Read Yucateco Daniel 4 Bible Online

Daniel 4 - Yucateco bible

Daniel 4

¹Teen ajaw Nabucodonosor, in káat ca yanac u jéedzel yéetel u ayikalil u cajnáalilo'ob le múuch' caajo'oba', lu'umo'ob yéetel u jejeláas t'aano'ob caja'ano'ob te j lu'uma'.

²In káat ca wojéelte'ex le jakbe'en ba'alo'ob tu beetaj u Kuil ca'an tin wéetelo'.

³¡Jach nojoch u páajtalil yéetel u máactzilo'ob! U ajawile' mina'an u xuul, u páajtalile' bíin máanac ti' ch'i'ibal bey ti' ch'i'ibal.

⁴Teen, Nabucodonosore', jeedzel ca'ach in cuxtal tin jalach naj yéetel in nojoch ayikalil.

⁵Yanchaj ti' teen jun p'éel wayak tu ja'asaj in wóol, tuuculilo'ob le náayo'ob tu sen sajaccunten.

⁶Tu yo'olale' tin wa'alaj ca talac u yileno'ob tuláacal u aj na'ato'ob Babilonia, u ti'al ca u ya'alo'ob ba'ax u káat u ya'al le wayako'.

⁷J taalo'ob tac Babilonia tuláacal le j meeno'ob, le j chuchuc na'ato'ob, le j ojéelajo'ob yéetel le cu na'ato'ob ba'ax cu chíicultic le eeko'obo', ca tin tzicbaltaj in wayak ti'ob, ba'ale' ma' j páatchaj u ya'alico'ob ba'ax u káat u ya'ali'.

⁸Tu dzoocbalaque' j taal Daniel, cu kaaba'intic xan Beltsasar tu yo'olal u tziiquil in ku, u cuxtale' nu'uc belta'an tumen u pixan quili'ich Ku, ca tin tzicbaltaj in wayak ti' beya':

⁹Beltsasar, u nojochil le aj chuchuc na'ato'obo', tene' in wojel, u quili'ich pixan Kue' cu nu'uctic a beel, mix ba'al bala'an ti' teech. A'al ti' teen ba'ax tin wilaj ichil in wayak yéetel ba'ax u káat ya'ale'.

¹⁰Leti' le náayo'ob tin wilaj ca'aliquil chilicbalena': Tu chúumuc lu'ume' yaan ca'ach jun cúul ca'anal che'.

¹¹Le che'o' j bin u ch'íijil, ca j polocchaj u chuun; u ni' che'ile' cu kuchul ca'ach tac ca'an, cu páajtal xan u yila'al líikbal ti' u ti'itzil u jach náachil le lu'uma'.

¹²U le'ob ca'ache' cu yila'alo'ob jach jatzudztac jach ya'ab ca'ach u dzáic ich chuca'an ti'al u tzéenta'al tuláacal. U ba'alche'ob le káaxo' cu je'elelo'ob ca'ach tu yaanal u bo'oy, tu kab che'ile' le ch'íicho'obo' cu beetico'ob ca'ach u ku'ob u cuxtal le lu'umo' ti' leti' ca'ach cu taal.

¹³Ca tin téec ilaj ichil in náaye' jun túul ángel táan u yéemel lukbal j ca'an,

¹⁴táan u yawat a'alic: Lúubse'ex le che'o', ch'aque'ex u kabo'ob, lukese'ex u le', ki'itbese'ex u yicho'ob. P'uje'ex le ba'alche'ob yaan yáanal u bo'oyo' bey xan le ch'íich'o'ob yano'ob tu kabo'obo'.

¹⁵Ba'ale' u chuun yéetel u mootze' p'ate'ex te j lu'umo'; kaxe'ex yéetel u jokenjook fierro bey xan yéetel bronce, p'ate'ex ichil u xíiwilo'ob le káaxo'. Ca báanac p'uul ja' tu yóokol, ca u jaant xíiw yéetel u ba'alche'ilo'ob káax.

¹⁶Ca chocochajac u pool, ca suunac bey jun túul ba'alche'e', le kaaso' ca xáanac siete ja'abo'ob.

¹⁷Leti' le xot kiin j a'ala'ab tumen le quili'ich ángelo'ob cu canano'obo', u ti'al ca ojéelta'ac tumen tuláacal máac u Kuil sen ca'anale' yaan u páajtalil tu yóokol u ajawilo'ob wíinic, máax dzáic u méektáan ti' máax u káate' cu líiksic u beet u nojchil múuch' caajo'ob le máac u asab caabal óol ti' tuláacal le wíinico'obo'.

¹⁸Teen, ajaw Nabucodonosor, ti' teen yanchaj le wayaka'. Beltsasar, bejela'e' a'al ti' teen ba'ax u káat u ya'al le náaya', tumen mix jun túul u aj chuchuc na'atilo'ob in ajawil tu na'ataj; ba'ale' teche' je'el u páajtal a na'atique', tumen ti' teech yaan u pixan quili'ich Ku.

¹⁹Daniel túune', le máax cu kaaba'intic ca'ach Beltsasare', j p'áat jun súutuc táan u tuucul, jaka'an u yóol tu yo'olal le tuuculo'ob cu taalo'ob ca'ach tu poolo'. Ba'ale', teen le ajawo' tin wa'alaj ti': Beltsasar, ma' a yaj óolal tu yo'olal le wayako', mix tu yo'olal ba'ax u káat u ya'ale'. Beltsasare' tu núucaj: ¡Way, Tuláacal ba'ax u káat u ya'al le wayako', ca lúubuc tu yóokol u aj p'eeco'ob a Tzicbe'enil!

²⁰Le ca'anal che' tu yilaj a Tzicbe'enilo' cu kuchul tac ca'an cu páajtal u yila'al ca'ach líikbal tu asab náachil lu'um,

²¹jach jadzutztac ca'ach u le'ob yéetel ya'ab u yich, cu chúucpajal u ti'al tzéent tuláacal, tu yáanal u bo'oye' cu je'elel u ba'alche'ob le káaxo', tu kabo'ob xane' le ch'íich'o'obo' cu beetico'ob ca'ach u ku'obi',

²²le che'o' leti' a Tzicbe'enilo', dzo'oc u nojochtal xan a páajtalil. A Tzicbe'enile' dzo'oc u nojochtal tac u kuchbal j ca'an, a páajtalile' dzo'oc u méektáantic tuláacal yóokolcaab.

²³A Tzicbe'enile' tu yilaj xan jun túul quili'ich ángel cu yéemel ca'ach j ca'an táan u ya'alic: Lúubse'ex le che'o', ch'aque'ex, ba'ale' p'ate'ex u chuun yéetel u mootzo'ob j lu'um; kaxe'ex yéetel u jokenjook hierro'ob bey xan bronce, p'ate'ex xan ichil u xíiwilo'ob le káaxo'. Ca káaxac ye'eb yóokol, ca u jaant u xíiwil le káax yéetel le ba'alche'ob bul siete ja'abo'ob.

²⁴Lela' u káat u ya'ale', u xot kiin u Kuil ca'an, dzo'oc u beetic tu yo'olal a Tzicbe'enil.

²⁵A Tzicbe'enile' bíin tze'elec ti' máaco'obo', bíin cuxlac yéetel le ba'alche'obo'; bíin u jaant xíiw, je'el bix wacaxe', le ye'ebo' bíin u ch'ul u wíinclil. Bey bíin cuxlac a Tzicbe'enil bul siete ja'abo'ob, tac quéen a kaj óolt chéen u Kuil ca'an yaan u páajtalil tu yóokol tuláacal u ajawilo'ob wíinico'ob, leti' xan dzáic j méektáan le máax u káate'.

²⁶Le a'ala'abic ca p'a'atac u chuun yéetel u mootz te j lu'umo' u chíiculal yaan u su'utul ti' a Tzicbe'enil a ajawil le quéen u kaj óolt a Tzicbe'enil chéen ti' Ku yaan páajtalil.

²⁷Le t o'olale' u yu'ub a Tzicbe'enil le in tzol xiquina': u ti'al ca toj cuxlaquech u ti'al xan ma' a asab kebanchajal; xu'uls a beetic loob, meyajnen u ti'al a wáantic óotzilo'ob. Ma' xan ca páatac u cuxtal a Tzicbe'enil ich jéedzel yéetel ayikali'.

²⁸Tuláacal le ba'alo'ob j a'ala'ab ti' ajaw Nabucodonosore', béeychajo'ob:

²⁹Cu dzo'ocol u máan jun ja'abe' ca'aliquil táan u xíimbal tu táancabil u jalach naj Babiloniae',

³⁰tu ya'alaj: ¡Ile'ex buca'aj nojochil Babilonia! Teen, yéetel in páajtalile', tin beetaj bey u noj caajil in ajawile', u ti'al in p'atic ba'ax úuchac u yila'al in nojochil.

³¹Ma'ili' dzo'ococ u t'aan ajawe', ca j u'uya'ab jun p'éel t'aan ti' u taalbal ca'ane' táan u ya'alic: U'uy le ba'ala' ajaw Nabocodonosor. A ajawile' ma' a ti'ali';

³²bíin tze'elequech ichil le máaco'obo', u ti'al ca cajlaquech yéetel ba'alche'ob; siete ja'abo'ob yaan a jaantic xíiw je'el bix le wacaxo'obo', tac quéen a kaj óolt chéen ti' u Kuil ca'an yaan páajtalil tu yóokol u caajilo'ob lu'um, leti' xan cu dzáic bey méektáan le máax u káate'.

³³Ti' le súutuco' béeychaj le xot kiin j a'ala'abo', Nabucodonosore' j tze'el ichil le máaco'obo'; tu jaantaj xíiw je'el bix le wacaxo'obo', yéetel le ye'ebo' tu ch'ulaj u wíinclil, tac u tzo'otzel u pool chowacchaj bey xan u yíich'aque' nuucchaj bey u kukmel yéetel u nucuch íich'ac cóote'.

³⁴Le ca j dzo'oc u béeychajal le xot kiino', téen Nabucodonosor, tin pactaj ca'an ca tin wu'uyaj dzo'oc in wutztal ti' in chocopoolil; ca túun tin qui'iqui' t'antaj u Kuil ca'an; ca túun tin qui'iqui' t'antaj yéetel le t'aano'oba' le máax cuxa'an mantadzo': U páajtalile' mina'an u xuul; u ajawile' bíin p'áatac ti' u ch'i'ibal wíinico'ob u ti'al ya'abcach ja'abo'ob.

³⁵Tu táane' mix ba'al u cajnáalilo'ob le lu'uma'. Leti'e' cu meyaj je'el bix u káate', bey j ca'an, bey j lu'um. Mix máac cu páajtal u katic u beel u páajtalil mix u káat chi'itic ba'axten cu beetic beyo'.

³⁶Ti' le súutuco' suunajen tin wóol, u jadzutzil in ajawil, in tziiquil yéetel in nojochil. In j tzol xiquino'ob yéetel nuuquilo'ob in aj meyajo'ob u méektáanile', j taalo'ob u caxteno'obe', ca tin ca'a dzajimbáa meyaj ti' in méektáanil, ca j kuch yantal ti' teen jun p'éel páajtalil asab nojoch ti' le xáax yanchaj ti' teen ca'ache'.

³⁷Bejela'a' túune' teen Nabucodonosor, quin qui'iqui' t'antic, yéetel quin tziquic u nojbe'enil u ajawil ca'an, tumen tuláacal ba'ax cu beetique' toj yéetel ma'alob, cu páajtal xan u pajic subtal le máaxo'ob cu yu'ubicuba'ob jach kabéeto'obo'.