Read Yucateco Daniel 8 Bible Online

Daniel 8 - Yucateco bible

Daniel 8

¹Ti' u kiinil u yóox p'éel ja'abil u ajawil Belsasare', teen Daniele' tin wilaj u láak náay, u núupul le yáax yanchaj teno'.

²Ichil le náayo', bey in wóol ti' yanen ca'ach ichil u tuulum caajil Susae', tu táabal lu'umil Elam, tu jáal u yáalcab ja'il Ulai.

³Náach paacatnajen, ca tin wilaj jun túul j taman ti' yaan ca'ach tu jáal le áalcab ja'o'. Yaan ca'ach ti' ca'a p'éel u ca'anal baac, ba'ale' jun p'éel ichilo'obe', pachal jóoko' asab ca'anal ti' le u láako'.

⁴Tin wilaje' le j tamano' táan ca'ach u kóoch yéetel u baaco'ob tu tojil chikin, j xaman yéetel j noojol, mix jun túul u láak ba'alche' cu páajtal u wa'atal tu táan mix u jechic u kóocha'al. Cu beetic je'el ba'ax u káate', amal yaan ca'ach u muuk.

⁵Táanili' in tucultic le ba'ax tin wilajo', ca tin wilaj jun túul j yuuc chikin u taal, ichil u chichich áalcabe' mix táan u pe'epe'eche'etic lu'um. Le j yuuca' yaan ca'ach jun p'éel nojoch baac chúumuc ti' u yicho'ob,

⁶le ca j kuch náadz ti' le j taman yaan ca'ach ca'a p'éel u baaco'ob le tin wilaj tu tzéel le áalcab ja'o', tu kóochaj yéetel tuláacal u muuk

⁷ca tu cachaj tu ca'a p'éelal u baaco'ob, le j tamano' j p'áat mina'an u muuk u ti'al u wa'atal j ba'atel yéetel. Cu dzo'ocole' le j yuuco' tu pulaj lu'um le j tamano' ca tu xanabcha'ataj, mix máac páatchaj u toquic.

⁸Le j yuuco' amal yaan asab u muuk, ba'ale' ti' le u súutuquil yaan ca'ach ya'ab u muuke', u nojoch baaque' j cáachi, tu jeele' jóok can dzíit baaco'ob tojtáantmajo'ob le u can tzéel tu'ux cu taal iiko'ob.

⁹Ti' jun dzíite' jok u láak chan baac, ca j sen nojochchaj tu tojil j noojol, j lakin yéetel tu Lu'umil Qui'ichpamil.

¹⁰Tu yo'olal jach nojochchajique' j kuch tac tu molay ca'an, ca tu pulaj dze'edzec le eeko'obo' ca tu xanabcha'ataj,

¹¹j kuch tac u t'anic j ba'atel u náacom le u aj ba'atelo'obo'; tu xulaj u quíimsbil ba'alche' sáamsamal, ca tu manba'alcuntaj u cúuchil kultaj.

¹²Tu yo'olal u kasa'anile' tu beetaj ca je'elec u aj ba'atelo'ob tu'ux ca'ach cu ku'ubul le quíimsbil ba'alche', tu mixba'alcuntaj le jaajilo'. Tu beetaj tuláacal ba'ax tu yóoltaj, béeychaj ti' tuláacal.

¹³Cu dzo'ocole' tin wu'uyaj jun túul ángele' táan u káat chi' ti' u láak ángel: ¿Le ba'ax cu yila'ala' ba'ax kiin u ch'éenel tu multuunil kultaj le sáamsamal quíimsbil ba'alche'o'? ¿Tac ba'ax kiin u xu'ulul u taj kebanil u ku'ubul u quili'ich kulnaj Yuumtzil yéetel le j ocsa'al óolo'ob u ti'al xanabcha'ata'alo'ob?

¹⁴Je'el ba'ax núucaba': Tac dos mil trecientos ocnac kiino'ob yéetel ja'atzcab kiino'ob. Cu dzo'ocol lelo', le quili'ich cúuchilo' bíin utzquinta'ac.

¹⁵Teen Daniel, ca'aliquil táan in pactic le náaya', yéetel in tucultic ba'ax u káat u ya'ale', téec chíicpaj tin táane' jun p'éel oochel chica'an ti' wíinic,

¹⁶ca tin wu'uyaj u t'aan wíinic cu taal tu yáalcab ja'il Ulai, cu ya'alic ca'ach beya': Gabriel, tzol le náay ti' le máaca'.

¹⁷Leti' túune' náadz tin wicnal. Tene' ja'ak in wóol, ca j noclajen lu'um, ba'ale' leti'e' tu ya'alaj ti' teen: U Paal j xiib, tuculte' le náaya' u káat ya'al ba'axo'ob cu bin j úuchul tu xuul kiino'ob.

¹⁸Ca'aliquil táan ca'ach u t'aan tin wéetele', ca j sa'at in wóol, ca j p'áaten tudzucbalen j lu'um; ba'ale' leti'e' tu líikesajen, ca tu beetaj in wa'atal,

¹⁹ca tu ya'alaj ti' teen: Bin in ca'aj in tzol ti' teech ba'ax cu bin j úuchul le quéen dzo'ococ u kiinil u p'u'ujul Ku, tumen le náaya' u ti'al u xuul kiin.

²⁰Le j taman yaan ca'a p'éel u baaco'ob u káat u ya'ale' u ajawilo'ob Media yéetel Persia.

²¹Le j yuuco' u ajawil Grecia, le nojoch baac yaan chúumuc u ca'a p'éel icho'obo' u yáax ajaw.

²²Le can dzíit baaco'ob jóoko'ob le ca j cáach le yáax baaco', u káat u ya'ale' ti' le lu'uma' bíin jóokoc can p'éel ajawilo'ob, ba'ale' ma' yéetel u páajtalil le yáaxo'.

²³Le kiin quéen kuchuc u xuul páajtalil le ajawilo'oba' yéetel quéen máan tíip'ic u loobo'obe', jun túul j ma' subtal ajaw yaan xan u na'at u ti'al tuuse' bíin culac tu káanche'il méektáan.

²⁴Bíin kuchuc yantal u páajtalil, ba'ale' ma' tu yo'olal u muuki'; bíin xu'ulsajnac yéetel jak óolal bíin béeychajac tuláacal ba'ax bíin u beete'. Bíin u xu'uls j xiibo'ob yaan u páajtalilo'ob; bíin xu'uls xan ya'ab ti' u caajal Ku.

²⁵Tu yo'olal u na'at u ti'al j tuuse' bíin u béeychajac. Bíin ca'analchajac u yich, ya'ab máac x ma' sajaquil cuxlique' bíin lukesic u cuxtal. Bíin wa'alac j ba'atel u ajawil ajawo'ob, ba'ale' leti' bíin xu'ulsa'ac tumen.

²⁶Le u yocnal kiin náaya' yéetel u ja'atzcab kiin náayo'obe' dzo'oc a wilic, jach jaaj; ba'ale' teche' muculte' tumen bíin dzo'ocbesa'ac le quéen máanac le kiino'obo'.

²⁷Teen Daniel, tin wu'uyaj cu bineltic in muuk, ca j lúuben koja'anen dze'edzec kiino'ob. Cu dzo'ocole' líiken ca j binen in táanalt u meeyjulo'ob u méektáanil le múuch' caajo'obo'. Ba'ale' tene' táan ca'ach in jach tuucul tu yo'olal le náay yanji ti' teno', tumen ma' tu páajtal in ch'a'a nu'uctic.