jaatzi'. U ajawile' ma' bíin dza'abac ti' u paalali', mix u noj ajawil bíin chuc u nojoch páajtalil je'el bix ca'ache', tumen u méektáane' bíin t'o'oxoc ti' yaanal.

⁵U ajawil j noojole' bíin u chuc u nojoch páajtalil, ba'ale' jun túul jo'olpóop ti' u aj ba'atelo'obe' bíin chuc asab mu'uka'anchajac ti', bíin xan u náachcunt u méektáanil yóokol jun p'éel noj ajawil.

⁶Cu dzo'ocol wa jay p'éel ja'abo'obe', le ca'a túulo'obo' bíin u beeto'ob jun p'éel nup t'aan: u ajawil j noojole' bíin u dzáa u x ch'upul paal u ti'al ca dzo'ococ u beel yéetel u ajawil j xaman, lela' u ti'al ma' u yantal ba'atel ichil le ca'a p'éel múuch' caajo'obo'. Ba'ale' le kax t'aano' ma' j béeychaji', tumen leti' bey u paal, u yíicham yéetel u j palitzilo'obe', bíin quíimsa'aco'ob.

⁷Ba'ale' jun túul ti' u láaktzile' bíin u ba'atelt u aj ba'atelo'ob j xaman, bíin u cha'a xan le jalach tuulumo', yéetel u aj ba'atelo'obe' bíin béeychajaco'ob.

⁸Yéetele' bíin u bis Egipto u kuob, u yoochelo'ob beeta'ano'ob yéetel yiba'an fierro, pa'ate' yéetel co'ocoj ba'alo'ob oro yéetel plata u ca'ajo'ob. Cu dzo'ocol u máan dze'edzec ja'abo'ob mina'an ba'atel ichil le ca'a p'éel múuch' caajo'obo',

⁹u ajawil j xamane' bíin u yóolt u cha'a' le j noojolo', ba'ale' bíin u yil u kabéetil xúump'ajtic.

¹⁰Ba'ale' u paalal u ajawil j xamane' bíin u nu'ucto'ob jun p'éel nojoch múuch' aj ba'atelo'ob u ti'al u bino'ob j ba'atel. Jun túul ti'obe' bíin u bíin xi'ic yéetel u aj ba'atelo'ob u ti'al u ba'atelt le j noojolilo'obo', bíin u xu'uls tuláacal bey jun p'éel áalcab ja' cu tuule'; cu dzo'ocole' bíin u ca'a ococ u ba'atelte, tac u quéen kuchuc tu tuulumil u ajawil j noojol.

¹¹Le u ch'a'a caajil j xamane', bíin u beet u p'u'ujul u ajawil j noojole', máax bíin jóokoc u ba'atelt u nojoch múuch' aj ba'atelo'ob u p'eec bíin u pa'a u muuk jun puli'.

¹²Tu yo'olal béeychaje' yéetel tu yo'olal le ya'abcach u aj p'eeco'ob j quimeno'obo' bíin u beet u sen ca'analtal u yich, ba'ale' u páajtalile' ma' bíin xáanac ya'ab kiino'obi'.

¹³U ajawil j xamane' bíin u ca'a much'quint u aj ba'atelo'ob, asab nojoch ti' le yáaxe', cu dzo'ocol u máan dze'edzec ja'abo'obe' bíin xi'ic tu ca'a téen u ba'atelt le j noojolilo'ob yéetel jun p'éel nojoch molay aj ba'atelo'ob ma'alob nu'uc t'aanilo'ob.

¹⁴Le quéen úuchuc lela' ya'ab ichilo'ob bíin líikico'ob u lobilto'ob u ajawil j noojol. Ichilo'obe' bíin yanac dze'edzec u loolob j xiibo'ob Israel, je'el bix e'esa'abic te j náayo', ba'ale' ma' bíin béeyaco'obi'.

¹⁵U ajawil j xamane' bíin u beet jun p'éel níix lu'um tu bakpach jun p'éel caaj tuulumta'an, bíin xan u ch'a'e'. Mix u ma'alobil u aj ba'atelo'ob j noojol bíin páatac u káatico'ob u beel le u múuch'ul aj p'eeco'obo'.

¹⁶Le j cha'a caajo' bíin u beet je'el ba'axac u káat yéetel le máaxo'ob j pa'ab u muuko'obo', mix máac bíin páatac u ba'atel tu yéetel, bíin p'áatac tu Lu'umil x Qui'ichpamil, táan u ch'éejsic tuláacal ba'ax nactáantic tu beel.

¹⁷U láak ba'ale', bíin u líiksubáa u ti'al u ch'a'a tuláacal u lu'umil j noojol; u ti'al lelo', bíin u beet jun p'éel kax t'aan yéetel le ajawo', bíin u dzáa u x ch'upul paal bey u yatane', u ti'al ca u ch'éejs u ajawil, ba'ale' ba'axo'ob cu tucultique' ma' bíin béeychajaqui'.

¹⁸Cu dzo'ocole' bíin u ba'atelt u caajilo'ob jáal ka'anab, ya'ab ichilo'obe' bíin lúubuco'ob tu kab; ba'ale' jun túul noj náacom bíin u dzáa u xuul ti' le subtzilila' u ti'al u sublacuntic u ajawil j xaman.

¹⁹Líikbal te'elo' ajawe' tu tojtáantaj u paacat tu tuulumilo'ob le múuch' caajo'ob; ba'ale' bíin kaasil ti' leti' xan bíin u tojolt u cuxtal, mix bikin bíin ojéeta'ac tu'ux dzo'oqui.

²⁰Tu jalach káanche'e u láak ajaw bíin culaqui', bíin u túuxt jun túul aj mol patan u ti'al u ayikalcuntic u ajawil; ba'ale' cu dzo'ocol u máan dze'edzec kiino'obe' bíin quíimsa'ac, ma' ichil ba'ateli'.

²¹Cu dzo'ocole', bíin ajawnac jun túul p'ecbe'en wíinic, máax ma' u najmal u ajawtal ca'achi', leti'e' bíin u ta'acbes u kasa'anil, ichil tuuso'obe' bíin u ch'a'a le ajawilo'.

²²Bíin u láaj ch'éejs tuláacal aj ba'atelo'ob cu káatal tu beel, bíin xan u quíims u nojochil le nup t'aano'.

²³Bíin xan u tus le máaxo'ob tu beetajo'ob jun p'éel u kax t'aanil bisajbáil tu yéetele', quex tumen chéen dze'edzec máaco'ob yaan ti'e', bíin béeychajac.

²⁴Le kiin mix máac tucultique' bíin ococ ti' lu'umo'ob asab ayikalo'ob ti' le táabal caajo'obo', bíin u beet ba'ax ma' j beeta'ab tumen mix jun túul u máanja'an ch'i'ibalo'obi': bíin u t'ox ichil u aj ba'atelo'ob le co'ocoj ba'alo'ob yéetel le ayikalilo'ob tu ch'a'aj ichil ba'atelo'. Bíin u nu'uct u ba'ateltic tuulum caajo'obo', quex chéen u ti'al dze'edzec kiin.

²⁵Tu yo'olal u páajtalil yéetel tu yo'olal u sensen xiibile' bíin xi'ic tu yóokol u ajawil j noojol, yéetel u yáantaj nojoch aj ba'atelo'ob. U ajawil j noojole' bíin u queto'ob le ba'atelo', yaan u bin ba'atel yéetel jun p'éel nojoch aj ba'atelo'ob mu'uka'ano'ob; ba'ale' bíin tu'usuc, ma' bíin páatchajac u quetic u muuk yéetel u aj p'eeco'obi'.

²⁶Láili' le máaxo'ob j t'ano'ob janal tu mayacche'e', leti'ob bíin u máakanto'ob u yóotzital, tumen u múuch'ul u aj ba'atelo'obe' bíin pa'abac u muuko'ob, ya'ab xan ichilo'ob bíin quíimico'obi'.

²⁷Le ca'a túul ajawo'ob túuno' tu baatzilo'obe' chéen u tuculto'ob u beeticuba'ob kaas, bíin culaco'ob janal láili' ti' jun p'éel mayacche' u ti'al u tzicbaltico'ob chéen tuus tu baatzilo'ob, ba'ale' mix jun túul ti' tu ca'a túulal bíin u beeto'ob kaas tumen ma' kuchuc u kiinili'.

²⁸U ajawil j xamane' bíin suunac tu múuch' caajilo'ob yéetel tuláacal le ayikalil tu ch'a'aj ichil le ba'atelo', bíin t'aanac kaas tu yo'olal le quili'ich nup t'aano', bíin u dzo'ocbes ba'ax tu tucultmaj, cu dzo'ocole' cu suut tu lu'um.

²⁹Le quéen kuchuc le kiin a'ala'ano', bíin u túuxt u aj ba'atelo'ob tu caajilo'ob j noojol; ba'ale' ti' le' ch'a'a caaja' ma' bíin béeychajac je'el bix le yáaxo'.

³⁰U aj ba'atelo'obe' bíin ba'atelta'aco'ob tumen j chikinilo'ob taasa'ano'ob ti' cheemo'ob, tu yo'olal u sajaquilo'obe' bíin áalcabnaco'ob. U ajawil j xaman túune' bíin u láal u p'uja'anil tu yóokol le quili'ich nup t'aano', bíin u na'atubáa yéetel le máaxo'ob tu p'atajo'ob le nup t'aano' u ti'al ca meyajta'ac tumeno'ob.

³¹U aj ba'atelo'obo' bíin u manba'alcunto'ob le kulnajo' yéetel u tuulumilo'ob, bíin u ch'eno'ob u beetico'ob le sáamsamal quíimsbil ba'alche'o', bíin u dza'ob te'elo' u manba'alcunajil quíimsbil ba'alche'.

³²Ajawe' bíin u caxt bix je'el u manic yéetel báay jo'olo'ob le máaxo'ob cu xúump'attico'ob le nup t'aano', ba'ale' le caaj cu yaabiltic u Kue' ma' bíin kexpajac u yóoli', u yojelo'ob le ba'ax bíin u beeto'ob.

³³U aj ojelo'ob le caajo' bíin u ca'anbeso'ob ya'ab máaco'ob, ba'ale' cu dzo'ocole' bíin quíimsa'aco'ob, bíin tóoca'aco'ob xan, bíin ocolta'ac tuláacal ba'ax yaan ti'ob, bíin palitzilta'aco'ob táanxel lu'um. Lela' bíin xáanac dze'edzec kiin.

³⁴Le quéen kuchuc u súutuquil le ch'a'apachtajilo'obo', bíin u kamo'ob jun p'íit áantaj, quex beyo' bíin yanac máaxo'ob u nupuba'ob ti'ob chéen tu yo'olal ma' u p'áatalo'ob kaasil.

³⁵Bey xan bíin ch'a'apachta'ac dze'edzec ti' le máaxo'ob ca'anbesico'ob ca'ach le caajo', u ti'al u túunta'al u yóolo'ob, beyo' cu p'áatalo'ob utz yanilo'ob tac quéen kuchuc u xuul le súutuc a'ala'ano'.

³⁶U ajawil j xamane' bíin u beet tuláacal ba'ax u káate'. Tu yo'olal u jach u ca'analil u yich bíin u tucult leti'e' asab nojoch ti' le kuobo', yéetel bíin u poch' le jaajil Kuo'; tuláacal ba'ax bíin u beete' bíin jóokoc utzil ti', tac quéen túuxta'ac tumen Ku u jaadzil; tumen ba'ax bíin u beet Kue' yaan u béeychajal.

³⁷Le ajawa' bíin u p'at u kuob u máanja'an ch'i'ibalo'ob, bíin xan u p'at le kuob cu kultico'ob le co'olelo'obo', wa je'el ba'axac u láak kue', tumen cu tuculticubáa asab nojoch ti'ob.

³⁸Ba'ale' bíin u kult u kuil tuulumo'ob; bíin u tzic le ku ma' tu kulto'ob u máanja'an ch'i'ibalo'ob bíin u kub oro, plata, jatzudz tuunicho'ob yéetel ba'alo'ob co'oj u tojol.

³⁹U ti'al u toquic u tuulumilo'obe' bíin u caxt máaco'ob cu kultico'ob jun túul yaanal ku; tuláacal le bíin u kult le ajawa', leti'e' bíin u beet nojoch tziiquil ti'ob, bíin u dza'ob ti' noj meyajo'ob yéetel bíin u dzáa lu'umo'ob bey bo'olale'.

⁴⁰Le quéen kuchuc u xuul le kiino' u ajawil j noojole' bíin u ba'atelt u ajaw j xaman; ba'ale' leti'e' bíin jóokoc u nactáante, bíin u pulubáa yóokol le j noojolilo'ob bey jun p'éel ka'amcach iike', bíin u chup yéetel u bolanilo'ob ba'atel le caajo'obo', j ba'atelo'ob ti' tzíimino'ob yéetel ya'ab cheemo'ob.

⁴¹bíin ococ xan ti' Qui'ichquelem Lu'um u ti'al u químsic ya'abcach máaco'ob; ba'ale' mix ba'al bíin úuchuc ti' u cajnáalilo'ob Edom yéetel moab, yéetel óoli' tuláacal u lu'umil Amón.

⁴²U aj ba'atelo'obe' bíin u ch'a'ob u láak lu'umo'ob mix Egipto bíin jechic.

⁴³Bíin bisa'ac u ayikalilo'ob oro yéetel plata yéetel tuláacal u jadzudz ba'alo'ob tu lu'umil Egipto; cu dzo'ocole' cu kuchul u kiinil ti' Libia yéetel ti' Etiopía.

⁴⁴Ba'ale' bíin u kam u péectzilo'ob j lakin yéetel j xaman, leti' bíin p'atic jaka'an u yóol; cu jóokol túun p'uja'ane', j bin yéetel u tuuculil u beetic jun p'éel nojoch quíimsaj,

⁴⁵bíin u wa'acuns u jalach chuybil naj tu yáam ka'anab yéetel tu Qui'ichquelem lu'umil quili'ich witz. Ba'ale' láili' te'elo' bíin kuchuc u kiinil u quíimil, ma' bíin yanac mix máac áantiqui'.