Read Yucateco Daniel 9 Bible Online

Daniel 9 - Yucateco bible

Daniel 9

¹Darío, u paal Asuero cu taal ti' u ch'i'ibal j medo'obe', cu méektáantic ca'ach u ajawil le j caldeobo'.

²Tu yáax ja'abil u ajawile', téen Daniel táan ca'ach in xoquic u dzíibil ju'unil aj bóobat Jeremías tu'ux cu t'aan tu yo'olal le setenta ja'abo'ob unaj u máano'ob u ti'al u kuchul u kiinil u xu'ulsa'al Jerusalén, je'el bix tu ya'alaj ca'ach Yuumtzil ti' aj bóobate'.

³Ca j payalchi'inajen yéetel káat óolal ti' Ku Yuumtzil, táan in su'ukin, in búuquintmaj to'och nooko'ob, bey xan j culajen yóokol ta'an.

⁴Payalchi'inajen ti' Yuumtzil in Ku, ca tin cáantaj beya': Yuumtzil, nojoch Ku yaan u páajtalil, ca dzo'ocbesic tuláacal a séeb chi'ob, yéetel ca dzáic u chíiculaj a yaabilaj ti' le máaxo'ob u yaabiltmajecho'obo', yéetel cu dzo'ocbesico'ob a wa'almaj t'aan:

⁵j kebanchajo'on, t beetaj loobil; dzo'oc beetic ba'ax kaas; cuxlajo'on bey mina'ameche'; xúump'attaj a wa'almaj t'aano'ob yéetel a tzolbe'en t'aano'ob.

⁶Ma' t u'uyaj u t'aan a j palitzilo'ob le aj bóobato'obo', máax t'aanajo'ob ta kaaba' ti' c ajawo'ob, ti' c máanja'an nuuquilo'ob, yéetel ti' tuláacal u caajil Israel.

⁷Teche' Yuumtzil, ca beetic ba'ax no'oja'an, ba'ale' to'one' judíon sublaco'on; le caja'ano'o'on Jerusaleno' tac le u láak j israelitaob, le yano'ob nadz yéetel le caja'ano'ob náach te j lu'umo'ob tu'ux ta pulajo'ob tu yo'olal tu poch'ajecho'ob.

⁸To'one' Yuumtzil, tac xan c ajawo'ob, c nuuquilo'ob yéetel c máanja'an ch'i'ibalo'obe', jach c ch'a'ic subtal tumen kebanchajo'on iquil t poch'ilaquech.

⁹Ba'ale' ti' teche' c Ku, ma' yaanal ba'ax le ch'a'a óotzililo' mix le sa'atsajilo'. To'one' ma' t tzicaj a t'aani'

¹⁰mix táan óoltaj a t'aani', Yuumtzil c Ku, mix dzo'ocbesaj a ca'anbesajo'ob ta dzaj ti' to'on tu chi' a j palitzil le aj bóobato'obo'.

¹¹Tuláacal Israel tu j ma' u'uyaj t'antaj le ca'anbesajo'obo', ma' tu dzo'ocbesajo'ob a t'aani'; le t óolale' j lúub t óokol le loolob t'aano'ob bey le jalach t'aan dzíibta'an tu ya'almaj t'aan Moisés a palitzil, tumen dzo'oc c kebanchajal ta táan.

¹²Teche', le ca ta túuxtaj t óokol jun p'éel noj yajile', j kuch u kiinil a béeycuntic le jadz ta beetaj ti' to'on yéetel ti' le máaxo'ob méektáantico'ono'; tumen ma' yanac yóokolcaab u láak jadz je'el bix le j lúub tu yóokol Jerusaleno'.

¹³Tuláacal le kaasa' j taal t óokole' je'el bix dzíibta'anil tu ya'almaj t'aan Moisese'; ba'ale' to'one' ma' t caxtajechi', Yuumtzil c Ku, mix t xúump'attaj c kasa'anilo'obi', mix p'áato'on ti' a jaajili'.

¹⁴Le t o'olale', Yuumtzil ta nu'ucbesaj le looba' ca ta túuxtaj t óokol; tumen teche' Yuumtzil c Ku jach tu beel tuláacal ba'ax ca beetic; ba'ale' to'one' ma' t óoltaj c u'uyechi'.

¹⁵Yuumtzil c Ku, teche' ta we'esaj ti' to'on a nojoch páajtalil le ca ta jóokesaj a caajal tu lu'umil Egipto, ca ta nojochquintaj a kaaba' líikbal ti' le kiino' tac bejela'e'; ba'ale' to'one' dzo'oc j kebanchajal dzo'oc xan beetic ba'ax kaas.

¹⁶Yuumtzil, c ojel teche' utz a pucsi'ikal. Beet utz a lukesic ti' Jerusalén a p'uja'anil yéetel a kuuxilil, tumen leti'e' a caajal a quili'ich jo'ol lu'um. Tuláacal u cajnáalilo'ob le caajo'ob bakpachtmailo' cu che'ejtico'ob Jerusalén yéetel u cajnáalilo'ob, tu yo'olal c keban yéetel u keban c máanja'an ch'i'ibalo'ob.

¹⁷C Ku, u'uy c payalchi' yéetel le káat óolal cu beetic a palitzila'; tu yo'olal a kaaba'e', Yuumtzil pact yéetel yaacunaj bix óotzilcunta'anil a kulnaj.

¹⁸Táan óolt, in Ku, u'uy xan: jach il a wil c nakan óotzilil bey yanil xan le noj caaj tu'ux cu payalchi'ita'al a kaaba'. Ma' táan c káat óolal ti' teech tumen toj c cuxtal, c beetic tu yo'olal a nojoch cha'a óotzilil.

¹⁹¡Yuumtzil, Yuumtzil! ¡U'uyo'oni', sa'ates kebani'! ¡Táan óolto'on, Yuumtzil co'oten a wáanto'on! ¡Ta wo'olal, in Ku yéetel tu yo'olal a noj caaj, bey xan tu yo'olal a caajal cu payalchi'itic a kaaba', ma' a xáantal!

²⁰Tene' bin u bin in payalchi' yéetel in cáantic in kebano'ob yéetel u kebano'ob in caajal Israel, yéetel in táanbesic in káat óolal ti' Yuumtzil in Ku tu yo'olal u quili'ich jo'ol lu'um.

²¹Ca'aliquil táan in payalchi'e', Gabriel máax dzo'oc ca'ach u chíicpajal ti' teen ichil náay, j taal xiklanquil tac tu'ux yanen. U súutuquil ca'ach in kubic ti' Ku quíimsbil ba'alche' ocnac kiin.

²²Ca tu ya'alaj ti' teen: Daniel, suunajen u ti'al in wa'alic ti' teech le ba'alo'oba'.

²³Le ca ta chu'unbesaj a payalchi'e', Kue' tu núucaj. Tene' j taalene' u ti'al in núuque, tumen Kue' jach u yaabilmajech. Bejela'e' dzáa a wóol ti' le ba'ala', u ti'al a na'atic le náaya':

²⁴Setenta semanaob bíin máanaco'ob yóokol a caajal yéetel yóokol quili'ich caajo' u ti'al u xu'ulsic le meyaj loobo' yéetel xan in xu'usic le kebano', u ti'al u ka'amal sa'atsaj si'ipil tu yo'olal kasa'anil yéetel u ti'al u jedzic tojil mina'an u xuul, u ti'al ca béeyac le náayo' yéetel le bóobato' u ti'al xan ca jun páaycunta'ac le jach quili'icho'.

²⁵Lela' u najmal a wojéeltic yéetel a ch'a'a nu'uctic: Líikbal ti' le súutuc cu bin j a'albil yutzquinta'al yéetel u ca'a líiksa'al Jerusalén, tac quéen kuchuc le nojochil jun páaycunta'ano', yaan u máan sesenta yéetel ca'a p'éel semanaob, bejilo'ob yéetel u tuulumilo'ob Jerusalén sesenta yéetel ca'a p'éel semanaob cu bin utzquinta'al, ba'ale' u kiinilo'ob ya'abcach yaayaj óolal.

²⁶Cu dzo'ocol le sesenta yéetel ca'a p'éel semanaobo' bíin lukesa'ac u cuxtal nojoch jun páaycunta'ano'. Jerusalén yéetel le kulnajo' bíin xu'ulsa'aco'ob tumen u máaquilo'ob jun túul ajaw bíin talac. U xuule' bíin téec talac, bey jun p'éel búulcabale', tac tu xuul bíin anac ba'atel yéetel xu'ulsajil ba'ax dzo'oc u ya'ala'al.

²⁷Ichil jun p'éel u láak semanae' leti'e' bíin u beet jun p'éel nup t'aan yéetel ya'ab máaco'ob, ba'ale' tu chúumuc le semanao' bíin u ch'en le quíimsbil ba'alche'obo' yéetel le ti'ibil óolalo'obo'. Bíin u beeto'ob jun p'éel táaj kaas manba'alcunaj bíin beeta'ac tu táan u multuunil u kultajil quíimsbil ba'alche'ob, tac le xu'ulsajil a'ala'ano' lúubuc yóokol le máax j beet le ba'alo'ob táaj kaastaco'oba'.