Read Yucateco Oseas 10 Bible Online

Oseas 10 - Yucateco bible

Oseas 10

¹Israele' bey jun cúul uva piim yéetel u yiche'; ba'ale' je'el bix u bin u piimtal ca'ach u yiche', bey u bin u ya'abcuntic ca'ach u multuunilo'ob kultaj; je'el bix u qui'ichquelemtal u lu'ume', bey u bin u qui'ichquelemcunsico'ob ca'ach u quili'ich tuunicho'ob.

²U pucsi'ikal Israele' ca'a jaatz yanil bejela'e' yaan u kamic u jaadzil u keban. Yuumtzile' bíin u xiixcuntic u multuunilo'ob u kultaj, bíin xan u jen le quili'ich tuunicho'obo'.

³Bejela'e' le caaja' bíin u ya'al: Mina'an to'on ajaw tumen ma' t chíin poltaj Yuumtzili'. Ba'ale' ¿ba'ax je'el u páajtal u beetic jun túul ajaw t o'olale'?

⁴Chéen t'anal t'aan, cu séeb chi'itic tuus cu dzalkabtic nup t'aano'ob; u ti'ibil bejile' bey ca'ach jun p'éel xíiw cu meyaj loobe' cu ch'íijil ichil u t'o'ol lu'umil pakale'.

⁵U cajnáalilo'ob Samariae' cu quiquilanquilo'ob; cu yokol tumen j quíim chan wacax Bet-avén. Tu yo'olale' le caajo' yéetel u aj kiino'obe' cu yaayaj okolo'ob tumen u nojbe'enile' dzo'oc u sa'atal.

⁶Tac le chan wacaxo' yaan u bisa'al Asiria u ti'al u kubo'ob ti' nojoch ajaw. Beyo' Efraine' bíin pa'ajac u subtal; Israele' bíin u ch'a'a subtal tu yo'olal le beetbil kuo'.

⁷Bíin sa'atac u ajawil Samaria bey jun p'éel u tzáaj che' cu báab yóokol ja'e'.

⁸Bíin xiixcunta'ac u manba'al kulnajo'ob tu'ux ca'ach cu kebanchajal u caajil Israel. Tu yóokol u multuunilo'ob u kultajo'obe' bíin ch'íijic x tees yéetel ki'ixo'ob, le máaco'obo' bíin u ya'alo'ob ti' le pu'uco'obo': ¡Balo'one'exi'! ti' le witzo'obo' bíin u ya'alo'ob: ¡Lúubene'ex t óokol!

⁹Yuumtzile' cu ya'alic: Ma' u jáaws u kebanchajal Israeli' likbal tu chu'unsilac u beetic tu lu'umil Gabaa. ¡Xi'ic u bin u kebanchajalo'ob! Le t o'olalo', le ba'atelo' bíin u chuc le aj loolob yano'ob Gabao'.

¹⁰Le caaja' yaan in jadzic le kiin bíin in wóolte'. U ti'al u ja'adzale' tene' yaan in much'quintic caajo'obi' le quéen in núumsaj yajt tu yo'olal u nojoch kasa'anil.

¹¹Efraín ca'ache' bey jun túul chan x wacax suucbesa'ane' utz tu t'aan ca'ach u muxic le neeko'. Tene' bejela'e' dzo'oc in dzáic yucalche', tu yóokol u qui'ichquelem caal, u ti'al ca u cóol le bolano'; Judae' bíin u cóol le x bukul lu'umo', Jacobe' bíin u pot le lu'umo'.

¹²Tin wa'alaj ti'ob: Pake'ex ti'ibil bejil u ti'al a jochique'ex yaacunaj. Máaka'ante'ex le lu'umo' u ti'al jun p'éel túumben pakal, tumen u kiinil u caxanta'al Yuumtzil, tac quéen talac u ti'al u taas u cháaquilo'ob tocsajil ta wóokole'ex.

¹³Ba'ale' te'exe' ta pakaje'ex kasa'anil, le t o'olale' ta jochaje'ex loobilo'ob ta jaantaje'ex xan u yich le tuus. Tu yo'olal ta wocsaj a wóole'ex ti' u bolanilo'ob ba'atel yéetel ti' a ya'abcach aj ba'atelo'obe',

¹⁴bíin yanac líiksaj caaj ichil a cajnáalilo'obe', tuláacal a tuulumilo'obe' bíin láaj ch'éejsa'aco'ob, je'el bix tu ch'éejsilac Bet-arbel u ajawil Salmán tu kiinil le ba'atelo', le ca'aj ya'ach' le maamatzil yéetel u paalale'.

¹⁵Leti' xan bíin úuchuc ti' te'ex u cajnáalile'ex Betel, tu yo'olal u nojochil a kebane'ex. ¡U ajawil Israele' bíin quíimic táan u tíip'il kiin!