Read Yucateco Daniel 6 Bible Online

Daniel 6 - Yucateco bible

Daniel 6

¹Ajaw Daríoe' tu dzaj ciento veinte j méektáano'ob ti' u múuch'ul caajo'ob u ti'al u meyajto'ob jejeláas cúuchilo'ob le ajawilo'.

²Tu táan leti'obe' tu dzaj óox túul aj ilaj meyajo'ob u ti'al u cananto'ob u meyaj le j méektáano'obo', u ti'al ma' u jóokol kaasil mix ba'al ti' ajaw. Jun túul ti' le j ilaj meyajo'obo' Daniel,

³máax, séeb ila'abic bix jela'anil u meyaj ti' le u láak ilaj meyajo'obo' yéetel ti' u nuuquilo'ob le múuch'ul caajo'ob, tu yo'olal cu beetic ma'alob ba'al; le t o'olalo' ajawe' tu tucultaj u dzáic tu táan u j méektáano'ob le lu'umo'.

⁴Le j ilaj meyajo'ob yéetel le j méektáano'obo' tu caxto'ob túun bix je'el u páajtal u taquico'ob u pool Daniele', ca tu ya'alajo'ob ma' táan u nu'uctic tu beel u meyaj le ajawilo', ba'ale' Daniele' jun túul máac toj u cuxtale' ma' j páantchaj u yilico'ob mix jun p'éel ba'al kaas ti' u meyaji'; le t o'olale' ma' páatchaj u taquico'ob u pool Danieli'.

⁵Ba'ale' j ch'éen u tucultico'obi', ca tu ya'alajo'ob: Ma' bíin c caxt mix ba'al u ti'al ca páatac c taquic u pool Danieli' wa ma' chéen tu yo'olal u yocsaj óolal.

⁶Bey túuno' le j ilaj meyajo'ob yéetel le j méektáano'obo' tu kax jo'oltajo'ob u bino'ob j t'aan yéetel ajaw Darío; le ca j kucho'ob tu táane', tu ya'alajo'ob: Ca cuxlac mantadz a Tzicbe'enil.

⁷Tuláacal le jo'olpóopo'ob cu méektáantico'ob le múuch' caajo'oba' tu much'quintuba'obe' ca tu múuch' kax t'antico'ob ca ka'ayta'ac jun p'éel jalach a'almaj t'aan tu'ux ca u ya'alale' ti' treinta kiino'obe' mix máac bíin u beet jun p'éel káat óolal ti' mix jun túul ku ti' mix jun túul máac, wa ma' chéen ti' a Tzicbe'enil. Le máax ma' táan u dzo'ocbesique', u najmal u pu'ulul ichil jom lu'um tu'ux kala'an leóno'ob.

⁸Le t o'olale' u jedz béeycunt a Tzicbe'enile' u dzíibil le a'almaj t'aana' ca a dzáalkabt u ti'al ma' u ke'exel ba'ax cu ya'alic, beyo' ma' tu páajtal u mixba'alcunta'al bey je'el bix suuquil ti' u ya'almaj t'aanil Media yéetel Persiae'.

⁹Tu yo'olal lela', ajaw Daríoe' tu dzáalkabtaj le a'almaj t'aano'.

¹⁰Le ca tu yojéeltaj Daniel dzo'oc u dzáalkabtic le ju'uno', j bin tu yotoch ca tu je'aj u calom kiino'ob u káasab naje', ti' yaan tu tojil Jerusalén, ca j xolaj u ti'al j payalchi' yéetel u ti'al u qui'iqui' t'antic Ku. Je'el bix suuc u beetique', óox téen ti' jun p'éel kiin.

¹¹Le máaco'ob túuno' j múuch' ooco'ob tu yotoch Daniel ca tu chucajo'ob táan u payalchi' yéetel táan u qui'iqui' t'antic Ku.

¹²Tu séeblaquil j bino'ob u yilo'ob ajaw u ti'al ya'alo'ob tu yo'olal le a'almaj t'aano', ca tu ya'alajo'ob ti': A Tzicbe'enile' tu ka'aytaj jun p'éel a'almaj t'aan, tu'ux cu ya'alique' le máax ichil treinta kiino'ob ca káat óolnac ti' je'el máaxac kuil wa ti' je'el máaxac wíinic wa ma' ti' a Tzicbe'enile', yaan u pu'ulul ichil u jom lu'umil le leóno'obo', ¿ma' wa jaaji'? Bey, tu núucaj ajaw, le a'almaj t'aano' u najmal u dzo'ocbesa'al ma' tu páajtal u mixba'alcunta'al je'el bix suuquil ti' ya'almaj t'aanil Media yéetel Persiae'.

¹³Leti'ob túune' j ca'a t'aanajo'ob táan u ya'alico'ob: Daniel jun túul ti' le judíob j ch'a'abo'ob tu lu'umil Judea ca j taasa'ab waye', ma' tu ye'esic mix jun p'íit u tziiquil mix ti' a Tzicbe'enil mix tu yo'olal le a'almaj t'aano', tumen dzo'oc ilic u payalchi' óox téen ti' jun p'éel kiin.

¹⁴Le ca tu yu'ubaj ajaw le t'aana' j p'áat sen okom u yóol ca tu caxtaj bix je'el u páajtal u toquic Daniele'. Tac kuchic u t'úubul kiin, tu beetaj tuláacal ba'ax cu páajtal u ti'al u toquic Daniel,

¹⁵ba'ale' le máaco'obo' j taalo'ob u ca'a yilo'ob ajawe' ca tu ya'alajo'ob ti': A Tzicbe'enile' u ma'alob ojel, bix u ya'alic ya'almaj t'aan Media yéetel Persia, mix jun p'éel wet'a'an wa a'almaj t'aan dzáalkabta'an tumen ajaw cu páajtal u mixba'alcunta'al.

¹⁶Ajaw túune' tu ya'alaj ca taasa'ac Daniele' ca pu'uluc ichil u jom lu'umil le leóno'obo'. Ba'ale' ma'ili' béeycunta'al le xot kiino', ajawe' tu ya'alaj ti' Daniel: ¡A Ku, máax ca meyajtic yéetel nojoch chuca'an óolale', leti' ca u toquech!

¹⁷Chéen p'elac, pu'ulic Daniel ichil le jom lu'umo', ca tu macajo'ob yéetel tuunich u jool le jom lu'umo', ajawe' tu dzáalkabtaj yéetel le jalach dzalabo' bey xan yéetel u dzalabil u noj póopilo'ob u méektáan, u ti'al xan ca ma'alob dzo'ocbesa'ac yéetel Daniel le ba'ax cu ya'alic le a'almaj t'aano'.

¹⁸Cu dzo'ocole' ajawe' j bin tu jalach naj ca j chilaj x ma' janlil, mix xan j bin u beet le ba'axo'ob cu náaysic u yóole'; ma' páatchaj u wenel ti' tuláacal le áakabo'.

¹⁹Chéen p'el úuchic u sáastale', líike' ca j bin tu séeblaquil tu jom lu'umil tu'ux kala'an le leóno'obo'.

²⁰Le ca'aj náadz ajawe' tu t'anaj Daniel, yéetel okom óolale' tu ya'alaj: Daniel u palitzil cuxa'an Ku, ¿páatchaj wa u toquiquech ti' le leóno'ob a Ku máax ca meyajtic yéetel sen chuca'an óolalo'?

²¹Daniele' tu núucaj ti': ¡Cuxlac mantadz a Tzicbe'enil!

²²In Kue' tu túuxtaj u ángel, leti'e' tu nup'aj u chi' le leóno'ob u ti'al ma' u beetico'ob ti' teen mix jun p'éel loob, tumen Kue' u yojel mina'an in si'ipil, mix xan in beetmaj mix ba'al kaas ti' a Tzicbe'enil.

²³Ajaw túune' sen qui'imacchaj u yóol ca tu beetaj u jóokesa'al Daniel ichil le jom lu'umo'. Le ca'aj jóokesa'abe' ma' j caxta'ab mix jun p'éel la'ach tu wíinclili', tumen ma' tu kexaj u Kui'.

²⁴Cu dzo'ocole', tu ya'alaj ajaw ca taasa'aco'ob le máaxo'ob tu tacajo'ob u pool Daniele', pa'ate' yéetel u yatano'ob bey xan yéetel u paalalo'ob ca j pu'ulo'ob ichil u jom lu'umil le leóno'obo'; ma'ili' cóojoco'ob tu taamil le jom lu'umo' ca tu pulajubao'ob le leóno'ob tu yóokolo'ob ca j xe'exe'eta'abo'ob.

²⁵Ajaw Darío túune' tu dzíibtaj ti' u cajnáalilo'ob tuláacal le múuch' caajo'ob yéetel ti' u jejeláas t'aano'ob le lu'umo', iquil u ya'alic ti'ob: Quin dzíiboltic ti' te'ex nojoch jéedzel yéetel ayikalil,

²⁶quin wa'alic yéetel ca dzo'ocbesa'ac ti' tuláacal in ajawil, tzi'iquic yéetel ca chíin polta'ac u Ku Daniel. Tumen leti'e' cuxa'an Ku, yéetel mina'an xu'ulul ti'. U ajawile' mix bikin bíin xu'ulsa'ac mix u páajtalil bíin xu'uluc.

²⁷Leti' máax cu tocsaj yéetel cu jáalkab; leti' máax beetic jakbe'en chíiculalo'ob te j ca'ano' bey xan te j lu'uma'. Leti'e' tu tocaj Daniel ti' u yíich'aco'ob le leóno'obo'.

²⁸Daniele' ma' j ch'éen u beetic u noj máaquil tu méektáanil u ajawil Darío, bey xan tu ajawil Ciro, u ajawil Persia.