Read Yucateco Daniel 3 Bible Online

Daniel 3 - Yucateco bible

Daniel 3

¹Ajaw Nabucodonosore' tu túuxtaj beetbil jun p'éel patbil wíinic yéetel oro, yaan ca'ach treinta metros u ca'analil yéetel óox p'éel metros u cóochil, ca tu ya'alaj ca dza'abac tu táax lu'umil Dura, tu táabal lu'umil Babilonia.

²Cu dzo'ocole' ca tu túuxtaj t'anbil tuláacal u méektáano'ob u múuch' caajilo'ob u lu'umil, u náacomo'ob, le méektáano'ob yaan tu táabal lu'umilo', j tzol xiquino'ob, j canan taakino'ob, j p'is óolo'ob, tac xan le máaxo'ob cu yáantajo'ob yéetel tuláacal le yaan u méektáano'ob ti' u táabal lu'umil, u ti'al ca talaco'ob tu kiinil u ku'ubul le patbil wíinic tu túuxtaj beetbilo'.

³Tuláacal u nucuch máaquilo'ob le lu'umo' tu much'juba'ob tu táan le patbil wíinico', u ti'al u kiinbeso'ob u kiinil ku'ubico'.

⁴Le máax dza'an u ti'al u ka'am a'alic u chúunul le kiinbesajilo' tu ka'amkam a'alaj: U'uye'ex u cajnáalilo'ob tuláacal caajo'ob, lu'umo'ob yéetel le máaxo'ob jejeláas u t'aano'obo':

⁵Le quéen a wu'uye'ex u juum trompeta, flauta, cítara, lira, salterio, gaita yéetel tuláacal le ba'alo'ob cu pa'axalo'obo', ca xoltale'ex u ti'al u kultique'ex le patbil wíinic oro u ca'aj tu beetaj Nabucodonosoro'.

⁶Tuláacal le máax ma' tu xoltal u kult le patbil wíinico', tu séeblaquil bíin pu'uluc ti' jun p'éel t'aba'an chujcab.

⁷Bey túuno', le ca tu yu'ubajo'ob ya'abcach máaco'ob much'ucbalo'ob u juum tuláacal le paaxo'obo', xolajo'ob ca tu kultajo'ob le patbil wíinic beeta'an yéetel oroo'.

⁸Dze'edzec caldeobe', tu yilajo'ob leti' u kiinil u ti'al u taquico'ob u pool le judíob tu táan ajaw Nabucodonosor,

⁹tu ya'alajo'ob: ¡cuxlac a Tzicbe'enil mantadz yéetel jun tadz ca ka'ajsa'ac a kaaba'!

¹⁰A Tzicbe'enile' tu ya'alaj tuláacal máac ca xolac le quéen u'uya'ac u juum le paxo' u ti'al ca u kult le patbil wíinic beeta'an yéetel oroo',

¹¹le máax ma' tu beetique' yaan u pu'ulul ti' jun p'éel t'aba'an chujcab.

¹²Ma'alob túun, yaan míin jay túul judíob, máaxo'ob j dza'abo'ob tumen a tzicbe'enil u ti'al ca meyajnaco'ob tu táabalo'ob Babilonia, ma' tu tziquico'ob a Tzicbe'enil, mix tu kultico'ob le kuob mix le póolbil wíinic a beetmaj yéetel oroo', le tu túuxtaj beetbil a tzicbe'enile', leti'obe' Sadrac, Mesac yéetel Abed-nego.

¹³Nabucodosore' ca sen j p'u'uji, ca tu ya'alaj ca taasa'aco'ob tu táan Sadrac, Mesac yéetel Abed-nego. Le ca'aj kucho'ob tu táane',

¹⁴tu káat chi'itaj ti'ob: ¿Jach wa jaaj, te'ex bine' ma' ta kultique'ex in kuob mix le póolbil wíinic tin túuxtaj beetbil yéetel oroo'?

¹⁵¿Te'exe' je'el a wóoltique'ex le quéen a wu'uye'ex le paaxo' je'el wa a chintale'ex tu táan le póolbil wíinic tin túuxtaj beetbil u ti'al a kultique'exe'? Tumen wa ma' ta kultique'exe', tu séeblaquil yaan a pu'ulule'ex ichil jun p'éel t'aba'an chujcab; bey túuno', ¿ba'ax kuil je'el u páajtal u toquique'exe'?

¹⁶Le óox túul táanquelmo'ob tu núucajo'ob beya': mina'an ba'ax o'olal ca t'anal t'aanaco'on.

¹⁷C Ku máax c kultique' je'el u páajtal u toquico'on ti' u tóoch'bal u káakilo'ob le chujcabo', yéetel ti' tuláacal le kaas u káat u beet ti' to'on a Tzicbe'enile', leti'e' bíin u toco'on.

¹⁸Ba'ale', quex ma' u beetique', u yojéelt a Tzicbe'enile' ma' táan c kultic a kuob mix bíin xolaco'on tu táan le póolbil wíinic ta beetaj yéetel oroo'.

¹⁹Le ca tu yu'ubaj Nabucodonosor le t'aano'oba', chacchaj u táan yich iquil sen p'u'ujic tu yo'olal le óox túul táanquelmo'obo'. Ca túun tu ya'alaj ca chocoquinta'ac le chujcabo', siete u téenel asab ti' suuquile';

²⁰cu dzo'ocole' ca tu túuxtaj wa jay túul mu'uka'an aj ba'atel u ti'al u káaxo'ob Sadrac, Mesac yéetel Abed-nego, ca u pulo'ob ichil u káakilo'ob le chujcabo'.

²¹Le óox túul táanquelmo'obo', láili' u dzaamajo'ob u búuquil u noj meyajo'obo', j ka'axo'obe' ca j pu'ulo'ob ichil le t'aba'an chujcabo'.

²²Tumen ajaw tu ya'alaj ca beeta'ac tu séeba'anil, le chujcabo' sen t'aba'an yanil ca'achi, u káakilo'obe' tu léedzaj le aj ba'atelo'ob tu pulajo'ob le óox túul táanquelmo'ob ichil le chujcabo',

²³lelo'oba' lúubo'ob kaxa'ano'ob ichil le chujcabo'.

²⁴Nabucodonosore' jáan líik, jach jaka'an u yóole' ca tu ya'alaj ti' u j tzol xiquino'ob u méektáano': ¿Ma' wa ta pulaj óox túul máaco'ob kaxa'ano'ob ichil le káako'? Ca tu núucajo'ob: bey.

²⁵Ba'ale' tene' táan in wilic can túul máaco'ob cu xíimbalo'ob waach'al yanilo'ob tu chúumuc le káako', ba'ale' mix ba'al cu yúuchul ti'ob, le u can túul máaco' chica'an ti' jun túul ángel.

²⁶Ca'aliquil táan u t'aan Nabucodonosore' tu nadzajubáa tu chi' le chujcabo' ca j awatnaji': ¡Sadrac, Mesac yéetel Abed-nego, u palitzile'ex u Kuil ca'an, jóokene'ex, co'otene'ex waye'! Tu yóox túulalo'ob jóoko'ob ichil le káako'.

²⁷Tuláacal u méektáano'ob le múuch' caajo'ob yano'ob te'elo' tu nadzajuba'ob tu yicnal le máaco'obo', máaxo'ob ma' j beeta'ab loob tu wíinclilo'ob tumen le káako ca tu yilajo'obe', mix jun p'éel u tzo'otzel u poolo'ob jadz káakta'abi', mix ti' u nooko'ob úuch mix ba'al, mix u booc elel yaan ti'ob.

²⁸Ti' le súutuco' Nabucodonosore' tu ya'alaj: ¡Qui'iqui' táanta'ac u Ku Sadrac, Mesac Yéetel Abed-nego, máax tu túuxtaj u ángel u ti'al u toquic u palitzilo'ob u yoquesmaj u yóolo'ob ti', máaxo'ob ma' tu dzo'ocbesajo'ob u t'aan ajawi', tumen tu yóoltajo'ob u táanilcunto'ob u quíimilo'ob ma'ili' xolaco'ob u kulto'ob jela'an ku, ma' u Kuobi'!

²⁹Bejela'a' túune' tene' quin wa'alic je'el máaxac ca t'aanac kaas tu yo'olal u Ku le táanquelemo'oba' ca xo'oxota'ac u wíinclil, u yotoche' ca su'utuc jun múul jeenel pak, je'el tu'uxac u caajale', múuch' caajo'ob wa je'el bixac u t'aane', tumen mina'an u láak Ku ca páatac u tocsaj beyo'.

³⁰Cu dzo'ocole' ajawe' tu dzaj ti' le óox túul táanquelmo'obo' nonoj cúuchilo'ob tu táabal lu'umil Babilonia.